Mme Usụn̄ Unyene Nneme

Nditọn̄ọ Ukpepn̄kpọ Bible ke Akpa Saturday ke February

“Mme owo ẹnyene nsio nsio ekikere ẹban̄a Bible mfịn. Ndusụk owo ẹnịm ke Bible edi Ikọ Abasi, mbon en̄wen ẹdọhọ ke enye onyụn̄ edi ikpîkpu n̄wed. Nso ke afo ekere aban̄a Bible?” Bet ibọrọ. Wụt enye edem Enyọn̄-Ukpeme February 1, neme se idude ke idak akpa mbụme oro ye enye nyụn̄ kot ke nsụhọde n̄kaha kiet ke otu itie N̄wed Abasi oro ẹsiakde ẹsịn do. Nọ mme magazine, nyụn̄ diomi ndifiak n̄ka n̄kọbọrọ mbụme oro etienede.

Enyọn̄-Ukpeme February 1

“Ediwak owo ẹkpema ndikụt nte ekọn̄ etrede. Ndi emekere ke ẹyekeme ndinyene emem ke ofụri ererimbot emi? [Bet ibọrọ.] Kop se N̄wed Abasi ọn̄wọn̄ọde mi. [Kot Psalm 46:9.] Se iketịbeke ke ini akpa ekọn̄ ererimbot ye ke oro ebede anam itịm inịm ke ibịghike Abasi ayanam se ẹtịn̄de mi onyụn̄ etre ekọn̄ ke nsinsi. Magazine emi etịn̄ nte enye edinamde emi.”

Ẹdemede! January–February

“Nnyịn iwaha edem fo man ineme iban̄a mfịna kiet oro ediwak owo ẹnyenede. Etie nte mme owo inyeneke ini ekem ndinam kpukpru n̄kpọ emi mmọ ẹkpemade. Ndi afo ekere ke ntak edi koro nnyịn imenyene ata ediwak n̄kpọ ndinam m̀mê edi koro nnyịn imesibiat ini ikaha ke n̄kpọ? [Bet ibọrọ.] Ediwak owo ifiọkke ke Bible ọdọn̄ọ nti item oro ẹkemede ndin̄wam nnyịn ifiọk nte ikpadade ini oro inyenede inam n̄kpọ. Se item kiet mi. [Kot Philippi 1:10a.] Magazine emi etịn̄ n̄kpọ inan̄ oro an̄wamde ediwak owo ẹda ini mmọ ẹnam n̄kpọ ọniọn̄ ọniọn̄.”