IBUOTIKỌ MAGAZINE EMI | NDI AMAYAK MFỊNA EMEN FI EMEN?
Mfịna: N̄kpọ Emi Mûkemeke Ndinyan̄a
NDI ọdọn̄ọ udọn̄ọ emi mînyeneke akpan usọbọ? Ndi ndọ fo asuana? Ndi owo fo akpa? Mme mfịna ntem ẹkeme ndinam enyịn anan fi tutu udiọn̄ọke aba se akpanamde. Edieke n̄kpọ emi mûkemeke ndinyan̄a ọwọrọde fi, nso ke akpanam?
UWỤTN̄KPỌ KIET KE BIBLE: PAUL
Apostle Paul ama esisan̄a ke nsio nsio obio ọkwọrọ ikọ. Edi ẹma ẹmụm enye ẹkesịn ke ufọk kiet ẹnyụn̄ ẹnịm owoekọn̄ ete ekpeme enye. Kpa ye oro edide inyeneke se Paul ekeduede, enye ama esịne do ofụri isua iba. Utu ke enye ndisịne do mfịna idem mban̄a se enye mîkemeke ndinyan̄a, enye akakam anam se enye ekemede. Enye ama ada N̄wed Abasi an̄wam kpukpru mbon oro ẹkedide ẹdise enye onyụn̄ ọdọn̄ mmọ esịt. Enye ama onyụn̄ ada ini oro ewet ediwak leta oro ikụtde idahaemi ke Bible.—Utom 28:30, 31.
SE ANJA ANAMDE
Nte iketịn̄de ke akpa ibuotikọ, Anja isiwọrọke an̄wa aba. Enye ọdọhọ ete: “Tọn̄ọ n̄kọdọn̄ọ kansa, uwem mi ọtọ etịmede. Nyomke ndimen udọn̄ọ idahaemi ndọn̄ọde kansa mi, ntre nsikaha utom nnyụn̄ n̄kaha usọrọ.” Didie ke Anja ọyọ se iwọrọde enye emi? Enye ọdọhọ ete: “Ata akpan n̄kpọ oro akan̄wamde mi ekedi ndikpụhọde nte nsinamde n̄kpọ. Mmesibem iso n̄kere mme n̄kpọ emi ẹdide ata akpan n̄kpọ ke uwem mi nnyụn̄ nsio ndutịm emi edinamde nnam mme n̄kpọ emi ke ekpri ukeme mi. Emi esinam n̄kop inemesịt.”
“Mmekpep ndiyụhọ ye se nnyenede ke idaha ekededi oro ami ndude.”—Se Paul ekewetde ke Philippi 4:11
SE AKPANAMDE
Edieke n̄kpọ emi mûkemeke ndinyan̄a ọwọrọde fi, nam emi ise:
Tie kere ekpri se ekemede ndinam. Ke uwụtn̄kpọ, ekeme ndidi udọn̄ọ fo inyeneke akpan usọbọ, edi ndi omosụk ekeme ndisisịn̄ede idem, ndia nti udia, nnyụn̄ nnen̄ede nduọk odudu?
Biere mme akpan n̄kpọ oro oyomde ndinam nyụn̄ se nte ekemede ndinam emi nsịt nsịt kpukpru usen.
Nam mme n̄kpọ emi ẹdinọde fi inemesịt, idem ọkpọkọm ata n̄kpri n̄kpri n̄kpọ. Nam okpokoro ufọk utemudia asana nyụn̄ yet usan. Sịne n̄kpọ ediye ediye. Nam mme n̄kpọ oro ẹdide ata akpan n̄kpọ ke usenubọk.
Kere ban̄a se ekpepde oto se iwọrọde fi. Ke uwụtn̄kpọ, ndi mfịna fo anam ọfiọk nsio nsio usụn̄ emi ekemede ndiyọ mfịna? Ndi emekeme ndida ifiọk emi n̄n̄wam mbon en̄wen?
Se Anade Eti: Ekeme ndidi inyeneke se ekemede ndinam mban̄a ndusụk se iwọrọde fi, edi enyene n̄kpri n̄kpọ oro akpanamde man ekeme ndiyọ.