Ukwọrọikọ—Ifetutom Emi Ẹkponode
1 Utom ukwọrọikọ eti mbụk edi ifetutom oro ẹkponode emi Jehovah ọnọde nnyịn. (Rome 15:16; 1 Tim. 1:12) Nte oro edi nte afo esede enye? Ini oro ebede m̀mê nsahi mbon en̄wen ikpenyeneke ndinam nnyịn ida nte utom emi edide akpan ikpọ ke usụhọde. Ndikere enyịn̄ ndian Abasi edi ukpono oro ẹnọde ibat ibat owo kpọt. Didie ke nnyịn ikeme ndinam esịtekọm oro nnyịn inyenede inọ ifetutom emi ọkọri?
2 Edikwọrọ etop Obio Ubọn̄ inamke ererimbot ama nnyịn. Ediwak owo ẹsise utom nnyịn ye unana udọn̄ m̀mê emiom. Mmọ eken ẹsak nsahi ẹnyụn̄ ẹbiọn̄ọ enye. Utọ ubiọn̄ọ oro ekeme ndito mme nsan̄autom, mme mbọhọidụn̄, m̀mê idem mbonubon. Ke enyịn mmọ ekeme nditie nte ke ẹtotụn nnyịn usụn̄ m̀mê ke idi ndisịme. (John 15:19; 1 Cor. 1:18, 21; 2 Tim. 1:12) Etịm mme ikọ ebiari mmọ man ẹnam ifịk nnyịn ebịt inyụn̄ ikop mmemidem m̀mê ikpọn̄ ifetutom nnyịn oro ẹkponode. Satan, emi “[anamde] ikike mmọ eke mînịmke ke akpanikọ okịm, mbak un̄wana gospel ubọn̄ . . . edisem ọnọ mmọ,” esidemede mme etikwo etikwo ekikere. (2 Cor. 4:4) Didie ke afo esinam n̄kpọ?
3 Edi akpan n̄kpọ nditi nte ke nnyịn ndikwọrọ mban̄a Obio Ubọn̄ edi ata akpan utom oro owo nnyịn ekededi ekemede ndinam mfịn. Nnyịn imenyene etop unyan̄a uwem oro owo mîkemeke ndinọ ke usụn̄ ndomokiet en̄wen. (Rome 10:13-15) Ndinyene unyịme Abasi, idịghe eke owo, edi akpan n̄kpọ. Etikwo etikwo ekikere ererimbot kaban̄a utom ukwọrọikọ nnyịn ibiọn̄ọke nnyịn ndikaiso ntan̄a eti mbụk uko uko.—Utom 4:29.
4 Jesus ama enen̄ede ada ifet oro enye ekenyenede ndinam uduak Ete esie ke ọsọn̄urua n̄kpọ. (John 4:34) Enye ama esịn idem ofụri ofụri ke utom ukwọrọikọ ikonyụn̄ iyakke mme n̄kpọ oro ẹtịmerede owo m̀mê mme andibiọn̄ọ ẹnam enye okop mmemidem. Edikwọrọ etop Obio Ubọn̄ ekesida akpa itie ke uwem esie kpukpru ini. (Luke 4:43) Ẹwụk nnyịn ẹte itiene uwụtn̄kpọ esie. (1 Pet. 2:21) Ke ndinam ntre, nnyịn inam utom nte “mme anamutom Abasi.” (1 Cor. 3:9) Nte nnyịn ke ida ifetutom emi inam n̄kpọ ọyọhọ ọyọhọ? Nte nnyịn imoyom mme idaha ndibuana eti mbụk ye mmọ en̄wen ke ido ukwọrọikọ ye ke ido nneme? Nte Mme Ntiense Jehovah, nnyịn ikpenyene ndiben̄e idem kpukpru ini ‘nditan̄a enyịn̄ esie an̄wan̄wa.’—Heb. 13:15, NW.
5 Udeme oro nnyịn inyenede ke utom emi ọkọn̄ọ akamba akamba ke edu nnyịn. Nte nnyịn imowụt ntotụn̄ọ esịtekọm ke kpukpru se Jehovah anamde ọnọ nnyịn? Nte nnyịn imọkọri ima inọ Jehovah ke esịt nnyịn oro onụkde nnyịn ndinam kpukpru se ikemede ke utom esie? Nditie n̄kere mme edidiọn̄ oro nnyịn idarade idahaemi ọkọrọ ye se Jehovah ọn̄wọn̄ọde ndinam ke ini iso an̄wam nnyịn ndikọri ima nnọ Andibot nnyịn. Utọ ima oro onụk nnyịn ndinam n̄kpọ—ndisịn ifịk nnyụn̄ mbuana ofụri ini ke utom edikwọrọ Obio Ubọn̄ ke udomo oro mme idaha nnyịn ẹyakde. Ifịk nnyịn ọyọnọ uyarade ima oro imade Jehovah ye mbọhọidụn̄ nnyịn.—Mark 12:30,31.
6 Nnyịn iwụt nte idade n̄kpọ ke ọsọnurua ebe ke se nnyịn idade enye inam ye se itịn̄de iban̄a enye. Nte nnyịn imenen̄ede ida ifet nnyịn ndikwọrọ mban̄a Obio Ubọn̄ ke ọsọn̄urua n̄kpọ? Nte nnyịn imọsọn̄ọ ikpono itieutom nnyịn? Nte nnyịn imebiere ndisọn̄ọ nyịre ke akpan utom emi kpa ye ubiọn̄ọ? Edieke nnyịn idade utịbe utịbe ifetutom emi ke ata ọsọn̄urua n̄kpọ, nnyịn iditreke-tre ndisịn ifịk nnyụn̄ nnam ke ofụri esịt.—2 Cor. 4:1, 7.