Se Ntaifiọk Mîdiọn̄ọke
Ekeme nditie nte ke ntaifiọk ẹkpep kpukpru n̄kpọ ẹban̄a ekondo. Edi enyene ediwak akpan mbụme emi mmọ mîkemeke ndibọrọ.
Ndi ntaifiọk ẹdiọn̄ọ nte ekondo ye uwem ọkọtọn̄ọde? Idiọn̄ọke. Ndusụk owo ẹdọhọ ke ntaifiọk oro ẹsikpepde n̄kpọ ẹban̄a ekondo ẹkeme nditịn̄ nte ekondo ọkọtọn̄ọde. Edi enyene se ataifiọk kiet emi ekerede Marcelo Gleiser eketịn̄de aban̄a n̄kpọ emi. Enye edi prọfesọ emi esikpepde n̄kpọ aban̄a ekondo ke Dartmouth College onyụn̄ esịne ke otu mbon emi mîdọn̄ke enyịn m̀mê Abasi odu m̀mê idụhe. Enye ọkọdọhọ ete: ‘Ntaifiọk ikemeke nditịn̄ nte ekondo ọkọtọn̄ọde.’
N̄ko, n̄wed ntaifiọk emi ẹkotde Science News ọdọhọ ete: ‘Ekeme ndisọn̄ nditịn̄ nnennen nnennen nte uwem ọkọtọn̄ọde ke isọn̄ emi: Ata ediwak ke otu mme n̄kpọeset oro ẹkpedade ẹdiọn̄ọ se iketịbede ke isọn̄ ke nsonso oro idụhe aba.’ Se ntaifiọk ẹtịn̄de emi owụt ke mmọ ikemeke nditịn̄ nte ekondo ye uwem ọkọtọn̄ọde.
Edi owo ekeme ndikere, ‘Edieke edide ẹkebobot mme n̄kpọ, anie okobot mmọ?’ Anaedi mme utọ mbụme emi esitiene afịna fi: ‘Edieke edide Abasi emi okobotde kpukpru n̄kpọ odu, edieke enye enyenede ọniọn̄ onyụn̄ amade mme owo, ntak emi enye akpayakde mmọ ẹbọ ufen? Ntak emi mme ufọkabasi ẹwakde ntem? Ntak emi Abasi ayakde mbon emi ẹdọhọde ke ikpono enye ẹnam ndiọi n̄kpọ?’
Ntaifiọk ikemeke ndibọrọ mme mbụme emi. Edi oro iwọrọke ke ibọrọ idụhe. Ata ediwak owo ẹkụt ke Bible ọbọrọ mme mbụme emi ke nnennen usụn̄.
Edieke akpamade ndikụt ntak emi ndusụk ntaifiọk emi ẹdade ini ẹkpep Bible ẹnịmde ke Abasi okobot mme n̄kpọ, mbọk ka jw.org/efi. Yom mme vidio emi ibuotikọ ẹdide, Se Nsio Nsio Ntaifiọk Ẹtịn̄de Ẹban̄a Nte Uwem Ọkọtọn̄ọde.