Mme Mbono District Nnyịn—Okopodudu Usụn̄ Ndinam Ẹfiọk Akpanikọ
1. Mme akpanikọ ewe oro ẹdude ke ikọ Abasi ke mme usọrọ eke ini ke ini ẹkesinọ nditọ Israel ifet nditie n̄kere nnyụn̄ nneme mban̄a?
1 Nditọ Israel eset ẹma ẹsisop idem ikata ke isua man ẹnịm mme usọrọ eke ini ke ini. Okposụkedi emi ẹkesiyomde irenowo kpọt ẹka mme usọrọ emi, ediwak ini, ofụri ubon ẹma ẹsika Jerusalem man ẹkedụk mme inem inem mbono emi. (Deut. 16:15, 16) Mme utọ edinam oro ẹma ẹsinọ mmọ ifet nditie n̄kere nnyụn̄ nneme mban̄a mme akpanikọ oro ẹdude ke ikọ Abasi. Nso idi ndusụk akpanikọ emi? Kiet edi nte ke Jehovah edi ima ima Andinọ emi esitatde ubọk. (Deut. 15:4, 5) Efen edi nte ke ẹkeme ndiberi edem ke enye ndinọ ukpeme ye ndausụn̄. (Deut. 32:9, 10) Nditọ Israel ẹma ẹkeme n̄ko nditi nte ke mmimọ idi mbon oro ikerede enyịn̄ idian Jehovah, ntre ke ana mmimọ inen̄ede iwụt ke imasan̄a ke nnennen usụn̄ esie. (Deut. 7:6, 11) Kpasụk ntre mfịn, imesibọ ufọn ito mme mbono district nnyịn eke isua ke isua.
2. Didie ke ndutịm mbono district edinam akpanikọ etetịm an̄wan̄a nnyịn?
2 Ndutịm Emi Anam Akpanikọ Etetịm An̄wan̄a: Ke mme mbono district nnyịn, imesinyene mme utịn̄ikọ, drama, nnamn̄wụt, ye mme ndụn̄ọde oro ẹsinamde akpanikọ Bible ẹtetịm ẹn̄wan̄a nnyịn. (John 17:17) Ẹnanam ẹkese utom ẹben̄e akamba mbono emi edide. Esop Jehovah ke odiomi edinam oro ẹtịmde akpan akpan man ẹse ẹban̄a mme idaha oro ẹdemerede ke ofụri ererimbot idahaemi. (Matt. 24:45-47) Ndi ọdọn̄ fi ndikụt nnyụn̄ n̄kop se ẹdinemede?
3. Nso ke ikpanam man ibọ ufọn ito ndutịm emi?
3 Nte ededi, nnyịn iyenen̄ede ibọ ufọn edieke idụkde ofụri usen ita oro inyụn̄ itịm ikpan̄ utọn̄. Edieke mûtịn̄ke kan̄a unọ eteutom fo ete ọnọ fi ini odụk mbono oro, mbọk nam ntre. Kụt ete ke emede idap ọfọn kpukpru okoneyo ke ama ọkọnyọn̄ mbono mbak udûde ke ini edinam akade iso. Ediwak owo ẹsikụt ẹte ke ndiwụk enyịn nse etịn̄ikọ nnyụn̄ n̄wet n̄kpọ mbio mbio ẹsin̄wam mmimọ ikpan̄ utọn̄. Kûyak fon fo m̀mê pager etịmede fi m̀mê mbon en̄wen. Fep nditịn̄ ikọ, ndinọ etop ke fon, ndidia udia, m̀mê ndin̄wọn̄ n̄kpọ ke ini edinam akade iso.
4. Didie ke mme ete ye eka ẹkeme ndin̄wam nditọ mmọ ẹbọ ufọn ke ini mbono?
4 Ke mme isua Sabbath, emi mme ubon ke Israel ẹkesisopde idem man ẹkop nte ẹkotde Ibet ke ini Usọrọ Mme Ataya, “nditọwọn̄” mmọ ẹma ẹsitiene ẹdu do “man mmọ ẹkpan̄ utọn̄, man mmọ ẹnyụn̄ ẹkpep n̄kpọ.” (Deut. 31:12) Ẹsinọ nsịnudọn̄ ndikụt nte mme ubon ẹtiede ọtọkiet ke mbono, nte n̄kpri nditọ mîdehe idap, edi ke ẹtịm ẹkpan̄ utọn̄! Ntak emi mbufo mîdaha kpukpru mbubreyo itie idụn̄ọde inyụn̄ ineme mme akpan n̄kpọ oro ẹkewetde, emi ẹkenen̄erede ẹma? “Ndisịme ido eyịre ke esịt eyenọwọn̄,” ntre ọkpọfọn mme ete ye eka ẹse n̄kpri nditọ mmọ enyịn, ọkọrọ ye mbon oro ẹdide uyen, ke ini nduọkodudu uwemeyo ye ke ini mmọ ẹdude ke ufọkidụn̄, utu ke ‘ndiyak usụn̄ mmọ nnọ mmọ.’—N̄ke 22:15; 29:15.
5. Didie ke eti edu uwem nnyịn ke adan̄aemi idude ke ufọkisen edinam akpanikọ enyene uku?
5 Eti Edu Uwem Nnyịn Anam Akpanikọ Enyene Uku: Eti edu uwem nnyịn ke ini idude ke obio mbono anam akpanikọ enyene uku. (Titus 2:10) Mme anamutom ufọkisen ẹsifiọk isenowo oro ẹnịmde mbet ufọkisen, ẹnyenede ime ẹnyụn̄ ẹfọnde ido ye mbonutom. (Col. 4:6) Ke ini mme owo ke n̄kọk itieutom ẹkekade ndibọ ufọkisen isua oko, andise mban̄a unyam n̄kpọ ke ufọkisen oro ama ọdọhọ mmọ ete: “Imesima mbon mbufo ẹdi ufọkisen nnyịn koro mmọ ẹdi nti owo. Mmọ ẹsinyene eti uwem, ẹfọn ido, ẹkpono mbonutom nnyịn ẹnyụn̄ ẹtịm n̄kpọ ke ufọkisen nnyịn ẹkama.”
6. Didie ke ikpanam akpanikọ enyene uku ke nte isịnede n̄kpọ ke adan̄aemi idude ke obio mbono?
6 Ke ini idiande kad idiọn̄ọ mbono nnyịn, emi esinam ẹdiọn̄ọ ke imenyene mbono, anam nditọete ẹdiọn̄ọ nnyịn, onyụn̄ ọnọ mbon oro ẹkụtde nnyịn ikọ ntiense. Mme owo ke obio mbono ẹyekụt ke mbon oro ẹdiande kad idiọn̄ọ ẹsịne n̄kpọ ediye ediye ye ke usụn̄ oro owụtde iso o-bụt, idịghe nsuahade nsuahade ye ke usụn̄ oro osion̄ode owo ndido idem owụt nte mbon ererimbot ẹsisịnede. (1 Tim. 2:9, 10) Ntem ana ikpeme nte isịnede n̄kpọ ye nte ikamade idem ke adan̄aemi idude ke obio mbono ye ke ini emi ikade ufọkisen. Idiwụtke uku ndisịne ibio ọfọn̄ukot ye polo n̄ka mme ebiet emi. Idem ọkpọkọm ẹnịm mbono ke Ufọk Mbono m̀mê ke Ufọkmbono Obio Ubọn̄ oro ẹsidade ẹnịm mbono n̄ko, inyene ndisịne n̄kpọ uku uku. Edieke iyomde ndisịne ọfọn̄ efen n̄ka itie unyamudia ke mbono ama akasuana, inyene nditi ke isụk idedi mme andidụk mbono ikponyụn̄ isịneke n̄kpọ nsuahade nsuahade.
7. Nso idi usụn̄ kiet oro ikemede ndidiana kiet ye nditọete nnyịn ke ini akamba mbono emi?
7 Ke mme usọrọ eke ini ke ini, nditọ Israel ẹma ẹsikop inemesịt ndidu ọtọkiet ye ekemmọ mme andituak ibuot emi ẹketode mme ikpehe en̄wen ke idụt oro ye nsio nsio idụt efen ẹdi, ndien emi ama esinam mmọ ẹdiana kiet. (Utom 2:1, 5) Ke ini mbono district, mme owo ẹsikụt edidianakiet oro odude ke otu nditọete Christian. Inem inem ikpehe paradise eke spirit nnyịn emi esiye mbon oro ẹkụtde nnyịn. (Ps. 133:1) Utu ke ndikpọn̄ itie mbono n̄ka n̄kedep udia, ọkpọfọn ida mfefere udia idi itie mbono man ikeme ndisobo nnyụn̄ nneme nneme ye nditọete nnyịn iren ye iban oro ẹtiede ẹkpere nnyịn.
8. Ntak emi ikpọnọde idem nnyịn unyịme unyịme ndinam utom edieke ikemede?
8 Nte ẹnamde kpukpru n̄kpọ ke nde ke nde ke mme ikpọ mbono nnyịn esitụk mme andida nse, akpan akpan ke ini mmọ ẹfiọkde ke mme anam utom oro ẹnọ idem mmọ unyịme unyịme ndinam kpukpru utom oro. Ndi emekeme ‘ndinọ idemfo unyịme unyịme’ ndinam utom ke akamba mbono? (Ps. 110:3) Ediwak ini, ofụri ubon ẹsinọ idem unyịme unyịme ndinam utom man ẹkpep nditọ mmọ ndisinam ntre. Edieke afo esikopde bụt, ndinam utom ke akamba mbono ayanam fi ekeme ndimehe ye mme andidụk mbono eken. Eyenete an̄wan kiet ọkọdọhọ ete: “Mbonubon nnyịn ye owo ifan̄ kpọt ke n̄kọdiọn̄ọ ke itie mbono oro, edi ke mma n̄ketiene nnịm ebiet asana, mma mmehe ye ediwak nditọete nnyịn iren ye iban. Ama enem mi tutu!” Nditat esịt nnyịn nnam ufan ye mbon en̄wen ke ndinam utom ke akamba mbono ayanam nnyịn inen̄ede ikop idatesịt. (2 Cor. 6:12, 13) Edieke edide akananam unamke utom unyịmesịt, bụp mbiowo se akpanamde man odot nditiene nnam.
9. Didie ke idikot mme owo ẹdidụk mbono emi?
9 Kot Mme Owo Ẹdikop Akpanikọ: Urua ita mbemiso mbono nnyịn ọtọn̄ọ, iyanam ubịnikọt ndikot mme owo ẹditiene nnyịn ẹdụk mbono emi kpa nte isinamde ke mme isua emi ẹbede. Mme esop ẹyedomo ukeme ndinọ adan̄a ediwak owo nte ekekeme n̄wedikot ke efakutom mmọ. (Se ekebe oro “Didie ke Idinọ Mme Owo N̄wedikot?”) Ẹkpenyene ndida mme n̄wedikot oro ẹyọhọde ẹsụhọ ndi itie mbono. Mme andidụk mbono ẹyeda mmọ ẹnam n̄kpọ ke ini ẹnọde ikọ ntiense ido nneme ke obio mbono.
10. Bụk mme ifiọkutom oro ẹwụtde ke n̄wedikot oro isinọde kpukpru isua esinyene ufọn.
10 Ndi mme owo ẹsiyere ikot oro ẹsinọde kpukpru isua mi? Ke mbono kiet, adaidaha ama ọnọ ebe ye n̄wan kiet itie. Mmọ ẹma ẹdọhọ enye ke mmimọ ima ibọ n̄wedikot inyụn̄ “ikere ke edinam oro eyenem.” Mmọ ẹma ẹwat se iwakde ibe kilomita 320 ẹka ẹkedụk mbono oro! Ke isan̄ efen, eyenete an̄wan emi ọkọkwọrọde ikọ ke ufọk ke ufọk ama ọnọ eren kiet emi enye ekekerede ke enye akpama ndidụk mbono oro, n̄wedikot. Ntre enye ama ada ini eneme se idude ke n̄wedikot oro ye enye. Ke usen ifan̄ ẹbede, ke ini eyenete an̄wan emi odụkde mbono, enye ama okụt eren oro ye ufan esie kiet nte ẹkamade kiet ke otu mbufa n̄kpọ oro ẹkesiode ke mbono oro!
11. Ntak emi edidụk mbono district eke isua ke isua edide akpan n̄kpọ?
11 Mme usọrọ eke ini ke ini ẹkedi ima ima ndutịm oro Jehovah akanamde man an̄wam nditọ Israel “ẹnam n̄kpọ esie ke edinen ido ye ke akpanikọ.” (Josh. 24:14) Kpasụk ntre, nnyịn ndidụk mme mbono district kpukpru isua esin̄wam nnyịn ‘ika iso isan̄a ke akpanikọ’ ndien emi edi ata akpan n̄kpọ ke utuakibuot nnyịn. (3 John 3) Jehovah akpakam ọdiọn̄ ukeme oro kpukpru mme ama akpanikọ ẹsịnde ndidụk nnyụn̄ mbọ ufọn ọyọhọ ọyọhọ!
[Se ẹwetde ke ikpọ abisi ke page 2]
Eti edu uwem nnyịn ke ini idude ke obio mbono anam akpanikọ enyene uku
[Se ẹwetde ke ikpọ abisi ke page 3]
Urua ita mbemiso mbono nnyịn ọtọn̄ọ, iyanam ubịnikọt ndikot mme owo ẹditiene nnyịn ẹdụk mbono emi
[Ekebe ke page 2-4]
Se Ẹtide Owo Ẹban̄a Mbono District Eke 2012
◼ Mme Ini Ndutịm: Ke usen mbita emi, ndutịm editọn̄ọ ke usenubọk ke n̄kanika ebede 9 ke minit 20. Ke ini ẹtọtde ẹte ke ẹmọn̄ ẹtọn̄ọ ndibre ikwọ, kpukpru nnyịn ikpenyene ndidu ke itie nnyịn man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit ition ndimia n̄kanika ition mbubreyo; ndien ke Sunday, ke ayakde minit 20 ndimia n̄kanika 4 mbubreyo.
◼ Itie Ubon N̄kpọisan̄: Ke kpukpru an̄wa mbono mme adaidaha ẹyedu ndiwụt mme owo ebiet ndibon n̄kpọisan̄. Mbọk ẹtiene ndausụn̄ mbon oro ẹsede ẹban̄a nte ẹbonde n̄kpọisan̄.—1 Cor. 13:4, 5.
◼ Edimụm Itie Nnịm: N̄kukụre mbon oro ẹkemede ndimụm itie nnịm nnọ ẹdi mbon oro ẹdụn̄de ye nnyịn m̀mê mbon oro ẹsan̄ade ye nnyịn ke n̄kpọisan̄ nnyịn, m̀mê mbon oro nnyịn isụk ikpepde mmọ Bible.—1 Cor. 13:5.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itie mbono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt nsịn ke itie mbono kaban̄a utom ofụri ererimbot. Ẹkpenyene ndiwet “Watch Tower Society,” nte ikọ ita, ke babru ubọ okụk ke ban̄k, oro ẹnọde.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itie mbono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ oro mme ọnọ usọbọ emi ẹdotde, emi ẹdude ke itie mbono ẹkemede ndise nte idem esie ọdiọkde eketre nnyụn̄ nnọ un̄wam.
◼ Ibọk Usọbọ: Edieke edide afo emenyene san̄asan̄a ibọk oro esidade, mbọk kụt ete ke amakama enye awak ekem, koro owo mîdinyeneke orụk ibọk emi ke itie mbono. Ẹkpenyene ndiduọn̄ọ abiabon ye n̄kpọ ukịmibọk mbon oro ẹdọn̄ọde ikịm an̄wan n̄kụhọ ke ebiet oro ẹsiduọn̄ọde mme n̄kpọ oro ẹkemede ndinọ owo unan utu ke ndidọn̄ mmọ ke n̄kpọ udọn̄ mbio itie mbono ye eke itieidụn̄.
◼ Ikpaukot: Ọkpọfọn afo esịne ukeuke ikpaukot oro ekemde fi, emi ediyakde fi asan̄a ifụre ifụre mbak ududa unan.
◼ Ufuọn̄: Oyowụt mfọnido edieke iduọkde esisịt m̀mê itrede-tre ndiduọk perfume emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—1 Cor. 10:24.
◼ Babru Please Follow Up (S-43): Ẹkpenyene ndida babru Please Follow Up nnọ ntọt mban̄a owo ekededi emi owụtde udọn̄, oro ẹkwọrọde ikọ ẹnọ ke ido nneme ke ini mbono. Mme asuanetop ẹkpenyene ndida idem babru emi kiet m̀mê iba ndi itie mbono. Ẹmekeme ndiyak babru oro ẹma ẹkewet n̄kpọ ẹyọhọ nnọ Itieutom Unọ N̄wed mîdịghe ẹyak ẹnọ ewetn̄wed esop mbufo ke ẹma ẹkenyọn̄ọ mbono.—Se Utom Obio Ubọn̄ Nnyịn eke May 2011, page 3.
◼ Itie Unyamudia ye Mme Anyam N̄kpọ: Yak nti edu fo ọnọ enyịn̄ Jehovah ubọn̄. Iwụtke eti ibuot ndikedep n̄kpọ ke ini edinam osụk akade iso.
◼ Mme Ufọkidụn̄: Edide nnyịn idụn̄ ke dọmitri m̀mê ke ufọkisen, ọkpọfọn iwụt mbun̄wụm spirit ke ini inamde n̄kpọ ye mbon Itieutom Unọ Ufọkidụn̄ m̀mê mbonutom ufọkisen. (Gal. 5:22, 23) Mmọ ẹse ẹban̄a ata ediwak isenowo. Ntre mmọ ẹyema edieke ifọnde ido, inyene ime, inyụn̄ inam n̄kpọ ke eti ibuot. Nnyịn imekeme ndiwụt edikere mban̄a ke mme ikpehe oro ẹtienede mi:
(1) Mbọk ẹkûbọ mme ubet ẹwak ẹkan se mbufo ẹyomde, ẹkûnyụn̄ ẹyak ẹdụn̄ ke ubet ẹwak ẹkan ibat oro ẹdọhọde ẹdụn̄.
(2) Kûdọhọ ke iyomke ubet ufọkisen oro ẹkenịmde ẹnọ fi ibọhọke n̄kpọ etịbe, nyụn̄ sọsọp sian mbonutom ufọkisen edieke n̄kpọ etịbede.—Matt. 5:37.
(3) Ẹtem udia n̄kukụre ke mme ebiet oro ẹdọhọde ẹtem. Edieke itemde udia ke ini edinam osụk akade iso, emi ediwọrọ ke nnyịn iwụtke esịtekọm iban̄a mme n̄kpọ eke spirit.—Luke 10:38-42.
(4) Mme ete ye eka ẹkpenyene ndikpeme nditọ mmọ kpukpru ini ke ufọkisen, ke dọmitri, m̀mê ke itie ekededi.
(5) Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄. Ẹdụn̄ ke ebiet oro ẹnọde mbufo. Nditọete iren ikpenyeneke ndidu tutu eyo ọsọn̄ m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo.
(6) Edieke mfịna odude ke ebiet oro odụn̄de, kụt ete ke ọmọsọsọp asian Itieutom Unọ Ufọkidụn̄ ke ini osụk odude ke an̄wa mbono man mmọ ẹn̄wam fi.
◼ Utom Unyịmesịt: Owo ekededi oro akpamade ndinọ idem unyịme unyịme ekpenyene ndika Itieutom Utom Unyịmesịt ke mbono. Nditọwọn̄ oro mîyọhọke kan̄a isua 16 ẹkeme ndinam utom ye ete m̀mê eka m̀mê owo oro akamade mmọ, mîdịghe ẹnam ye akwa owo emi ete m̀mê eka m̀mê owo oro akamade mmọ enyịmede.
[Ekebe ke page 4]
Didie ke Idinọ Mme Owo N̄wedikot?
Man ikeme ndikụre efakutom nnyịn, oyoyom inam nneme nnyịn edi ibio ibio. Imekeme ndidọhọ ite: “Mmọkọm-o. Nnyịn itiene ibuana ke ubịnikọt ofụri ererimbot ndisuan n̄wedikot emi. Okwo edi emi. Oyokụt ntọt efen efen ke n̄wedikot emi.” Nam nneme fo esịne ufiop. Ke ini ẹdemede n̄wedikot ke mme utịturua, ẹkpenyene ndinọ mme magazine n̄ko ke ini odotde ndinam ntre.