GEORGIA
N̄kekere ke Mmenyene Kpukpru N̄kpọ
Madona Kankia
AKAMANA KE 1962
AKANA BAPTISM KE 1990
Akani owo n̄ka ukara Communist ke Georgia, emi an̄wamde ediwak owo ẹdidiọn̄ọ akpanikọ. Enye ama etiene esịne ke otu akpa nditọ Ufọkn̄wed Mme Ọkwọrọ Obio Ubọn̄ ke Tbilisi. Ẹkenịm ufọkn̄wed oro ke 2015.
ẸKETỌN̄Ọ ndikpep mi Bible ke 1989. Ini oro, n̄ketiene ndi akamba owo mbon Communist ke obio nnyịn Senaki, n̄konyụn̄ nsịne ke kọmiti ikpọ owo ukara Georgia. Mma nnyene ediye akparawa emi okoyomde ndidọ mi. N̄kekere ke mmenyene kpukpru n̄kpọ.
Se ete ye eka mi ẹkekpepde mi ama anam mi mma Abasi. Mma nnịm ke Abasi odu kpa ye oro n̄kedide owo n̄ka Communist. Ke ini n̄kọtọn̄ọde ndikpep Bible, mma ndikụt ibọrọ kpukpru mbụme emi ẹkesifịnade mi; mma mbiere ndida uwem mi nnam n̄kpọ Jehovah. Edi mme ufan mi, mbon itieutom nnyịn, ubon nnyịn, ye akparawa emi okoyomde ndidọ mi ẹma ẹyat esịt etieti.
Mme iman mi ikadianke idem aba ye ami sia ndide Ntiense Jehovah. Sia n̄kọdiọn̄ọde ke ifọnke ndidi Ntiense Jehovah mfiak ndi owo pọlitiks, mma mbiere ke mfọnn̄kan n̄kpọ ndinam edi ami ndikpọn̄ ufọk, nditre ndụk ye akparawa emi n̄koyomde ndidọ, nnyụn̄ n̄wọrọ ke n̄ka mbon Communist ye ke kọmiti ikpọ owo ukara. Ke mma n̄kana baptism, mme ufan mi ye mbon nnyịn ẹma ẹfịna mi uwem ẹkan akpa. Sia mme owo ẹkenen̄erede ẹdiọn̄ọ mi ke obio nnyịn, editịm ama okpon akaha ke obio ke ntak emi ndide Ntiense Jehovah. Ntre mma n̄kpọn̄ obio nnyịn n̄ka Kutaisi. Mma nsọsọp ntọn̄ọ utom usiakusụn̄ do.
Ke ini mme owo ẹbụpde mi m̀mê nso ufọn ke ndia ke ofụri ufen emi n̄kenyịmede ndibọ man nsụk ndi Ntiense Jehovah, mmesisọsọp ndọhọ mmọ ke inyeneke se inemde mi nte se n̄kanamde oro. Kpa ye oro mîkan̄wan̄ake ete ye eka mi ntak emi ndide Ntiense Jehovah, esịt enem mi sia mmọ ẹma ẹkpep mi n̄kpọ emi anamde mi mma Abasi ye mme owo. Emi ekenen̄ede an̄wam mi.