Ndi “Abasi Ọkọnọ Odudu Spirit Ẹda Ẹwet” Bible?

NDI emenịm ke Bible edi Ikọ Abasi? Mîdịghe ndi ekere ke enye onyụn̄ etie nte n̄wed eken emi ẹwetde ekikere owo?

Ndusụk owo ẹnịm ke Bible edi Ikọ Abasi, edi ndusụk owo inịmke. Idem ndusụk mbon oro ẹdọhọde ke idi Christian idaha Bible nte Ikọ Abasi. Ke uwụtn̄kpọ, ndụn̄ọde kiet oro ẹkenamde ke United States ke 2014 owụt ke owo usụkkiet ke otu kpukpru owo duop emi ẹdọhọde ke idi Christian ẹnịm ke Bible edi n̄wed Abasi. Edi owo kiet ke otu kpukpru owo ition emi ẹkebụpde m̀mê Bible edi Ikọ Abasi ẹkedọhọ ke Bible edi n̄wed n̄ke, mbụkeset, ye item owo. Edi 2 Timothy 3:16 ọdọhọ ke “Abasi ọkọnọ odudu spirit ẹda ẹwet” Bible. Nso ke emi ọwọrọ?

“ABASI ỌKỌNỌ ODUDU SPIRIT ẸDA ẸWET” BIBLE

Bible enyene n̄kpri n̄wed 66, ndien n̄kpọ nte owo 40 ẹkewet enye ke ufan̄ isua 1,600. Kpa ye oro edide mme owo ẹkewet Bible, ‘Abasi ọkọnọ mmọ odudu spirit esie ẹda ẹwet.’ Emi ọwọrọ ke kpukpru se isịnede ke Bible oto Abasi. Udiana Peter 1:21 ọdọhọ ke “mme owo [ẹketịn̄] ikọ eke otode Abasi nte edisana spirit adade mmọ usụn̄.” Ke nditịn̄ ke usụn̄ en̄wen, Abasi akada edisana spirit esie anam mme andiwet Bible ẹdiọn̄ọ se ẹkpewetde. Ẹkeme ndimen emi ndomo ye anam-mbubehe emi etịn̄de se enye oyomde ewetn̄wed esie ewet ke leta. Idịghe ewetn̄wed oro enyene leta oro, owo emi eketịn̄de se enye ewetde enyene.

Angel eketịn̄ se Abasi oyomde ẹwet ọnọ ndusụk mme andiwet Bible. Ndusụk mmọ ẹkewet n̄kukụt oro Abasi okowụtde mmọ. Ndusụk ẹwet se Abasi okowụtde mmọ ke ndap. Ndusụk ini, Abasi ama esinyịme mme owo ẹda ikọ idemmọ ẹwet se enye ọkọdọhọde mmọ ẹwet, edi ke mme ini eken enye ama esitịn̄ nnennen se anade mmọ ẹwet. Inamke n̄kpọ m̀mê didie ke Abasi akanam mmọ ẹdiọn̄ọ se ẹkpewetde, se Abasi ọkọdọhọde ke mmọ ẹkewet, iwetke ekikere idemmọ.

Edi isan̄a didie idiọn̄ọ ke Abasi ọkọnọ mmọ odudu spirit esie ẹda ẹwet Bible? Yak ineme n̄kpọ ita emi owụtde ke Bible edi Ikọ Abasi.