Mme N̄wed Emi Ẹsiakde ke N̄wed Mbono Esop Uwem ye Utom Nnyịn
AUGUST 3-9
MME AKPAN N̄KPỌ KE IKỌ ABASI | EXODUS 13-14
Yom N̄kpọuto ke Ikọ Abasi
it-1-E 1117
Ọkpọusụn̄, Usụn̄
Toto ke eset, ama enyene mme ọkpọusụn̄ emi ẹkesisan̄ade ẹto obio kiet ẹka en̄wen ke Palestine. Ẹma ẹsinyụn̄ ẹsan̄a ke mme usụn̄ emi ẹkenam mbubehe ke nsio nsio obio. (Nu 20:17-19; 21:21, 22; 22:5, 21-23; Jos 2:22; Jg 21:19; 1Sa 6:9, 12; 13:17, 18) Akpan usụn̄ kiet emi okodude ini oro okoto Egypt ebe Gaza ye Ashkelon, emi ẹkedude ke Philistia, ọwọn̄ọde ntre aka Megiddo. Usụn̄ oro akasan̄a ntre aka Hazor emi odude ke n̄kan̄ edem edere Inyan̄ Galilee, ekem ebe esịm Damascus. Edieke owo okoyomde ndito Egypt n̄ka Isọn̄ Un̄wọn̄ọ, ndisan̄a usụn̄ Philistia ekpekekpere akan. Edi Jehovah akada nditọ Israel asan̄a usụn̄ en̄wen man mbon Philistia ididi ekọn̄ ye mmọ ndien oro anam idem emem mmọ.—Ex 13:17.
it-1-E 782 ¶2-3
Ndiwọrọ ke Egypt
M̀mọ̀n̄ ke ẹkebahade Ididuot Inyan̄ man nditọ Israel ẹsan̄a ẹbe?
Ke nditọ Israel ẹma ẹkesịm Etham emi okodude “ke mben wilderness,” Abasi ama ọdọhọ Moses ete mmọ “ẹfiak edem ẹkenam nna ke iso Pihahiroth . . . ke mbeninyan̄.” Emi ama anam Pharaoh ekere ke nditọ Israel “ke ẹyo.” (Ex 13:20; 14:1-3) Ndusụk ntaifiọk emi ẹsinamde ndụn̄ọde ẹban̄a Bible ẹdọhọ ke mmọ ẹkesan̄a usụn̄ el Haj, ntre ke Abasi ndidọhọ mmọ “ẹfiak edem” ọkọwọrọ mmọ ndiwọn̄ọde ofụri ofụri n̄kpọn̄ usụn̄ oro mmọ ẹkesan̄ade. Mmọ ẹdọhọ ke etie nte ekedi nditọ Israel ẹsịm ibuot Inyan̄ Suez (n̄kọk Ididuot Inyan̄), mmọ ẹwọn̄ọde iso ẹkesan̄a n̄kan̄ Jebel ʽAtaqah, emi ediwak obot ẹdude. Sia nditọ Israel ẹkenen̄erede ẹwak, mmọ ikpekekemeke ndifehe mbọhọ edieke owo ekpebịnede mmọ ke utọ itie oro sia inyan̄ ye obot ẹma ẹkụk mmọ ẹsịn.
Mbụk mme Jew eyo mme apostle etịn̄ ukem se ntaifiọk oro ẹtịn̄de, ndien se mmọ ẹtịn̄de edi ukem ye se Bible etịn̄de aban̄a nte nditọ Israel ẹkesan̄ade. Edi ediwak ntaifiọk eken ẹtịn̄ ata isio isio n̄kpọ. (Ex 14:9-16) Etie nte itie emi nditọ Israel ẹkesan̄ade ẹbe ama oyom usụn̄ ọkpọn̄ ibuot Inyan̄ Suez (n̄kọk Ididuot Inyan̄), ntak edi oro udịmekọn̄ Pharaoh mîkekemeke ndifehe n̄n̄wọn̄ọde n̄komụm mmọ.—Ex 14:22, 23.
AUGUST 10-16
MME AKPAN N̄KPỌ KE IKỌ ABASI | EXODUS 15-16
“Kwọ Ikwọ Toro Jehovah”
it-2-E 454 ¶1
Ikwọ
Ediwak ini emi otuowo ẹkekwọde ikwọ ke Israel, ekesidi otu kiet ẹma ẹkwọ, otu enye eken ẹbọ, ndien ndusụk ini ekedi owo kiet ama ọkwọ, ediwak owo ẹbọ enye ikwọ. Etie nte se ndibọ ikwọ emi Bible etịn̄de aban̄a edi oro. (Ex 15:21; 1Sa 18:6, 7) Nte ẹwetde ndusụk Psalm, utọ nte Psalm 136, owụt ke ẹkesikwọ ndusụk ikwọ ntre. Se Bible etịn̄de aban̄a ikpọ n̄ka ikwọ iba emi ẹkedude ke eyo Nehemiah ye nte mmọ ẹkekwọde ikwọ ke ini ẹkeyakde ibibene Jerusalem ẹnọ Abasi owụt ke ekedi otu kiet ẹkwọ, otu enye eken ẹbọbọ.—Ne 12:31, 38, 40-42.
it-2-E 698
Prọfet An̄wan
Miriam edi akpa an̄wan emi Bible ọdọhọde ke ekedi prọfet. Etie nte Abasi ama esitịn̄ ikọ ọnọ enye, utọ nte nditeme enye se ọkpọkwọde. (Ex 15:20, 21) Ntak edi oro enye ye Aaron ẹkedọhọde Moses ẹte: “Nte [Jehovah] idaha nnyịn n̄ko itịn̄” ikọ? (Nu 12:2) Jehovah ama ọdọhọ prọfet Micah ewet ete ke imọ ima idọn̄ “Moses ye Aaron ye Miriam” ẹbem nditọ Israel iso ke ini imọ ikosiode mmọ ke Egypt. (Mic 6:4) Kpa ye oro Abasi ekesitịn̄de ikọ ọnọ Miriam, enye ikokponke itie nte Moses eyeneka esie. Ke ini Miriam mîkamaha ndisụk ibuot nnọ owo emi Abasi ekemekde ete ada ikọt esie usụn̄, Abasi ama ọnọ enye ufen.—Nu 12:1-15.
Yom N̄kpọuto ke Ikọ Abasi
AUGUST 17-23
MME AKPAN N̄KPỌ KE IKỌ ABASI | EXODUS 17-18
“Mbiowo Ẹsikpep Mbon En̄wen N̄kpọ Ẹnyụn̄ Ẹnọ Mmọ Utom Ẹnam”
Yom N̄kpọuto ke Ikọ Abasi
it-1-E 406
N̄wed Bible
Se ikụtde ke Bible owụt ke Abasi eketeme Moses se enye ekewetde, ọnọ enye spirit esie ada ewet, ndien se enye ekewetde ekeme ndinam ifiọk nnennen usụn̄ emi ikpokponode Abasi. Idịghe Moses ekemek idemesie ndida nditọ Israel usụn̄, Abasi ekemek enye. Ke ini Abasi ọkọdọhọde enye ada ikọt esie usụn̄, enye ikenyịmeke ke nsonso oro. (Ex 3:10, 11; 4:10-14) Abasi ama ọnọ enye odudu ndinam utịben̄kpọ tutu edi se mme oku mfọni Pharaoh ẹnyịmede ke odudu Abasi ke enye ada anam mme utịben̄kpọ oro. (Ex 4:1-9; 8:16-19) Ntre, idịghe Moses akadaha ke idemesie ọkọtọn̄ọ ndisitịn̄ ikọ nnọ nditọ Israel nnyụn̄ n̄wet ikọ esie nsịn ke n̄wed. Utu ke oro, enye akanam se Abasi ọkọdọn̄de enye, Abasi ama onyụn̄ ọnọ enye spirit esie ada etịn̄ ikọ onyụn̄ ewewet esịn ke Bible.—Ex 17:14.
AUGUST 24-30
MME AKPAN N̄KPỌ KE IKỌ ABASI | EXODUS 19-20
“Se Ekemede Ndikpep Nto Ibet Duop”
w89 11/15 5 ¶6
Nso ke Ibet Duop Ẹwọrọ Ẹnọ Fi?
Akpa ibet inan̄ oro ẹsọn̄ọ ẹwụt mme mbiomo oro nnyịn inyenede inọ Jehovah. (Akpa) Enye edi Abasi oro osụk oyomde san̄asan̄a utuakibuot. (Matthew 4:10) (Ọyọhọ Iba) Mme andituak ibuot nnọ enye ndomokiet ikpenyeneke ndikama ndisọi mbiet. (1 John 5:21) (Ọyọhọ Ita) Edikama oro nnyịn ikamade enyịn̄ Abasi ekpenyene ndidi ke ido oro odotde onyụn̄ owụtde uku, ikpanaha-na owụt unana ukpono. (John 17:26; Rome 10:13) (Ọyọhọ Inan̄) Ofụri uwem nnyịn ekpenyene ndiwụhọ ke ndisana n̄kpọ. Emi anam nnyịn iduọk odudu, m̀mê ‘idia sabbath,’ ke usụn̄ unam n̄kpọ ntre.—Mme Hebrew 4:9, 10.
w89 11/15 6 ¶1-2
Nso ke Ibet Duop Ẹwọrọ Ẹnọ Fi?
(Ọyọhọ Ition) Nditọ ndisụk ibuot nnọ mme ete ye eka mmọ ke akaiso ndinam n̄kpọ nte itiat inụk nnọ edidianakiet eke ubon, adade mme edidiọn̄ Jehovah ẹdi. Ndien nso utịbe utịbe idotenyịn ke “akpa ibet eke asan̄ade ye un̄wọn̄ọ” mi ọnọ ntem! Enye idịghe n̄kukụre “man ọkpọfọn ye afo” edi n̄ko “afo okponyụn̄ odu uwem ebịghi ke isọn̄.” (Ephesus 6:1-3) Ke emi nnyịn idude uwem ke ‘utịt ini’ eke idiọk editịm n̄kpọ oro odude kemi, utọ n̄kopitem nnọ Abasi oro ọmọnọ n̄kparawa owo idotenyịn editre ndikpa n̄kpa tutu amama.—2 Timothy 3:1; John 11:26.
Ima oro inyenede inọ mbọhọidụn̄ nnyịn eyekpan nnyịn ndinọ mmọ unan ebe ke mme utọ idiọk edinam nte (Ọyọhọ itiokiet) uwotowo, (Ọyọhọ itiaba) edisịn efịbe, (Ọyọhọ itiaita) ediyịp inọ, ye (Ọyọhọ usụkkiet) editịn̄ mme ikọ nsu. (1 John 3:10-12; Mme Hebrew 13:4; Ephesus 4:28; Matthew 5:37; Mme N̄ke 6:16-19) Edi nso kaban̄a mme uduakesịt nnyịn? Ọyọhọ ibet (Duop) oro akpande usịn esịt ke n̄kpọ owo, emeti nnyịn ete ke Jehovah oyom ekikere esịt nnyịn ẹnen kpukpru ini ke enyịn esie.—Mme N̄ke 21:2.
Yom N̄kpọuto ke Ikọ Abasi
AUGUST 31–SEPTEMBER 6
MME AKPAN N̄KPỌ KE IKỌ ABASI | EXODUS 21-22
“Wụt ke Ada Uwem Nte Jehovah Adade”
it-1-E 271
Ndimia Owo
Ibet ama enyịme eyen Israel amia ofụn esie eren m̀mê n̄wan ke eto edieke ofụn oro ọsọn̄de ibuot. Edi edieke enye amiade ofụn esie owot, akana ẹsio enye usiene. Edieke ofụn oro akpade ke usen kiet m̀mê iba ama ekebe, oro ediwụt ke anaedi eteufọk esie ikoyomke ndiwowot enye. Enye ama enyene unen nditụnọ ofụn esie sia ofụn oro ekedi “inyene” esie. Idụhe owo emi okpokoide-koi oyom ndibiat inyene esie yak atak enye. N̄ko, edieke ofụn oro akpade ke usen kiet m̀mê iba ama ekebe, edisọsọn̄ ndidiọn̄ọ m̀mê umia oro owot enye m̀mê n̄kpọ en̄wen akam owot. Ntre edieke ofụn oro akade iso odu uwem ke usen kiet m̀mê iba ama ekebe, owo idisioho eteufọk esie usiene.—Ex 21:20, 21.
Yom N̄kpọuto ke Ikọ Abasi
it-1-E 1143
Nnụk
Se ẹtịn̄de ke Exodus 21:14 ekeme ndiwọrọ ke akana ẹwot owo ekededi emi owotde owo ọkpọkọm enye edi oku, mîdịghe ọwọrọ ke akana ẹwot owo emi okoide-koi owot owo ọkpọkọm enye efehe okomụm nnụk itieuwa.—Men 1Nd 2:28-34 domo.