Da Mme Tract Suan Eti Mbụk
1. Didie ke ikọt Abasi ẹsida mme tract ẹnam n̄kpọ?
1 Ebịghi ikọt Jehovah ẹketọn̄ọ ndida mme tract oro ẹnemede n̄kpọ ẹban̄a Bible nsuan eti mbụk. Ke 1880, C. T. Russell ye mme nsan̄a esie ẹma ẹtọn̄ọ ndisio se ẹkekotde Bible Students’ Tracts, ẹkesinyụn̄ ẹnọ mbon oro ẹsikotde Enyọn̄-Ukpeme ẹte ẹdeme ẹnọ mbon en̄wen. Ẹkeda tract ke akpan n̄kpọ, oro anam ke 1884, ke ini C. T. Russell ekesịnde enyịn̄ n̄ka oro ẹdidade ẹtat utom Obio Ubọn̄ ke n̄wed—kpa n̄ka emi ibet enyịmede emi owo mîdaha inam udori—ẹma ẹsịn “tract” ke enyịn̄ emi. Ẹkebem iso ẹkot n̄ka emi Zion’s Watch Tower Tract Society, edi idahaemi ẹkot enye Watch Tower Bible and Tract Society of Pennsylvania. Etisịm 1918, ibat tract oro Nditọ Ukpepn̄kpọ Bible ẹkesuande ama akan miliọn 300. Mme tract ẹsụk ẹdedi eti n̄kpọutom oro idade inọ ikọ ntiense.
2. Ntak emi tract enyenede ufọn ntre?
2 Ntak Enyenede Ufọn Ntre: Tract eye onyụn̄ odụk owo enyịn. Mbio mbio etop oro ẹsịnede ke tract ẹsidemede owo udọn̄ ẹnyụn̄ ẹkpep owo n̄kpọ. Mme enyeneufọk oro mîkpamaha magazine m̀mê n̄wed ẹkeme ndima tract. Ẹkeme ndinọ tract mmemmem mmemmem, idem mbufa mme asuanetop ye nditọwọn̄ ẹkeme ndinọ enye. N̄ko n̄ko, tract ekpri onyụn̄ emem nnyịn utom ndikama.
3. Bụk ifiọkutom oro afo enyenede m̀mê enye oro odude ke n̄wed nnyịn emi owụtde ufọn tract.
3 Ediwak owo ẹkebem iso ẹkụt akpanikọ ke ini ẹkekotde tract. Ke uwụtn̄kpọ, n̄wan kiet ke Haiti ama okụt kiet ke otu tract nnyịn ke isọn̄ ke efak. Enye ama emen tract emi okot onyụn̄ ọdọhọ ete, “Mmokụt akpanikọ!” Nte ini akade, enye ama aka Ufọkmbono Obio Ubọn̄, ọtọn̄ọ ndikpep Bible onyụn̄ ana baptism. Odudu Ikọ Abasi ke tract oro akanam enye anam kpukpru emi.
4. Nso ke iduak ndinam ke ọfiọn̄ oro idinọde tract?
4 Ke Ini Ikwọrọde Ikọ ke Ufọk ke Ufọk: Sia mme tract ẹdide nti n̄kpọutom ndida nnọ ikọ ntiense, ẹyesinọ mmọ ke ndusụk ọfiọn̄, ọtọn̄ọde ke November. Uduak nnyịn idịghe sụk ndinọ mme tract, edi iyom ndida mmọ ntọn̄ọ nneme. Edieke owo owụtde udọn̄ ke akpa ini oro iwahade m̀mê ke ini oro ifiakde ika, imekeme ndida n̄wed Bible Ekpep m̀mê n̄wed en̄wen oro isidade ikpep mme owo n̄kpọ iwụt enye nte isinịmde ukpepn̄kpọ Bible. Didie ke ikpọnọ tract ke ini ikwọrọde ikọ ke ufọk ke ufọk? Tract edi nsio nsio, ntre oyom imehe ye mbon oro idinọde mme owo.
5. Didie ke ikpọnọ tract ke ini ikwọrọde ikọ ke ufọk ke ufọk?
5 Akpana nneme nnyịn ekem ye efakutom nnyịn ye tract oro idinọde. Imekeme nditọn̄ọ nneme ye enyeneufọk ke ndiyak tract nnọ enye. Ediye ikpaedem tract ekeme ndidemede enye udọn̄. Mîdịghe imekeme ndiwụt enye ediwak tract inyụn̄ iyak enye emek enye emi enye amade. Ke ini inamde utom ke efakutom emi mme owo mîsimaha ndiberede usụn̄ ufọk mmọ, imekeme ndikama tract ke usụn̄ oro enyeneufọk edikemede ndikụt ikpaedem esie, mîdịghe, imekeme ndidọhọ ke iyom ndisịn n̄kpọ ke idak enyịnusụn̄ esie nnọ enye man enye etịn̄ ekikere esie ọnọ nnyịn. Edieke ibuotikọ tract oro edide mbụme, imekeme ndidọhọ enye etịn̄ se enye ekerede aban̄a mbụme oro. Mîdịghe imekeme ndibụp enye mbụme oro iketịmde, emi edidemerede enye udọn̄ onyụn̄ anam ikeme nditọn̄ọ nneme. Ekem, imekeme ndikot ikpehe ke tract oro inọ enyeneufọk, ituak ida ke mme ebiet oro ẹbụpde mbụme inyụn̄ idọhọ enye etịn̄ ekikere esie. Imekeme ndikot mme akpan itie N̄wed Abasi ke Bible. Ke ima ikeneme ndusụk n̄kpọ ke tract oro, imekeme nditre nneme do inyụn̄ inam eti ndutịm ndifiak n̄ka. Edieke edide esop mbufo ẹsinịm n̄wed ẹnọ mbon oro mîsidụhe ke ufọk, imekeme ndinịm tract ke ebiet oro mbon en̄wen mîdikwe inọ enyeneufọk oro mîdụhe ke ufọk.
6. Didie ke ikpada tract inam n̄kpọ ke ini inọde ikọ ntiense ke efak?
6 Ke Ini Inọde Ikọ Ntiense ke Efak: Ndi akanam ọmọnọ tract ke ini ọnọde ikọ ntiense ke efak? Ndusụk mbon oro ẹsisan̄ade ẹbe ẹsitie itọk itọk isinyụn̄ imaha ndida nneme nneme ye nnyịn. Ekeme ndisọn̄ ndifiọk m̀mê mmọ ẹnyene udọn̄ ke Ikọ Abasi. Utu ke ndinọ mmọ mme magazine ndondo emi ke adan̄aemi mûfiọkke m̀mê mmọ ẹyekot m̀mê idikotke, nọ mmọ tract. Sia ikpaedem tract eyede, se ẹwetde ke esịt ẹnyụn̄ ẹdide mbio mbio, emi ekeme ndinam mme owo ẹkot enye ke ini mmọ ẹnyenede esisịt ini. Nte ededi, edieke mmọ mîtiehe itọk itọk, imekeme ndineme ndusụk n̄kpọ ke tract ye mmọ.
7. Bụk mme ifiọkutom oro ẹwụtde nte ẹkpedade tract ẹnam n̄kpọ ke ini ẹnọde ikọ ntiense ido nneme.
7 Ke Ini Inọde Ikọ Ntiense Ido Nneme: Emem utom ndida tract nnọ ikọ ntiense ke ido nneme. Eyenete eren kiet esisịn ibat ibat tract ke ekpatọfọn̄ esie ini ekededi oro enye ọkpọn̄de ufọk esie. Ke ini enye osobode ye owo, utọ nte owo emi anyamde n̄kpọ ke ufọkurua, enye ọyọdọhọ owo oro ke iyom ndinọ enye n̄kpọ okot onyụn̄ ọnọ enye tract. Ke ini ebe ye n̄wan ẹkekade ndise ediye ebiet kiet, mmọ ẹma ẹfiọk ke mmimọ iyosobo mme owo oro ẹtode nsio nsio idụt. Ntre mmọ ẹma ẹmen ekpri n̄wed Nations ye ediwak tract ke nsio nsio usem. Ekem, ke ini mmọ ẹkopde nte owo emi anyamde n̄kpọ ke mbenusụn̄ m̀mê owo emi etiede ekpere mmọ ke itie ubọ nduọkodudu m̀mê ke itie unyamudia esemde usem en̄wen, mmọ ẹyenọ enye tract ke usem esie.
8. Didie ke tract ebiet n̄kpasịp?
8 “Suan N̄kpasịp Fo”: Ẹkeme ndimen tract ndomo ye n̄kpasịp. Ọtọin̄wan̄ esisuan n̄kpasịp esie ke kpukpru ebiet koro enye mîfiọkke enye emi editịbede onyụn̄ ọkọri. Ecclesiastes 11:6 ọdọhọ ete: “Suan n̄kpasịp fo ke usenubọk ndien kûyak ubọk fo ọduọk odudu tutu esịm mbubreyo; koro afo mûfiọkke ebiet oro emi edikụtde unen, edide mi m̀mê ko, m̀mê mmọ mbiba ẹdifọn ukem ukem.” Mmọdo, ẹyak ida eti n̄kpọutom emi ‘isuan ifiọk.’—N̄ke 15:7.
[Se ẹwetde ke ikpọ abisi ke page 3]
Sia mme tract ẹdide nti n̄kpọutom ndida nnọ ikọ ntiense, ẹyesinọ mmọ ke ndusụk ọfiọn̄, ọtọn̄ọde ke November