Bible Ama Etetịn̄ ke Ndutịme Oyodu ke Ukara

Mme owo mfịn ẹnyene nsio nsio ekikere ẹban̄a n̄kpọ pọlitịks. Ukara ẹkpenịm ibet oro afịnade mmọ, mmọ ẹsifan̄a, mmọ ẹsinam n̄kpọ emi owụtde ke mmọ inyịmeke utọ ibet oro. Ke ukara, mbon oro ẹsinamde ibet isiwakke ndinyịme ye se mbon ukara eken ẹtịn̄de m̀mê ndinam se mmọ ẹdọhọde. Ndien emi esinam ndutịme odu ke ukara inyụn̄ iyakke ukara ẹnam se mmọ ẹkpenamde.

Enye emi enen̄erede ọwọrọ etop edi ndutịme oro odude ke ufọt ukara United States ye Britain (emi ẹsiwakde ndikot United Kingdom). Ntak-a? Bible ama etetịn̄ ke ndutịme oyodu ke ufọt ukara iba emi, ndien ke edidi ke ini mmọ ẹsụk ẹkarade ke Obio Ubọn̄ Abasi edida itie mi ke isọn̄ onyụn̄ okpụhọde n̄kpọ.

Ndutịme okpon ke ukara “ke mme akpatre usen” emi

Bible etịn̄ ata edinem prọfesi ke n̄wed Daniel. Ke prọfesi oro, Abasi ama etịn̄ “se iditịbede ke mme akpatre usen.” Ini Daniel ekewetde ikọ emi, enye eketịn̄ se iditịbede ke ini iso, ndien ke n̄kpọ eyenen̄ede okpụhọde ke ererimbot.​—Daniel 2:28.

Abasi okowụt edidem Babylon prọfesi emi ke ndap. Ke ndap oro, edidem oro ama okụt akamba mbiet kiet emi ẹkedade nsio nsio ukwak ẹnam. Ekem, prọfet Daniel ama edinam nsio nsio itie ke idem mbiet oro an̄wan̄a, ke ọtọn̄ọde ke ibuot esịm ikpat mbiet oro ẹda ẹban̄a nsio nsio ukara emi ẹdikarade ofụri ererimbot, emi ẹdikarade ekem ikarake aba.a Nte ini akade, akamba itiat emi adade aban̄a Obio Ubọn̄ Abasi ọyọtọ mbiet oro asuan.​—Daniel 2:36-45.

Prọfesi oro ọkọdọhọ ke Obio Ubọn̄ Abasi ayada itie kpukpru ukara owo. Kpa Obio Ubọn̄ emi ke Jesus ekekpep mme mbet esie ndibọn̄ akam mben̄e ini enye ọkọdọhọde ete: “Yak obio ubọn̄ fo edi.”​—Matthew 6:10.

Edi m̀mọ̀n̄ ke prọfesi oro ke Bible ọkọdọhọ ke ndutịme oyodu ke ukara? Ti ke ikpat mbiet oro ekedi “ubak ukwak, ubak mbateso.” (Daniel 2:33) Ikpat mbiet emi ama okpụhọde ye mme itie eken ke idem mbiet oro sia mme itie eken ikabuahake ye n̄kpọ ndomokiet, emi okowụt ke oyodu ukara kiet emi mîdidịghe ukem ye mbon eken. Didie ke oro eketịbe? Prọfesi Daniel anam an̄wan̄a:

Prọfesi oro owụt ke ndutịme oyodu ke ukara emi edikarade ofụri ererimbot emi ikpat mbiet oro adade aban̄a. Mme owo emi ẹdude ke idak ukara oro ẹyenam n̄kpọ emi mîdiyakke ukara oro okop odudu.

Prọfesi Daniel oro osu mfịn

Ikpat mbiet oro ada aban̄a ukara United States ye Britain oro ẹdianade kiet ẹkara ofụri ererimbot idaha-emi. Didie ke mme n̄kpọ oro ẹtịbede ke ererimbot idaha-emi ẹwụt ke mmọ ẹkara?

Ikpat mbiet oro edi “ubak ukwak ye ubak mbateso,” ndien sia ukwak abuahade ye mbateso emi anam ikpat mbiet oro okûsọn̄ idem. (Daniel 2:42) Mfịn, ukara United States ye Britain isọn̄ke idem ke ntak emi mbon oro mmọ ẹkarade mîdianake kiet. Ke uwụtn̄kpọ, mme owo ke idụt iba emi isinyịmeke inọ kiet eken. Mmọ ẹsisịn ntịme ẹyom unen mmọ. Idem mbon oro mme owo ẹmekde ẹkara ke mme idụt emi isinyịmeke inọ kiet eken. Sia mme owo mîdianake kiet, ukara United States ye Britain isikemeke ndinam mme n̄kpọ oro mmọ ẹkeduakde ndinam.

Yak ineme mme n̄kpọ en̄wen ke prọfesi Daniel oro ye nte mmọ ẹsude mfịn:

Prọfesi: “Obio ubọn̄ oro ayabahade, edi odudu ukwak oyodu enye ke esịt.”​—Daniel 2:41.

Se Ọwọrọde: Kpa ye oro United States ye Britain ẹsinyenede nsio nsio mfịna ke ukara mmọ, mmọ ẹsụk ẹnyenyene odudu nte ukwak ke ntak emi mbonekọn̄ mmọ ẹkopde odudu.

Nte Prọfesi Oro Osude

Ke 2023, okụk emi United States ye United Kingdom ẹkedianade kiet ẹbiat ndidep mme n̄kpọ-ekọn̄ awak akan se idụt 12 emi ẹsinen̄erede ẹbiat okụk ke n̄kpọ-ekọn̄ ẹbiatde ẹkpemen ẹdian kiet.​—Stockholm International Peace Research Institute.

‘United States ye United Kingdom ẹnen̄ede ẹdiana kiet ẹkpeme idụt mmọ ẹnyụn̄ ẹnam n̄kpọ ke ufọn kiet eken. Idụhe idụt iba ndomokiet emi ẹdianade kiet ntem. Mmọ ẹsikama mfọnn̄kan n̄kpọ oro ẹsion̄ode ẹdi idaha-emi ẹnam n̄kpọ. Mmọ ẹsidiana kiet ẹnam n̄kpọ ẹnyụn̄ ẹdiana kiet ẹn̄wana ye mme asua mmọ.’​—Strategic Command, U.K. Ministry of Defence, April 2024.

Prọfesi: “Amaedi mme nnuenukot ikpat emi ẹdide ubak ukwak ye ubak mbateso, obio ubọn̄ emi oyokop odudu ke n̄kan̄ kiet, onyụn̄ emem ke n̄kan̄ eken.”​—Daniel 2:42.

Se Ọwọrọde: Kpa ye oro mbonekọn̄ United States ye Britain ẹkopde odudu, mmọ ikemeke ndinam kpukpru n̄kpọ oro mmọ ẹkpemade ndinam ke ntak nte ukara mmọ etiede. Edieke ata ediwak owo mînyịmeke se ukara ẹduakde ndinam, esisọsọn̄ ukara ndinam se mmọ ẹkeduakde oro.

Nte Prọfesi Oro Osude

“Ndusụk mbon emi ẹnen̄erede ẹdiọn̄ọ n̄kpọ ẹban̄a pọlitịks ẹdọhọ ke nte ukara America etiede anam [United States] mîkemeke ndinam mme n̄kpọ oro mmọ ẹdọhọde mme idụt eken ke mmimọ imekeme ndinam, utọ nte n̄kpọ aban̄ade mbụbehe m̀mê ndikpeme mbon oro ẹdude ke idak mmọ.”​—“The Wall Street Journal.”

“Mfịna pọlitịks okpon eti eti ke [Britain] ndien akananam mfịna ikponke ntem ke ukara mmọ. Emi anam mbon pọlitịks idiọn̄ọke se mmọ ẹkpenamde. Mme mfịna emi anam mbon oro ẹnamde utom ukara idiọn̄ọke se mmọ ẹkpenamde man ẹn̄wam mme owo.”​—Institute for Government.

Prọfesi: “[Obio Ubọn̄ oro] ẹyebuaha ye nditọ owo; edi mmọ ididianake kiet.”​—Daniel 2:43.

Se Ọwọrọde: Ndusụk ini, mbio obio ẹsitiene ẹnyene uyo ke mbubehe ukara, edi kpa ye oro, ukara isinamke ata nnennen nnennen se mmọ ẹyomde.

Nte Prọfesi Oro Osude

“Mfịn, ediwak mbon America idaha mbon pọlitịks nte nti owo.”​—Pew Research Center.

“Idaha-emi mme owo inịmke se mbon ukara ẹtịn̄de inyụn̄ inịmke ke nte mmọ ẹkarade ọfọn. Ikesitiehe ntem ke ufan̄ isua 50 oro ebede.”​—“National Centre for Social Research.”

Nte prọfesi Daniel edisude ke ini iso

Prọfesi Daniel owụt ke United States ye Britain ẹdisụk idadiana kiet ikara ke ini Obio Ubọn̄ Abasi editọn̄ọde.​—Daniel 2:44.

Ke prọfesi kiet ke n̄wed Ediyarade, emi etịn̄de aban̄a ukem n̄kpọ oro, Bible owụt ke ẹyetan̄ “ndidem ofụri isọn̄” ẹbon ọtọkiet ke ekọn̄ Armageddon, kpa “ekọn̄ akwa usen Abasi Ata Ọkpọsọn̄.” (Ediyarade 16:14, 16; 19:19-21) Ke ekọn̄ oro, Jehovahb oyosobo kpukpru ukara owo, enye ama anam oro ama, idụhe ukara owo ndomokiet emi edikarade ofụri ererimbot aba.

Edieke oyomde ndidiọn̄ọ n̄kpọ efen efen mban̄a se inemede emi, mbọk kot ibuotikọ emi, “Nso Idi Ekọn̄ Armageddon?”

Ufọn emi ididiade ito ndidiọn̄ọ prọfesi Daniel oro aban̄ade ndutịme ke ukara

Bible ama etetịn̄ aban̄a ndutịme oro odude ke ukara United States ye Britain, ndien ndikpep mban̄a prọfesi emi anam idiọn̄ọ se ikade iso mfịn.

• Eyedidiọn̄ọ ntak emi Jesus ọkọdọhọde mme mbet esie ẹkûsịn idem ke n̄kpọ pọlitịks ererimbot emi. (John 17:16) Oyonyụn̄ enen̄ede ọdiọn̄ọ ntak emi Jesus, oro Abasi emekde edi edidem Obio Ubọn̄ esie, ọkọdọhọde ete: “Obio ubọn̄ mi idịghe ubak ererimbot emi.”​—John 18:36.

• Idem idinyekke fi sia ọmọdiọn̄ọ ke Obio Ubọn̄ Abasi ọmọn̄ ọsọsọp okpụhọde n̄kpọ, onyụn̄ anam uwem ọfọn ye mme owo nte Abasi ọkọn̄wọn̄ọde.​—Ediyarade 21:3, 4.

• Idem idinyụn̄ inyekke fi sia ọmọdiọn̄ọ ke n̄kpọ ọyọfọn ke ini iso, esịt ayana fi sụn̄ sia nsio nsio idụt idin̄wanake ibiat n̄kpọ ke isọn̄ emi.​—Psalm 37:11, 29.

Prọfesi Daniel owụt ke United States ye Britain emi ẹdade ẹban̄a ikpat mbiet oro, edidi akpatre ukara owo emi edikarade ofụri ererimbot. Ke oro ebede, ata eti ukara ayada itie ukara owo​—ukara oro edi Obio Ubọn̄ Abasi ndien enye edidu ke heaven ikara.

Edieke oyomde ndidiọn̄ọ n̄kpọ efen emi Obio Ubọn̄ Abasi edinamde inọ mme owo, mbọk se vidio emi, Nso Idi Obio Ubọn̄ Abasi?