Jesus Asan̄a ke Enyọn̄ Mmọn̄

Idịghe ndikọk udọn̄ọ ye ndinam owo eset kpọt ke Jesus ekekeme ndinam, enye ama ekeme nditịn̄ ikọ yak oyobio ye edịm ẹtre. Ke Jesus ama ọkọbọn̄ akam ke obot ama, enye ama ada okụt oyobio ọwọrọde ke Inyan̄ Galilee. Mme apostle esie ẹkedu ke inyan̄ oro, ke ẹdomo ndiwat ubom mmọ mbe. Jesus ama osụhọde ke obot oro asan̄a ke enyọn̄ mmọn̄ ebịne mmọ. Ini mme apostle ẹkụtde nte owo asan̄ade ke enyọn̄ mmọn̄, ndịk ama anam mmọ etieti. Edi Jesus ama ọdọhọ mmọ ete: ‘Ẹkûkop ndịk. Ami ke edi.’

Peter ama ọdọhọ ete: ‘Ọbọn̄ ekpedi afo ke edi, dọhọ mi nsan̄a mbịne fi.’ Jesus ama ọdọhọ enye edi. Peter ama ọwọrọ asan̄a ke enyọn̄ mmọn̄ ebịne Jesus kpa ye ọkpọsọn̄ oyobio oro. Edi ke ini Peter ekperede Jesus, Peter ama ese oyobio oro, ntre ndịk ama anam enye. Enye ama ọtọn̄ọ ndiden̄ onyụn̄ ofiori ete: ‘Ọbọn̄, nyan̄a mi!’ Jesus ama omụm enye ubọk onyụn̄ ọdọhọ ete: ‘Nso ikanam ọtọn̄ọ ndiyịk? Ndi unyeneke mbuọtidem aba?’

Ndondo emi Jesus ye Peter ẹdụkde ubom, oyobio oro ama odobo. Ekere ke eketie mme apostle didie ke idem? Mmọ ẹma ẹdọhọ Jesus ẹte: “Ke akpanikọ, afo edi Eyen Abasi.”

Idịghe akpa Jesus anamde oyobio odobo edi emi. Isan̄ kiet emi enye ye mme apostle esie ẹkewatde ẹbe Inyan̄ Galilee emi, enye ama osụhọde ana ke etak ubom ede. Ini enye osụk edede, akwa oyobio ama ọwọrọ, mmọn̄ onyụn̄ ọtọ odụk ubom mmọ tutu ọyọhọ ubom oro. Mme apostle ẹma ẹdemede Jesus ẹnyụn̄ ẹfiori ẹte: ‘Andikpep imọn̄ ikpa! Nyan̄a nnyịn!’ Jesus ama adaha ada ọdọhọ inyan̄ oro ete: ‘Na sụn̄!’ Kpa idahaoro, oyobio ama odobo, inyan̄ onyụn̄ ana sụn̄. Jesus ama ọdọhọ mmọ ete: ‘Ndi mbufo inyeneke mbuọtidem?’ Mme apostle ẹma ẹtịn̄ ke otu idemmọ ẹte: ‘Kamse, ofụm ye inyan̄ ẹkop uyo esie.’ N̄kpọ oro ama ekpep mmọ ke edieke mmọ ẹnen̄erede ẹbuọt idem ye Jesus, ke n̄kpọ ndomokiet idinamke mmọ ndịk.