Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
OCTOBER 2-8
it-2 902 ¶2
Urua Ata ye Duop
Ẹnam ubiatibet ye idiọkn̄kpọ etre. Jesus ndikakpa, nset, ekem ọdọk aka heaven ‘anam ubiatibet etre, emen idiọkn̄kpọ efep onyụn̄ osio isop ndudue.’ (Da 9:24) Ibet Moses ama owụt ke mme Jew ẹdi mme anamidiọk, ndien ke mmọ ẹdot n̄kpa, onyụn̄ anam mmọ ẹbọ ufen sia mmọ mînamke aba se Ibet ẹtịn̄de. Edi ebiet ekededi oro Ibet Moses anamde ẹkụt nte idiọkn̄kpọ “awakde,” mfọnido Abasi ọdọdiọn̄ awak akan ebe ke Jesus. (Ro 5:20) Ntre, n̄kpa Jesus anam ẹkeme ndifen nnọ mme anamidiọk oro ẹkabarede esịt, ndien mmọ ndibọhọ aba utịp idiọkn̄kpọ mmọ.
it-2 900 ¶7
Urua Ata ye Duop
Messiah Edidi ke ‘Urua Ata ye Iba’ Ama Ekebe. “Urua ata ye iba” oro ẹsiakde (Da 9:25), esịne ke otu urua 70 ndien ẹbat enye etiene “urua itiaba.” Ntre, “ọtọn̄ọde ke ini emi uyo ọwọrọde” ete ẹtọn̄ọ ntak ẹbọp Jerusalem tutu “Messiah Adausụn̄ edi” edidi urua 7 ye urua 62 ke ẹmende edian oro edi urua 69, ndien emi edidi isua 483 emi ọtọn̄ọde ke 455 B.C.E. esịm 29 C.E. Nte ima ikeneneme, ke ini idọk eke 29 C.E., Jesus ama ana baptism, ẹma ẹda edisana spirit ẹyet enye aran, enye onyụn̄ ọtọn̄ọ utom ukwọrọikọ nte “Messiah Adausụn̄.”—Lu 3:1, 2, 21, 22.
it-2 901 ¶2
Urua Ata ye Duop
“Ẹyesịbe Messiah ẹfep” ke ubak urua. Angel Gabriel ama afiak ọdọhọ Daniel ete: “Ke ini urua ata ye iba oro ẹkụrede, ẹyesịbe Messiah ẹfep, edi idisụhọke n̄kpọ ndomokiet inọ enye.” (Da 9:26) N̄kpọ nte isua ita ye ubak ama ẹkebe tọn̄ọ ‘urua itiaba ye urua ata ye iba’ ẹma ẹkekure, ẹma ẹsibe Christ efep ke ini enye akakpade ke eto ndutụhọ, enye ama onyụn̄ ọnọ ofụri se enye enyenede nte ufak ọnọ ubonowo. (Isa 53:8) Jesus akada ubak “urua” kiet oro ọkwọrọikọ. Ke uwụtn̄kpọ, ke isua 32 C.E., Jesus ama ọnọ uwụtn̄kpọ aban̄a eto fig oro (men Mt 17:15-20; 21:18, 19, 43 domo) mîkon̄wụmke mfri ke “isua ita,” enye ama emen idụt mme Jew odomo ye eto fig oro. Ọdiọn̄ vine ama ọdọhọ andinyene vine ete: “Eteufọk, yak enye ada isua emi n̄ko, tutu ntịbi isọn̄ n̄kanade enye n̄kụk nnyụn̄ nduọn̄ọ mbio ke esịt; ndien edieke enye edin̄wụmde mfri ke ini iso, eyetịm ọfọn; edi edieke mîn̄wụmke, afo eyekpi enye ọduọk.” (Lu 13:6-9) Ekeme ndidi Jesus akada uwụtn̄kpọ emi etịn̄ aban̄a isua ita ye ubak oro enye akadade ọkwọrọ ikọ ọnọ mme Jew emi mîkamaha ndikabade esịt.
it-2 901 ¶5
Urua Ata ye Duop
“Ubak urua kiet” oro edidi ke ufot isua itiaba, oro edi ke isua ita ye ubak ama ebe ke otu isua itiaba oro. Ọyọhọ “urua” 70 oro ọkọtọn̄ọ ke ini idọk eke isua 29, ini emi ke Jesus akana baptism ẹnyụn̄ ẹyet enye aran. Ntre, ubak urua emi (oro edi isua ita ye ubak) ayada esịm ini utọ eke isua 33 ke usen 14 ke ọfiọn̄ Nisan ke ini Passover isua oro. N̄wed usenọfiọn̄ Gregorian owụt ke etie nte usen oro ekedi akpa usen ke ọfiọn̄ April ke isua 33. (Kot ibuotikọ emi UDIA MBUBREYO ỌBỌN̄ [Usen ye Ini Emi Ẹkenịmde].) Apostle Paul ọdọhọ ke Jesus ‘ekedi ndinam uduak ete esie,’ emi ekedide ‘ndimen akpa n̄kpọ mfep [oro edi, mme uwa ye mme enọ nte ekemde ye Ibet Moses] man enye ọsọn̄ọ udiana n̄kpọ.’ Jesus akanam emi ke ini enye akakpade man ọnọ idemesie nte uwa.—Heb 10:1-10.
OCTOBER 16-22
g05 9/8 12 ¶2
Ini Emi Owo ye Unam Ẹdidude ke Emem
Kpukpru n̄kpọ emi ẹdude uwem ke isọn̄ ẹyedu ke emem ye kiet eken, sia Abasi eyekpep nti owo ndise mban̄a isọn̄. Abasi oyonyụn̄ ‘anam ediomi’ ye mme unam ikọt man mmọ ẹdu ke emem ẹnyụn̄ ẹsụk ibuot ẹnọ mme owo.—Hosea 2:18; Genesis 1:26-28; Isaiah 11:6-8.