Mbon Ọniọn̄ Nditọ Gibeon

EDIWAK obio ke Caʹnaan eben̄e idem ke emi ndin̄wana ye Israel. Mmọ ẹkere ẹte imekeme ndikan. Edi mbon obio Gibʹe·on ẹdude ẹkpere ikereke ntre. Mmọ ẹnịm ẹte Abasi ke an̄wam nditọ Israel, ndien mmọ iyomke ndin̄wana ye Abasi. Ntre nte ọmọfiọk se mbon Gibʹe·on ẹnamde?

Mmọ ẹbiere ndinam etie nte n̄kpọ emi mmọ ẹdụn̄de ke ata anyan usụn̄. Ntre ndusụk owo oro ẹsịne ntaha ọfọn̄ ye ntaha ikpa ukot. Mmọ ẹtan̄ ntaha ekpat ẹnọ mme ass mmọ ẹbiom, ẹnyụn̄ ẹda ndusụk n̄kani nsasat uyo. Ndien mmọ ẹbịne Joshua ẹkedọhọ: ‘Nnyịn ito ata anyan idụt, koro nnyịn ikokopde iban̄a akwa Abasi mbufo, Jehovah. Nnyịn ima ikop kpukpru se enye akanamde ọnọ mbufo ke Egypt. Ntre mbon nnyịn ẹdọhọ nnyịn ida ndusụk udia idaha isan̄ ndien ididọhọ mbufo: “Nnyịn idi ifụn mbufo. Ẹn̄wọn̄ọ ẹte mbufo idin̄wanake ekọn̄ ye nnyịn.” Mbufo ẹmekeme ndikụt nte mme ọfọn̄ nnyịn ẹtahade oto anyan isan̄ nnyịn, n̄ko nte uyo nnyịn ẹkani ẹnyụn̄ ẹsat.’

Joshua ye mbon eken ẹnịm mbon Gibʹe·on ke akpanikọ. Ntre mmọ ẹn̄wọn̄ọ ete idin̄wanake ye mmọ. Edi usen ita ẹbede, mmọ ẹfiọk ẹte, mbon Gibʹe·on ẹnen̄ere ẹdụn̄ ẹkpere.

Joshua obụp mmọ, ‘Nsinam mbufo ẹkesiande nnyịn ẹte mbufo ẹto anyan idụt?’

Mbon Gibʹe·on ẹbọrọ: ‘Nnyịn ikanam ntre sia ikokopde ite Jehovah Abasi mbufo ama ọn̄wọn̄ọ ndinọ mbufo ofụri isọn̄ Caʹnaan emi. Ntre nnyịn ima ifehe ndịk nte mbufo ẹyewot nnyịn.’ Edi nditọ Israel ẹma ẹnịm un̄wọn̄ọ mmọ, ndien mmọ iwotke mbon Gibʹe·on. Utu ke oro, mmọ ẹnam mmọ ẹdi ifụn mmọ.

Edidem Jerusalem ayat esịt koro mbon Gibʹe·on ẹnam emem ye Israel. Ntre enye ọdọhọ ndidem inan̄ efen ete: ‘Ẹdin̄wam mi n̄wana ye Gibʹe·on.’ Ndien oro ke ndidem ition emi ẹnam. Nte mbon Gibʹe·on ẹma ẹnyene ọniọn̄ ndinam emem ye Israel, esịnde ndidem emi ke emi edi ndin̄wana ye mmọ? Nnyịn iyekụt.