Eyeneren emi Ekedede Idap

OH! OH! nso itịbe mi? Nte idem otịm abiak eyeneren emi anade ke isọn̄? Sese! Kiet ke otu owo ẹwọrọde ẹto ufọk, edi Paul! Nte afo emekeme ndikụt Timothy do n̄ko? Nte eyeneren oro oto ke window ọduọ?

Ih, oro edi kpasụk se itịbede. Paul eketịn̄ ikọ ọnọ mme mbet mi ke Troʹas. Enye ama ọfiọk ete imọ idikemeke ndikụt mmọ aba ke anyan ini koro akanade enye ọkpọn̄ ke ubom ke ndan̄ nsiere. Ntre enye akaiso etịn̄ ikọ tutu ufọt okoneyo.

Ọfọn, eyeneren emi ẹkotde Euʹty·chus eketie ke window, ndien enye eyet idap. Enye ọwọrọ oto window ọduọ, ikpehe ufọk enyọn̄ ita ke isọn̄! Ntre emekeme ndikụt ntak esịt otịmerede mme owo. Ke mme owo oro ẹmende eyeneren emi, otịbe kpa nte mmọ ẹkedịghede. Enye akpa!

Ke Paul okụtde ete ke eyeneren emi akpa, enye ana enye ke idem afat enye. Ndien ọdọhọ: ‘Ẹkukere. N̄kpọ inamke enye!’ Ndien edi ntre! Utịbe n̄kpọ ke edi! Paul anam enye eset! Ekese idara odu ke otu owo oro.

Mmọ kpukpru ẹfiak ẹdọk enyọn̄ ẹkedia udia. Paul akaiso etịn̄ iko tutu eyo esiere. Edi ana edi Euʹty·chus iyetke aba idap! Ekem, Paul, Timothy ye mmọ oro ẹsan̄ade ye mmọ ẹdụk ubom. Nte ọmọfiọk ebiet mmọ ẹkade?

Paul ke osụk okụre isan̄ ukwọrọikọ esie ọyọhọ ita, ndien enye odu ke usụn̄ unyọn̄. Ke isan̄ emi, Paul ama etie isua ita ke obio Ephʹe·sus ikpọn̄. Ntre, emi edi isan̄ ebịghide akan udiana isan̄ esie.

Ke ema ẹkekpọn̄ Troʹas, ubom ebet ke Mi·leʹtus esisịt. Sia Ephʹe·sus odude itiat ifan̄ ko, Paul ọdọn̄ ẹkekot mbiowo ke esop edi ke Mi·leʹtus man enye ekpetịn̄ ikọ ọnọ mmọ ke akpatre ini. Ke oro ebede, ke ekemde ini ubom ndisio, mmọ ẹfụhọ didie ntem ndikụt Paul ọnyọn̄de!

Ke akpatre ubom afiak edi Caes·a·reʹa. Ke ini Paul etiede mi ke ufọk mbet oro Philip, prọfet Agʹa·bus ọnọ Paul ntọt. Enye ete ke ẹyenam Paul edi owo n̄kpọkọbi ke enye edide Jerusalem. Ndien ke akpanikọ, emi edi se itịbede. Do, ke ama okodu ke n̄kpọkọbi ke isua iba ke Caes·a·reʹa, ẹdọn̄ Paul aka Rome ndida ke ikpe ke iso Caesar andikara Rome. Yak ise se itịbede ke isan̄ ndika Rome.