Ubom Osịp ke Isuo Kiet

SESE! ubom oro odu ke afanikọn̄! Enye ke anuaha mbak mbak! Nte omokụt mme owo oro ẹfrọde ẹdụk mmọn̄? Ndusụk mmọ ẹwewọk ẹsịm obot. Ndi Paul edi oro? Yak ifiọk se iketịbede inọ enye.

Ti, ke isua iba, ẹmụm Paul nte owo n̄kpọkọbi ke Caes·a·reʹa. Ekem ẹsịn enye ye mbon n̄kpọkọbi efen ke ubom, ndien mmọ ẹdaha Rome. Ke mmọ ẹbede ẹkpere isuo Crete, enyene ndịk oyobio osịm mmọ. Ofụm otịm ọsọn̄ tutu mme owo oro ikemeke ndiwat ubom. Mmọ ikemeke ndikụt utịn ke uwemeyo mme mme ntantaọfiọn̄ ke okoneyo. Ke akpatre, ke ediwak usen ẹbede, mbon ubom ẹduọk kpukpru idotenyịn edibọhọ.

Ekem, Paul adaha ada ọdọhọ: ‘Owo mbufo ndomokiet ididuọkke uwem esie; ubom ikpọn̄ikpọn̄ editak. Koro ke okoneyo emi ebede angel Abasi osịm mi ndien ọdọhọ ete, “Kufehe ndịk Paul! Ana afo ada ke iso Caesar andikara Rome. Ndien Abasi eyenyan̄a kpukpru mme andiwat ye afo.”’

N̄kpọ nte ufọt okoneyo ke ọyọhọ usen 14 nte oyobio ọkọtọn̄ọ, mme awat ubom ẹkụt ete mmọn̄ itịmke itụn̄ọ! Ke ntak ndịk edituaha mme itiat ke ekịm, mmọ ẹduọn̄ọ mme ukwak uwụk ubom. Ke ndan̄nsiere mmọ ẹkụt itụn̄ mmọn̄ esụk. Mmọ ẹbiere ndidomo ndiwat ubom n̄kosịm esụk do.

Ọfọn, ke mmọ ẹkperede mben mmọn̄ ẹkan, ubom atuaha ntan ọsọn̄ọ afaha. Do mme mbufụt mmọn̄ ẹtọn̄ọ ndinuak enye, ndien ubom ọtọn̄ọ ndinuaha mbak mbak. Etubom ekọn̄ emi esede otu owo enyịn ọdọhọ: ‘Kpukpru mbufo emi ekemede ndiwọk ewọk, ẹfrọ ẹdụk inyan̄ ẹbemiso ẹwọk ẹka obot. Mbufo eken ẹtiene mmọ edem ẹfrọ ẹdụk ẹnyụn̄ ẹmụm mbak ubom ẹyịre do.’ Ndien oro ke mmọ ẹnam. Ke usụn̄ emi, kpukpru mme owo 276 ẹmi ẹkedude ke ubom ẹsịm obot ke ifụre, kpasụk nte angel oro ọkọn̄wọn̄ọde.

Ẹkot isuo oro, Malta. Mme owo ẹtịm ẹfọn ido, ndien mmọ ẹse ẹban̄a mmọ oro ẹwọrọde ke ubom. Ke eyo ọfọnde akan, ẹsịn Paul ke ubom efen ẹda ẹka Rome.