SE ITỊBEDE KE ERERIMBOT

Spain

Ntaifiọk ẹdọhọ ke mme owo ẹkenam unyekisọn̄ etịbe ke Lorca ke Spain ke 2011. Owo usụkkiet ẹma ẹkpa, ediwak owo ẹda unan. Ntaifiọk emi ẹkpepde n̄kpọ ẹban̄a isọn̄ ẹdọhọ ke ọkpọsọn̄ udọk isọn̄ nsio mmọn̄ nda nduọk ke in̄wan̄ akanam unyekisọn̄ emi etịbe.

China

Ke 2012, mbon China emi ẹkekade idụt en̄wen ndise ndiye itie ẹma ẹbiat biliọn dollar 102. Esop Edidiana Mme Idụt emi esede aban̄a n̄kpọ emi ọdọhọ ke idahaemi mbon China ẹda iso ke ndibiat okụk n̄ka idụt en̄wen n̄kese ndiye itie. Mbon Germany ẹkebiat biliọn dollar 84, mbon America ẹbiat biliọn dollar 83.

Japan

Magazine ibọkusọbọ kiet ke Britain (BMJ) etịn̄ n̄kpọ aban̄a ndụn̄ọde emi ẹkedade n̄kpọ nte owo 68,000 ke Japan ẹnam ke n̄kpọ nte isua 23. Mbon emi ẹkemanade tọn̄ọ ke 1920 sịm 1945, ẹnyụn̄ ẹtọn̄ọde ndin̄wọn̄ sika mbemiso ẹsịmde isua 20 ẹma ẹsọp ẹkpa. Iban oro mîn̄wọn̄ke ẹma ẹdu uwem isua duop ẹkan iban emi ẹn̄wọn̄de; irenowo emi mîn̄wọn̄ke ẹma ẹdu uwem isua itiaita ẹkan irenowo emi ẹn̄wọn̄de.

Mauritania

Ukara iyakke ẹnam m̀mê ẹkama ekpat ọkpọ ke idụt oro m̀mê ẹbọ idụt en̄wen ẹdep mbak ẹdiwot mme unam ye mme iyak. Unam ye iyak ẹkeme ndikpa edieke ẹmende ekpat emi sia mîditahake mmọ ke idịbi. Ukara ẹdọhọ ẹkama ekpat emi ẹkemede nditaha.

Ererimbot

Akwa ntakurua esịm mbon insurance. Mmọ ẹsibiat n̄kpọ nte biliọn dollar 50 kpukpru isua ẹkpe mbon emi ọkpọsọn̄ eyo, edịm, m̀mê oyobio abiatde n̄kpọ mmọ. Nsọn̄ọn̄kpọ n̄ko anam ntakurua emi ọdọk utịm ikaba kpukpru isua duop tọn̄ọ ke 1980.