Obufa Usụn̄ Emi Ẹnemde Ndida N̄kwọrọ Ikọ ke Ebiet Emi Mme Owo Ẹwakde
1. Nso ke ẹkedọhọ mme esop oro ẹnyenede ebiet emi mme owo ẹsinen̄erede ẹwak ẹnam?
1 Ẹma ẹdọhọ mme esop oro ẹnyenede ebiet emi mme owo ẹsiwakde ẹte ẹnịm okpokoro n̄wed m̀mê n̄kpọ udori n̄wed oro ẹkemede ndimen nsan̄a do, man ẹda ẹtọn̄ọ ukwọrọikọ. Edieke ẹnịmde n̄kpọ emi ẹkemede ndimen nsan̄a, asuanetop kiet m̀mê iba ẹkeme nditie m̀mê ndida n̄kpere enye. Edi edieke ẹnịmde okpokoro, asuanetop iba ẹkpenyene nditie m̀mê ndida n̄kpere do. Nditọete emi ẹkpenyene ndisịne n̄kpọ ọfọn nnyụn̄ ntie ufan ufan. Edieke owo edide ndise se idụde, asuanetop kiet ekeme nditọn̄ọ nneme ye enye ke ndidọhọ, “Ndi ọmọfiọk se Bible etịn̄de aban̄a n̄kpọ oro?” Asuanetop kiet m̀mê iba en̄wen ẹkeme ndida n̄kpere itie oro n̄kwọrọ ikọ nnọ mme owo ke ido nneme.
2. Nọ uwụtn̄kpọ emi owụtde ke ndikwọrọ ikọ ke ebiet emi mme owo ẹwakde enyene ufon.
2 Ndikwọrọ ikọ ke ebiet emi mme ẹsiwakde anam ẹtọn̄ọ ndikpep ediwak owo Bible. Ẹma ẹdọhọ nditọ ufọkn̄wed ntaifiọk kiet ẹwet n̄kpọ ẹban̄a se mmọ ẹmade, kiet ama emek ndiwet mban̄a Mme Ntiense Jehovah, edi enye ikọfiọkke ebiet emi Ufọkmbono Obio Ubọn̄ odude. Ke urua oro eketienede, enye ama okụt Mme Ntiense ẹbonde n̄wed ke okpokoro ke an̄wa ufọkn̄wed mmọ. Ẹma ẹtọn̄ọ ukpepn̄kpọ Bible ye enye, ndien idahaemi enye ana baptism onyụn̄ esitiene ọkwọrọ ikọ ke ebiet emi mme owo ẹwakde.
3. Nso ke mme owo ẹtịn̄ ẹban̄a ndikwọrọ ikọ ke ebiet emi mme owo ẹwakde?
3 Eyenete an̄wan emi esikwọrọde ikọ ke utọ itie emi ọkọdọhọ ete: “Mme owo ẹsiwaha ẹdimen mbufa magazine. Esinyene mbon emi edide akanam ikopke n̄kpọ iban̄a Mme Ntiense Jehovah. Utom ukwọrọikọ enye emi anam ikwọrọ ikọ inọ ata ediwak owo.” Eyenete an̄wan efen ọkọdọhọ ete, “Obufa usụn̄ emi ẹkwọrọde ikọ mi enem etieti koro mme owo ẹdidedi ẹbịne fi, ọkpọkọm mmọ iyomke ndimen n̄kpọ ndomokiet, ẹyesụk ẹwaha man ẹfiọk se ẹnamde do.”
4. Ntak emi ọfonde inyene akpan itie, akpan usen, ye akpan ini emi ikpesinịmde okpokoro kpukpru urua?
4 Ọkpọfọn ẹnyene akpan itie, akpan usen, ye akpan ini emi ẹsinịmde okpokoro kpukpru urua. Emi eyemehe mme owo onyụn̄ anam mmọ ẹma ndiwaha ini ekededi mbụp mbụme m̀mê mbọ n̄wed oro mmọ ẹyomde. Ndi esop mbufo ẹtọn̄ọ ukwọrọikọ ke ebiet emi mme owo ẹwakde? Edieke edide ntre, ọwọrọ ke emekeme nditiene nnam inem inem utom emi onyụn̄ okụt ufọn oro odude ke ndika ‘kpukpru ebiet n̄katan̄a Obio Ubọn̄ Abasi.’—Luke 9:60.