Ndifori Usọ Nnyịn ke An̄wautom—Nte Ikpetịmde Ntọn̄ọikọ Nnyịn

Ntak Emi Edide Akpan N̄kpọ: Edieke ntọn̄ọikọ nnyịn mîdemekede owo udọn̄, owo oro ekeme nditre nneme nnyịn. Ntre ediwak mme asuanetop ẹda ntọn̄ọikọ mmọ nte ata akpan ikpehe ke nneme mmọ. Okposụkedi emi ẹsinọde nnyịn usụn̄ unyene nneme ke Utom Obio Ubọn̄ Nnyịn ye ke Nte Ẹkpetọn̄ọde Ẹnyụn̄ Ẹkade Iso ke Nneme Bible, owo isiwetke kpukpru se ikpetịn̄de man ayak nnyịn ikpụhọde ntọn̄ọikọ oro nte iyomde. Idem ọkpọkọm ẹnọ kpukpru se ikpetịn̄de, mme asuanetop ẹkeme ndikpụhọde nneme oro mîdịghe ẹtịm enye ke usụn̄ oro mmọ ẹmade. Nnyịn iyenen̄ede ikụt unen edieke ibemde iso itịm ntọn̄ọikọ nnyịn utu ke nditịn̄ se ededi oro odụkde nnyịn ibuot ke ini isobode ye owo.—N̄ke 15:28.

Nte Ikpanamde:

Mek ibuotikọ fo. Ibuotikọ fo ekpenyene ndikem ye n̄wed oro oyomde ndinọ, enye n̄ko ekpenyene ndidemede udọn̄ mbon oro ẹdude ke efakutom mbufo.
Nen̄ede kere ban̄a akpa ikọ ifan̄ oro oyomde nditịn̄ ke ama ọkọkọm owo ama. Emekeme nditọn̄ọ ke ndidọhọ: “Nnyịn idi edem mbufo koro . . . ,” “Ediwak owo ẹma ndifiọk n̄kpọ mban̄a . . . ,” “Nnyịn ikpama ndikop se ekerede aban̄a . . . ,” mîdịghe da usụn̄ en̄wen tọn̄ọ. Mbio mbio mmemmem ikọ ẹsikam ẹfọn ẹkan. Ndusụk mme asuanetop ẹsima ndimụm ntọn̄ọikọ mmọ ndọn̄ ke ibuot.
Tịm mbụme oro edinamde owo oro afo osobode etiene esịn uyo ke nneme. (Matt. 17:25) Fiọk ete ke ekeme ndidi enyene se enye ekekerede mbemiso afo awahade, ntre mbụme fo ikpenyeneke ndisọsọn̄ n̄kaha tutu enye ikemeke ndibọrọ.

Nam Emi Ọfiọn̄ Emi:

Sio ini ke ini utuakibuot ubon nịm man ada etịm ntọn̄ọikọ fo onyụn̄ odomo ese nte edinemede enye.
Ke ini odude ke an̄wautom, neme se afo oyomde nditịn̄ ke ntọn̄ọikọ fo ye mme asuanetop eken. (N̄ke 27:17) Kpụhọde ntọn̄ọikọ fo edieke enye mîdemekede owo udọn̄.