N̄wam Mbon Emi Mîkwe Usụn̄ Ẹkpep N̄kpọ Ẹban̄a Jehovah
1. Didie ke Jesus okowụt ke mbọm mme nnan anam imọ?
1 Usen ifan̄ mbemiso usen n̄kpa Jesus, ke ini enye ọwọrọde ke Jericho, mme eben̄e eben̄e iba emi ẹdide nnan ẹma ẹfiori ẹte: “Ọbọn̄, tua nnyịn mbọm!” Kpa ye ofụri se ikanade ibet enye, enye ama atuak ada, ọdọhọ mmọ ẹsan̄a ẹdi, onyụn̄ anam mmọ ẹkụt usụn̄. (Matt. 20:29-34) Didie ke nnyịn ikeme nditua mme nnan mbọm ukem nte Jesus?
2. Didie ke ikeme ndikwọrọ ikọ nnọ nnan ke ebiet ekededi?
2 N̄wam Mme Nnan: Edieke okụtde nnan ke ebiet ekededi, tịn̄ owo emi afo edide nọ enye nyụn̄ n̄wam enye, utọ nte ke ndida enye mbe usụn̄. Sia mme owo ẹsiwakde ndibian̄a mmọ, enye ekeme ndida fi nte idiọkowo. Edi edieke anamde n̄kpọ ufan ufan ye enye onyụn̄ owụtde ke imenen̄ede iyom ndin̄wam enye, enye idikopke ndịk. Ti n̄ko ete ke nnan edi ke utọ ke utọ, sia emi ayan̄wam fi ọdiọn̄ọ utọ un̄wam emi edinọde mmọ. Ke ama akan̄wam enye, emekeme ndidọhọ enye ke imesitie ye mme owo ikpep Bible. Dọhọ enye ke ikpama ndikot itie kiet ke Bible, utọ nte Psalm 146:8 m̀mê Isaiah 35:5, 6, nnọ enye. Edieke enye ekemede ndikot n̄wed mme nnan, bụp enye m̀mê ida n̄wed mme nnan emi enye ekemede ndida n̄kpep Bible isọk enye. Emekeme ndika n̄kosion̄o mme n̄kpọ oro ẹkotde ẹdọn̄ ke jw.org nnọ enye. Edieke kọmputa esie enyenede n̄kpọ emi ekemede ndikot se iwọrọde ida ke iso komputa esie, emekeme ndision̄o ndusụk ibuotikọ ke jw.org ye mme n̄wed oro ẹdọn̄de ke RTF, ọdọn̄ ke kọmputa esie, man enye akpan̄ utọn̄ okop.—Se ekebe emi, “Ke Ini An̄wamde Owo Emi Mîkwe Usụn̄. . . .”
3. Idinam didie iyom mme nnan ikụt ke efakutom nnyịn?
3 Ẹka Ẹkeyom Mme Nnan: Sia ediwak mbon emi ẹdide nnan mîsimaha ndiwọrọ ndinyene nneme ye isenowo emi ẹdide ufọk mmọ, nnyịn idisọpke ikụt mmọ ke ini ikwọrọde ikọ ke ufọk ke ufọk. Emi esinam enen̄ede ọsọn̄ ndiyom mmọ n̄kụt n̄kwọrọ ikọ nnọ. (Matt. 10:11) Ndi ọmọdiọn̄ọ owo ke itieutom mbufo m̀mê ke ufọkn̄wed mbufo emi edide nnan? Ka kenyene nneme ye enye. Edieke ufọkn̄wed mme nnan odude ke efakutom mbufo, da n̄wed mme nnan oro inyenede sọk mmọ ẹnịm ke itie ubon n̄wed mmọ. Ndi ọmọdiọn̄ọ owo emi owo esie edide nnan? Ndi enyene n̄ka ke efakutom mbufo oro ẹsin̄wamde mme nnan mîdịghe ndi enyene ufọk oro ẹbọpde ẹnọ mmọ ẹnyụn̄ ẹsede ẹban̄a mmọ? Nam mbon emi ẹsede ẹban̄a mmọ ẹfiọk ke nnyịn Mme Ntiense Jehovah imesinen̄ede ima ndin̄wam mme nnan, nyụn̄ dọhọ ke imekeme ndinọ mmọ n̄wed mme nnan oro inyenede ye mme n̄kpọ oro ẹkemede ndibre nnọ mme nnan ẹkpan̄ utọn̄ ẹkop. Wụt mmọ itie Bible emi ọdọhọde ke Abasi ayanam mme nnan ẹkụt usụn̄ ke mîbịghike. Emekeme n̄ko ndiwụt mmọ vidio emi ẹkotde “Mîkpedịghe Bible Emi, Okịm Okpokụre,” emi odude ke jw.org. Enye aban̄a nnan emi Bible mme nnan akan̄wamde enye. Edieke anamde mmọ ẹfiọk se idade fi idi, mmọ ẹkeme ndiyak fi ekenyene nneme ye mme nnan.
4. Nso ke ikpep ito Janet?
4 Eyenete nnyịn an̄wan emi ekerede Janet onyụn̄ edide nnan ama aka itie oro ẹsisede ẹban̄a mme nnan. Enye ama enyene nneme ye n̄kaiferi kiet do emi edide nnan n̄ko onyụn̄ ọdọhọ enye ete: “Jesus ama anam nnan ẹkụt usụn̄, ndien emi owụt ke enye ayanam kpukpru nnan ẹkụt usụn̄.” Mmọ mbiba ẹma ẹneme se idude ke Ediyarade 21:3, 4, ndien Janet ama anam enye okụt nte Obio Ubọn̄ Abasi edinamde se ẹtịn̄de do osu. Eyenan̄wan oro ama odop etie sụn̄-n̄, ekem ọdọhọ ete: “Akpa n̄kopde owo emi mîkwe usụn̄ etịn̄de utọ ikọ emi edi emi. Ediwak mbon emi ẹkụtde usụn̄ ẹkere ke se owo akanamde m̀mê se mme ete ete esie ẹkenamde esinam owo edi nnan.” Janet ama ọnọ enye e-mail onyụn̄ esịn n̄kpọ emi edidade enye ika n̄wed Bible Ekpep ke jw.org, ndien idahaemi Janet ke esikpep enye Bible ikaba ke urua.
5. Okposụkedi emi nnyịn mîkemeke ndinam nnan ẹkụt usụn̄ nte Jesus akanamde, ntak emi ọfọnde in̄wam mmọ?
5 Imọfiọk ke nnyịn ikemeke ndinam nnan ẹkụt usụn̄ nte Jesus akanamde, edi imekeme ndin̄wam mme nnan ye kpukpru mbon emi Satan anamde enyịn mmọ okịm ẹdikụt akpanikọ emi Ikọ Abasi ekpepde. (2 Cor. 4:4) Mbọm akanam Jesus anam nnan iba ẹkụt usụn̄ ke ini enye ọkọwọrọde ke Jericho. (Matt. 20:34) Edieke mbọm mme nnan anamde nnyịn n̄ko, iyan̄wam ndusụk mmọ ẹdi ẹdidiọn̄ọ Jehovah, kpa Abasi emi edinamde mme nnan ẹkụt usụn̄ ke nsinsi.