Abasi ye Christ Ẹyenam Iwọrọ Ufụn ke Ini Iso

N̄kpọ etie didie ye afo? Ndi edi ibuot ubon emi enyenede ediwak n̄kpọ ndinam? Ndi edi eka m̀mê ete emi ọbọkde nditọ ikpọn̄ ndien oro anam ọsọn̄ mbufo ndinyene se ẹdiade? Ndi edi eyen ufọkn̄wed ndien nditọ ufọkn̄wed mbufo ẹsiyom fi ikọ? Ndi usọn̄ m̀mê udọn̄ọ iyakke ọbọ emem? Kpukpru owo ẹnyene mfịna. Ediwak mme Christian ẹnyene nsio nsio mfịna emi mmọ ẹyọde. Edi imọdiọn̄ọ ke ibịghike, Jehovah ayanam ibọhọ kpukpru mfịna emi.—2Co 4:16-18.

Kan̄a ke emi, nnyịn itịmekede esịt ikaha sia imọfiọk ke Jehovah okụt kpukpru se iwọrọde nnyịn, enye ama nte isọn̄ọde ida inam n̄kpọ esie kpa ye mfịna oro inyenede, enye oyonyụn̄ enen̄ede ọdiọn̄ nnyịn ke ini iso. (Jer 29:11, 12) Jesus n̄ko enen̄ede ekere aban̄a nnyịn. Enye ọdọhọ ke iyodu ye nnyịn adan̄a nte ikade iso inam utom oro enye ọnọde nnyịn. (Mt 28:20) Ke ini itiede ikere nte Obio Ubọn̄ Abasi edinamde nnyịn iwọrọ ufụn, oro esinam itetịm idori enyịn ke Obio Ubọn̄ oro inyụn̄ ibiere ndika iso nyọ se iwọrọde nnyịn.—Ro 8:19-21.

ẸSE VIDIO ORO WỤK ENYỊN SE JESUS MAN ỌBỌHỌ AFANIKỌN̄ EMI EDIDE KE ISO!—NTE UWEM EDITIEDE KE OBIO UBỌN̄ ABASI, EKEM ẸBỌRỌ MME MBỤME EMI:

• Nso ikanam ubonowo ẹdian̄ade ẹkpọn̄ Abasi, ndien nso ke oro akada edi?

• Nso ke Jehovah edinam inọ ikọt esie ke ini iso?

• Nso inam nnyịn idori enyịn ndibọ utọ edidiọn̄ emi?

• Mme edidiọn̄ ewe enen̄ede ọdọn̄ fi ndikụt ke obufa ererimbot?