Nam Se Inịmde Iban̄a 1914 An̄wan̄a

Bible ọdọhọ ‘iben̄e idem kpukpru ini ndibọrọ owo ekededi eke obụpde’ se nnyịn inịmde, edi yak ‘inam emi ke ifụre ifụre ido ye ntotụn̄ọ ukpono.’ (1 Pet. 3:15) Edi akpanikọ ke esisọn̄ ndinam ntọtụn̄ọ n̄kpọ emi ikpepde ke Bible an̄wan̄a, utọ nte enye emi aban̄ade nte isan̄ade idiọn̄ọ ke Obio Ubọn̄ Abasi ọkọtọn̄ọde ndikara ke 1914. Man ẹnam emem nnyịn utom ndinam emi, ẹsịn ibuotikọ emi “Edinyene Nneme ye Mbọhọidụn̄—Ini Ewe ke Obio Ubọn̄ Abasi Ọkọtọn̄ọ Ndikara?” ke Enyọn̄-Ukpeme eke October 1 ye eke November 1, 2014. Enyọn̄-Ukpeme mbiba emi ke idinọ ke October ye November. Nte okotde ibuotikọ mbiba oro, bọrọ akpan mbụme ition oro ẹtienede mi, emi aban̄ade nneme oro asuanetop emi ekerede Caleb ekenyenede ye owo.

Didie ke nte Caleb . . .

• okotorode enyeneufọk akanam mmọ mbiba ẹka iso ke nneme?—Utom 17:22.

• akanamde se enye enịmde ke akpanikọ an̄wan̄a okowụt ke enye ọsụhọde idem?—Utom 14:15.

Nso ufọn ke enye . . .

• ndikafiak ntịn̄ ibio ibio se enye ekenemede mbemiso etịn̄de akpan n̄kpọ en̄wen, ekenyene?

• ndikobụp ndien ndien m̀mê se itịn̄de an̄wan̄a enyeneufọk ekenyene?

• ndiketre nditịn̄ kpukpru n̄kpọ mban̄a ibuotikọ oro ekenyene? —John 16:12.

Imenen̄ede ikọm Jehovah, “Akwa Anditeme” nnyịn, emi ekpepde nnyịn ndinam ntọtụn̄ọ n̄kpọ emi ẹdude ke Bible an̄wan̄a mbon oro ẹyomde ndifiọk!—Isa. 30:20.