Diọn̄ọ Akpanikọ
Ntak Esisọn̄de
Mme owo ẹsisari mbon en̄wen ke ntak nsu emi mmọ ẹkopde ẹban̄a mmọ. Se ndusụk uwụtn̄kpọ mi:
Ndusụk owo isimaha ndida iban ke utom sia mmọ ẹkere ke iban idiọn̄ọke n̄kpọ iban̄a masịn m̀mê ifiọk ntaifiọk.
Ke Europe eset, ẹma ẹdori mme Jew ikọ ẹte ke mmọ ẹsan̄a ẹdọn̄ ibọkn̄kpa ke obube mmọn̄ ẹnyụn̄ ẹsuan udọn̄ọ. Ke ini ukara Nazi, ẹma ẹfiak ẹdori mme Jew ikọ ẹte ke mmọ ẹnam n̄kpọ ọson̄ ke Germany. Oro ama anam ẹsari m̀mê ẹsua mme Jew idem tutu esịm mfịn emi.
Ediwak owo ẹsikere ke kpukpru owo oro ẹbiomode ndo ẹsifofụhọ kpukpru ini mîdịghe ẹsisọp iyatesịt.
Mbon emi ẹnịmde utọ nsu oro ẹsida se mmọ ẹkụtde m̀mê se mbon en̄wen ẹtịn̄de ẹwụt ke mmimọ imenen. Mmọ ẹsinyụn̄ ẹda ke mbon oro mînịmke se mmimọ itin̄de idiọn̄ọke n̄kpọ.
Se Bible Etịn̄de
“Ifọnke ukpọn̄ [m̀mê, owo] anana ifiọk.”—MME N̄KE 19:2.
Nso ke emi ekpep nnyịn? Edieke nnyịn mîdiọn̄ọke n̄kpọ iban̄a mbon en̄wen, imekeme ndinam se mînenke. Edieke nnyịn inịmde nsu, iyasari mme owo.
Nte Ndifiọk Akpanikọ Ekemede Ndin̄wam Nnyịn
Ke ini idiọn̄ọde akpanikọ iban̄a mme owo, nnyịn idinịmke nsu oro ẹsude ẹdian mmọ. Ke ini idide idifiọk ke se ẹketịn̄de ẹban̄a mbon oro ẹtode ebiet en̄wen edi nsu, eyesidi ima ikop ẹtịn̄de idiọk ẹban̄a mbon oro ẹtode ebiet en̄wen, nnyịn itịm idụn̄ọde.
Se Akpanamde
Ti ke idịghe kpukpru owo ẹsinam se ẹsitịn̄de ẹban̄a mbon edem mmọ.
Ti ke idig̣he kpukpru n̄kpọ ke ọfiọk aban̄a mbon en̄wen.
Kụt ete ke se okopde aban̄a mbon en̄wen edi akpanikọ.