Ndap

Ndi Abasi ama esitịn̄ n̄kpọ ọnọ mme owo ke ndap?

“[Prọfet] Daniel adaba ndap . . . ke bed esie. Ndien enye ewet ndap oro enịm. Enye onyụn̄ obụk ofụri n̄kpọ oro.”—Daniel 7:1.

SE BIBLE ỌDỌHỌDE

Abasi ama esineme nneme ye mme owo ke nsio nsio usụn̄. Ke eyo Bible, enye ama esitịn̄ n̄kpọ ọnọ mme owo ke ndap. Edi ndap emi Abasi akanamde mme owo ẹdaba iketiehe nte enye oro isidabade mfịn, emi mîsin̄wan̄ake owo mîsinyụn̄ iwọrọke n̄kpọ ndomokiet. Mme ndap oro ẹma ẹsin̄wan̄a owo, ẹnyụn̄ ẹnyene se ẹwọrọde. Da prọfet Daniel ke uwụtn̄kpọ. Ke ndap oro enye akadabade, enye ama okụt ikpọ unam emi ẹdade ẹban̄a ikpọ ukara ererimbot ọtọn̄ọde ke Babylon esịm eyo nnyịn. (Daniel 7:1-3, 17) Abasi ama onyụn̄ ọdọhọ Joseph ete Jesus ke ndap ete emen n̄wan ye eyen esie efehe aka Egypt. Nte Jesus akasan̄ade ọbọhọ n̄kpa edi oro, sia Edidem Herod emi ekedide ibak ama aduak ndiwot enye. Ke Herod ama akakpa, Abasi ama afiak etịn̄ ikọ ye Joseph ke ndap onyụn̄ ọdọhọ enye ke edidem emi akpa, yak enye emen ubon esie ọnyọn̄ obio emana mmọ.—Matthew 2:13-15, 19-23.

Ndi Abasi esitịn̄ n̄kpọ ọnọ nnyịn mfịn ke ndap?

“Ẹkûnam n̄kpọ ẹbe se ẹwetde.”—1 Corinth 4:6.

SE BIBLE ỌDỌHỌDE

Abasi ama anam ẹwet ndusụk ndap emi mme owo ẹkedabade ẹsịn ke Bible. Ndien kop se 2 Timothy 3:16, 17 etịn̄de mi aban̄a Bible: “Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido, man owo Abasi etịm odot, eben̄e idem ọyọhọ ọyọhọ ndinam eti utom ekededi.”

Bible ‘eben̄e nnyịn idem ọyọhọ ọyọhọ’ sia enye anam nnyịn idiọn̄ọ ofụri se akpanade ifiọk iban̄a Abasi, mme edu esie, se enye amade ye se enye asuade, ye nte ikpetienede inam uduak Abasi osu ke isọn̄ emi. Ntak edi oro Abasi mîdaha aba ndap itịn̄ ikọ inọ mme owo. Edieke iyomde ndifiọk nte ini iso editiede ye se Abasi oyomde nnyịn inam, inaha ‘inam n̄kpọ ibe se ẹwetde’ ke Bible. N̄kọ owo ekededi ekeme ndinyene Bible nnyụn̄ n̄kpep mme n̄kpọ emi Abasi anamde nnyịn ifiọk ke esịt esie, esịnede mme ndap.

Ntak emi ikpenịmde mme ndap ye n̄kukụt emi ẹdude ke Bible?

“Mme owo [ẹketịn̄] ikọ eke otode Abasi nte edisana spirit adade mmọ usụn̄.”—2 Peter 1:21.

SE BIBLE ỌDỌHỌDE

Ediwak ndap ye n̄kukụt emi ẹdude ke Bible ẹkedi prọfesi—oro edi, ẹkewụt se iditịbede ke ini iso. Mme prọfesi emi ẹnam mme owo ẹkeme ndidụn̄ọde nse m̀mê kpukpru se Bible etịn̄de ẹdi akpanikọ. Ndi se Bible etịn̄de edi akpanikọ? Da n̄kukụt oro ẹwetde ke Daniel 8:1-7 ke uwụtn̄kpọ; ẹkewet n̄kukụt emi ke utịt utịt ini ukara Babylon.

N̄kukụt emi aban̄a nte okpo ebot atuakde okukịm erọn̄ ọduọk ke isọn̄. Ikanaha Daniel etetie ekere se n̄kukụt emi ọwọrọde sia Abasi ama ọdọn̄ angel esie ọkọdọhọ Daniel ete: “Okukịm erọn̄ oro . . . enyenede nnụk iba ada aban̄a ndidem Media ye Persia. Ndien idet idet okpo ebot oro ada aban̄a edidem Greece.” (Daniel 8:20, 21) Mbụk owụt ke Media ye Persia ẹma ẹkan Babylon ẹnyụn̄ ẹkabade ẹkara ofụri ererimbot. Ke Media ye Persia ẹma ẹkekara n̄kpọ nte isua 200, Akwa Alexander owo Greece ama akan mmọ. Emi eketịbe nnennen nte Bible eketịn̄de. Nte prọfesi Bible, emi esịnede mme ndap, esisude edi emi. Emi anam Bible okpụhọde ye ndisana n̄wed eken, onyụn̄ anam inen̄ede inịm se Bible etịn̄de.