Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
AUGUST 7-13
it-2 1136 ¶4
Tyre
Ẹsobo Enye. Mbonekọn̄ Nebuchadnezzar ẹma ẹkan Tyre ẹkụk ke ata anyan ini, ntre itam ukwak oro mmọ ẹkeyarade ofụri ini oro ama anam ibuot mmọ ‘ọkwọhọ ibọ,’ n̄kpọutom oro mmọ ẹkebiomde ke afara ama onyụn̄ ‘ayan̄ade’ mmọ afara. Jehovah akanam Edidem Nebuchadnezzar okosobo obio Tyre, edi Jehovah ikọnọhọ enye “n̄kpọ eyenutom” ini oro. Ntre, Jehovah ama ọn̄wọn̄ọ ke iyada inyene Egypt inọ enye. (Eze 29:17-20) Josephus, eyen Jew emi ekesiwetde mbụkeset, ọkọdọhọ ke Nebuchadnezzar ye mbonekọn̄ esie ẹkekan obio Tyre ẹkụk ke ofụri isua 13 (Against Apion, I, 156 [21]), ndien emi ama anam ediwak n̄kpọ atak mbon Babylon. Mme ewetmbụk eset iwetke ofụri se Nebuchadnezzar ye mbonekọn̄ esie ẹkenamde Tyre ye nte mmọ ẹkesobode obio oro ẹketre. Edi etie nte mbonekọn̄ Nebuchadnezzar ẹma ẹsobo ata ediwak n̄kpọ ke Tyre ẹnyụn̄ ẹwot ata ediwak owo.—Eze 26:7-12.
it-1 698 ¶5
Egypt, Mbon Egypt
Ẹma ẹkụt uwetn̄kpọ Babylon kiet, emi ẹkewetde ke ọyọhọ isua 37 emi Nebuchadnezzar akakarade (588 B.C.E). Se ẹkewetde do akaban̄a nte ẹkekande Egypt. Edi owo idiọn̄ọke m̀mê se ẹwetde emi akaban̄a ekọn̄ emi mbonekọn̄ Babylon ẹken̄wanade ẹkan Egypt m̀mê ekọn̄ en̄wen emi ẹkekande Egypt. Se idiọn̄ọde edi ke Nebuchadnezzar ama ọbọ inyene Egypt emi Jehovah ọkọnọde enye nte n̄kpọ eyenutom ke ntak emi enye okosobode obio Tyre emi akasuade ikọt Abasi.—Eze 29:18-20; 30:10-12.
g86 11/8 27 ¶4-5
Ndi Kpukpru Tax ke Ana Ikpe?
Man ibọrọ mbụme emi, yak ineme se Jehovah akanamde ọnọ andikara emi enye ọkọdọn̄de utom. Jehovah ama ayat esịt ye obio Tyre ke ntak idiọkn̄kpọ mmọ onyụn̄ ọn̄wọn̄ọ ndisobo obio oro. Ntre, Jehovah ama anam Nebuchadnezzar emi ekedide edidem Babylon osobo obio Tyre. Kpa ye oro mbon Babylon ẹkekande obio Tyre, ediwak n̄kpọ ama atak mmọ. Ntem Jehovah ama ọn̄wọn̄ọ ndinọ Edidem Nebuchadnezzar n̄kpọ eyenutom. Se Jehovah eketịn̄de aban̄a emi odu ke Ezekiel 29:18, 19. Jehovah ọkọdọhọ ete: “Eyen owo, Nebuchadrezzar, kpa edidem Babylon, ama anam udịmekọn̄ esie ẹnam akwa utom ẹban̄a Tyre. . . . Edi amaedi n̄kpọ eyenutom, baba kiet ikodụhe inọ enye ye udịmekọn̄ esie ke Tyre ke utom oro enye akanamde aban̄a enye. Mmọdo ntem ke Jehovah Akakan Ọbọn̄ Andikara ọdọhọ ete, ‘Sese ami mmọn̄ nda isọn̄ Egypt nnọ Nebuchadrezzar edidem Babylon, ndien enye ayatan̄ inyene esie onyụn̄ obụme ediwak n̄kpọ esie onyụn̄ owo ediwak n̄kpọ esie; ndien emi edidi n̄kpọ eyenutom udịmekọn̄ esie.’ ”
Mbon emi ẹmehede ye mbụk Bible ẹdiọn̄ọ ke Edidem Nebuchadnezzar ekedi okpono ndem, atan̄ idem, onyụn̄ obụk ibụk. Mme owo ẹma ẹdiọn̄ọ ke mbonekọn̄ Babylon ẹkesinam n̄kpọ afai afai ye ifịn mmọ. Jehovah Ikamaha utọ ido oro, edi oro ikanamke Jehovah okûkpe isọn emi enye akakamade mmọ kpa nte enye ọkọn̄wọn̄ọde.
it-2 604 ¶4-5
Ndifọn Mma
Akpa owo emi akanamde idiọkn̄kpọ ye edidem Tyre. Se Jesus eketịn̄de ke John 8:44 ye se idude ke Genesis ibuot 3 owụt ke idiọkn̄kpọ ọkọtọn̄ọ ke heaven mbemiso mme owo ẹnamde idiọkn̄kpọ mi ke isọn̄. Mbon oro ẹkenamde idiọkn̄kpọ do ikọfọnke ima aba. Kpa ye oro ikwọ mfụhọ emi ẹwetde ke Ezekiel 28:12-19 aban̄ade “edidem Tyre,” ikwọ emi n̄ko aban̄a akpa angel emi akanamde idiọkn̄kpọ. Itien̄wed emi etịn̄ aban̄a n̄kohodeidem “edidem Tyre,” ọdọhọ ke enye ama anam idemesie ‘abasi,’ okot enye “cherub,” onyụn̄ ọdọhọ ke enye “okodu ke Eden, in̄wan̄esa Abasi,” kpukpru emi edi ukem ye se Bible etịn̄de aban̄a Satan. Satan ama okohode idem, Bible ọdọhọ ke enye edi urụkikọt oro okodude ke In̄wan̄ Eden, Bible onyụn̄ okot enye “abasi editịm n̄kpọ emi.”—1Ti 3:6; Ge 3:1-5, 14, 15; Edi 12:9; 2Co 4:4.
Edidem Tyre oro owo mîsiakke enyịn̄ do ọkọdọhọ ete: “Ami mmeye mma.” Enye ama enen̄ede enyene “ọniọn̄ onyụn̄ eye ama [ẹda ẹto ikọ Hebrew oro ka·lalʹ],” enye ikonyụn̄ inyeneke ‘ndudue [ẹkabade ẹto ikọ Hebrew oro, ta·mimʹ] ke mme usụn̄ esie toto ke usen emi ẹkebotde enye tutu ẹdikụt ukwan̄ido ke idemesie.’ (Eze 27:3; 28:12, 15) Etie nte ikwọ mfụhọ emi aban̄a nsio nsio ndidem Tyre, iban̄ake edidem Tyre kiet kpọt. (Men prọfesi emi aban̄ade “edidem Babylon” emi owo mîsiakke enyịn̄ ke Isa 14:4-20 domo.) Edieke edide ntre, ekeme ndidi prọfesi oro aban̄a ini emi mme andikara obio Tyre ẹkedide ufan ye Edidem David ye Edidem Solomon. Ini oro, mbon Tyre ẹma ẹtiene ẹtịp n̄kpọ man ẹda ẹbọp temple Jehovah ke Obot Moriah. Ntre, ini oro ke ẹdọhọ ke owo ikekwe ndudue ndomokiet ke usụn̄ oro mme andikara Tyre ẹkenamde n̄kpọ ye ikọt Jehovah. (1Nd 5:1-18; 9:10, 11, 14; 2Ch 2:3-16) Edi nte ini akakade, ndidem eken oro ẹkekarade Tyre ikọfọnke ido aba ye ikọt Jehovah, ntre Jehovah ama anam prọfet Joel, Amos, ye Ezekiel ẹtịn̄ ke imọ iyosobo Tyre. (Joe 3:4-8; Am 1:9, 10) Prọfesi emi iban̄ake se “edidem Tyre” adade ebiet akakan Asua Abasi kpọt, enye n̄ko anam nnyịn ikụt ke ndidọhọ ke owo ‘ọfọn ama’ iwọrọke ke enye ikemeke ndinam ndudue.
AUGUST 14-20
it-2 1172 ¶2
Mbon Ukpeme
Ke Ndamban̄a Usụn̄. Jehovah ama enyene mme prọfet emi ẹketiede nte mbon ukpeme ẹnọ nditọ Israel. (Jer 6:17) Ndien mme prọfet emi ẹma ẹsinyụn̄ ẹtịn̄ ẹban̄a mbon emi ẹtiede nte mbon ukpeme. (Isa 21:6, 8; 52:8; 62:6; Ho 9:8) Utom mme prọfet emi ekedi ndinam mme owo ẹdiọn̄ọ ke Abasi ọn̄wọn̄ọ ndisobo ndiọi owo. Edi edieke mme prọfet emi mînamke mme owo ẹfiọk se Jehovah ọn̄wọn̄ọde ndinam, Jehovah ama esibụp iyịp ndiọi owo oro ke ubọk mme prọfet oro. Edi edieke ndiọi owo oro ẹkade iso ẹnam idiọkn̄kpọ idem ke ini mme prọfet ẹma ẹkedụri mmọ utọn̄, iyịp mmọ ekesidoro mmọ ke ibuot. (Eze 3:17-21; 33:1-9) Prọfet ekededi emi mîkọsọn̄ọke ida ye Jehovah eketie nte owo ukpeme emi edide nnan m̀mê ebua emi edide imụm.—Isa 56:10.
w88 1/1 30 ¶13
Ndibọhọ Ubiomikpe Iyịp
13 Mbiomo oro Mme Ntiense Jehovah ẹnyenede nditọt mme owo mban̄a ubiereikpe Abasi emi edide ekeme ndidi se ẹmende ẹdomo ye eke Ezekiel ke eyo esie. Ẹma ẹmek enye ete edi owo ukpeme ọnọ ufọk Israel. Utom esie ekedi nditọt nditọ Israel nte ke nsobo ọmọn̄ osịm mmọ edieke mmọ mîwọn̄ọkede ikpọn̄ idiọk usụn̄ mmọ. Edieke enye, nte owo ukpeme, okokpude ndinọ ntọt, nsobo ekenyene ndisụk nsịm mme idiọkowo oro, edi iyịp mmọ ekenyene ndikọbọ owo ukpeme oro mîkanamke utom esie. Kemi Jehovah owụt se idide edu esie kaban̄a ubiereikpe nsobo: “N̄kpa idiọkowo inemke mi esịt, edi idiọkowo akam akabade ọkpọn̄ usụn̄ esie, ndien odu uwem: mbufo, O ufọk Israel, ẹkabade, ẹkabade; koro nsinam mbufo ẹkpepan̄a?”—Ezekiel 33:1-11.
AUGUST 21-27
w88 9/15 24 ¶11
“Mmọ Ẹyefiọk Ẹte ke Ami Ndi Jehovah”
11 Ke nsụhọ ẹma ẹkenyọn̄ọ Judah, ẹma ẹnam ndon ndon isọn̄ oro akabade edi “in̄wan̄ Eden” oro osion̄ode mfri. (Kot Ezekiel 36:33-36.) Kpasụk ntre, ọtọn̄ọde ke 1919, Jehovah amanam idaha eke nsụhọ oro ẹyetde aran, ẹmi inikiet eketiede ndon ndon akabade edi paradise eke spirit oro osion̄ode mfri, oro idahaemi ẹbuanade ye “akwa otuowo.” Sia paradise eke spirit emi ama ọkọyọhọ ye ndisana owo, yak Christian kiet kiet oro ama akayak idem ọnọ anam n̄kpọ ndinịm enye asana.—Ezekiel 36:37, 38.
AUGUST 28–SEPTEMBER 3
w89 8/15 14 ¶20
Ndiberede Usụn̄ Mfiak N̄ka Paradise
20 Edi nso kaban̄a kpukpru n̄kpọekọn̄ emi mme idụt ẹdikpan̄ade ẹkpọn̄? Ke ikerede iban̄a ndamban̄a idiọn̄ọ ke uniọn̄ ini oro edidade ndision̄o mbak n̄kpọekọn̄ oro ikan̄ ekemede ndita mfep, ibat n̄kpọekọn̄ ẹmi ẹyewak ata etieti. (Ezekiel 39:8-10) Mme andibọhọ Armageddon ẹkeme ndiwọn̄ọde nsụhọ n̄kpọekọn̄ ekededi eke mme idụt nsịn ke n̄kpọ oro ẹnọde ufọn.—Isaiah 2:2-4.