Da Mme Prọfet Nte Uwụtn̄kpọ—Micah
1. Nso mbụme ke ikere ke Micah ama esibụp, edi nte se enye eketịn̄de ama etịbe?
1 ‘Utịt idiọk editịm n̄kpọ emi edidi ini ewe?’ Etie nte prọfet Micah ama esibụp ukem mbụme emi nte enye okosụk atan̄ade etop ubiereikpe oro Jehovah okoyomde ndibiere nnọ obio ubọn̄ Israel ye Judah. Kpa ye oro se enye eketịn̄de ama etịbe. Se Jehovah eketịn̄de aban̄a Samaria ama osu ke isua 740 M.E.N., ke eyouwem Micah. (Mic. 1:6, 7) Nte ini akakade, ẹma ẹsobo Jerusalem ke isua 607 M.E.N. (Mic. 3:12) Didie ke nnyịn ikeme ndikpebe Micah nte nnyịn isụk ibetde ini emi Jehovah edibierede ikpe ke eyo nnyịn?
2. Didie ke ikpenyene ime ibet usen Jehovah, ndien ntak-a?
2 Nyene Ime: Micah ekewet ete: “Amaedi ami, nyodori enyịn ke Jehovah. Nyenyene edu editie mbet Abasi edinyan̄a mi.” (Mic. 7:7) Edi Micah ikọbọpke-bọp ubọk itie ntre ibet utịt edi. Enye ama esịn ifịk anam utom nte prọfet Jehovah. Nte nnyịn n̄ko itiede ibet usen Jehovah, ana idu ‘edisana uwem’ inyụn̄ inam “mme edinam uten̄e Abasi.” (2 Pet. 3:11, 12) Jehovah ndinyene ime anam mme owo ẹnyene ini ndikabade esịt. (2 Pet. 3:9) Ntem, ana inam se Abasi ọdọhọde nnyịn inyụn̄ ikpebe mme prọfet ke ndinyene ime.—Jas. 5:10.
3. Ntak emi ikpeben̄ede Jehovah ọnọ nnyịn edisana spirit esie?
3 Beri Edem ke Odudu Oro Jehovah Ọnọde: Kpa ye oro utom Micah mîkememke, enye ekeberi edem ke odudu oro Jehovah ọnọde enye ada anam utom emi. (Mic. 3:8) Ntak edi oro Ikọ Abasi ọdọhọde nnyịn iberi edem ke Jehovah, sia enye ọyọnọ nnyịn odudu inam utom esie. Enye ọnọ mbon oro ẹkpade mba odudu man mmọ ẹkeme ndida nnam utom ukara Abasi. (Ps. 84:5, 7; Isa. 40:28-31) Ndi akanam Abasi ọnọ fi odudu man ada anam utom esie? Ndi emesiben̄e Jehovah ada edisana spirit esie ọnọ fi odudu?—Luke 11:13.
4. Nso eti n̄kpọ ke ikeme ndikpep nto Micah?
4 Micah akada utom Abasi nte akakan n̄kpọ ke ofụri eyouwem esie. Enye ama ebiere ndika iso nnam akpanikọ kpa ye oro mbon obio mmọ ẹkesidude idiọk uwem. Nnyịn n̄ko imesisobo idomo kpukpru usen. Ntre, ẹyak nnyịn isọn̄ọ ibiere ‘ndisan̄a ke enyịn̄ Jehovah Abasi nnyịn ke nsinsi nsinsi.’—Mic. 4:5.