Ibuot 15
Didie ke Jehovah Ada Esop Esie Usụn̄?
1. Nso ntọt aban̄ade esop Jehovah ke Bible ayarade, ndien ntak emi enye edide akpan n̄kpọ ọnọ nnyịn-e?
EBEDE ke N̄wed Abasi eke odudu spirit, Jehovah ọmọnọ nnyịn mme ukpọn̄ ukpọn̄ ndise aban̄a utịbe utịbe esop esie eke heaven. (Isa. 6:2, 3; Ezek. 1:1, 4-28; Dan. 7:9, 10, 13, 14) Okposụkedi nnyịn mîkemeke ndikụt mme edibotn̄kpọ eke spirit, enye amanam nnyịn ifiọk mme usụn̄ ẹmi mme utom ndisana angel ẹtụkde mme ata andituak ibuot ke isọn̄. (Gen. 28:12, 13; 2 Ndi. 6:15-17; Ps. 34:7; Matt. 13:41, 42; 25:31, 32) Bible n̄ko etịn̄ aban̄a ubak esop Jehovah oro ẹkụtde ke enyịn onyụn̄ an̄wam nnyịn ndifiọk nte enye adade enye usụn̄. Edieke nnyịn ke akpanikọ inyenede ifiọk eke spirit iban̄a mme n̄kpọ ẹmi, emi eyen̄wam nnyịn ‘ndisan̄a ke ido nte odotde Ọbọn̄, inemde Enye esịt ke kpukpru usụn̄.’—Col. 1:9, 10.
NDIDIỌN̄Ọ IKPEHE ORO ẸKỤTDE KE ENYỊN
2. Ọtọn̄ọde ke Pentecost eke 33 E.N. nso idi esop Abasi?
2 Ke isua 1,545 idụt Israel ekedi esop Abasi. Edi mmọ ẹma ẹkpu ndinịm Ibet ediomi ẹnyụn̄ ẹsịn Eyen Abasi. Ntre Jehovah ama anam obufa esop edidu, emi enye akanamde obufa ediomi. Ẹdiọn̄ọ esop emi ke N̄wed Abasi nte “n̄wanndọ” Christ, emi owo 144,000 oro Abasi emekde ndidiana ye Eyen esie ke heaven ẹnamde. (Eph. 5:22-32; Edi. 14:1; 21:9, 10) Ẹkeyet akpa ke otu mmọ aran ke edisana spirit ke ini Pentecost, 33 E.N. Ebede ke edisana spirit Jehovah ama ọnọ in̄wan̄în̄wan̄ uyarade nte ke emi ekedi esop oro imọ idahaemi ididade ke ndiyọhọ uduak imọ.—Heb. 2:2-4.
3. Mmanie mfịn ẹnam esop Jehovah oro ẹkụtde ke enyịn?
3 Mfịn nsụhọ 144,000 kpọt ẹdu ke isọn̄. Edi, ke ndisu prọfesi Bible, ẹmeda akwa otuowo eke “mme erọn̄ en̄wen” ẹdisịn ke okopodudu ebuana ye mmọ. Jesus Christ, kpa Eti Ekpemerọn̄, ememen “mme erọn̄ en̄wen” ẹmi adian ye mbon oro ẹdide nsụhọ mme anditiene enye oro ẹbonde ke spirit man mmọ ẹnam “otuerọn̄ kiet” kpọt ke idak esie nte “ekpemerọn̄ kiet” oro mmọ ẹnyenede. (John 10:11, 16; Edi. 7:9, 10) Kpukpru mmọemi ẹnam esop kiet oro adianade kiet, kpa esop Jehovah oro ẹkụtde ke enyịn mfịn.
NDUTỊM UKARA ABASI
4. Anie ada esop emi usụn̄, ndien didie?
4 Ikọ N̄wed Abasi oro “ufọk oduuwem Abasi” anam enyeemi adade enye usụn̄ an̄wan̄a. Esop emi edi eke ukara Abasi, m̀mê enyeoro Abasi akarade. Jehovah ọnọ ikọt esie ndausụn̄ ebe ke enyeoro Enye emekde ndidi ibuot oro enyịn mîkwe nnọ esop, kpa Ọbọn̄ Jesus Christ, onyụn̄ ebede ke Ikọ Esie eke odudu spirit, kpa Bible.—1 Tim. 3:14, 15; Eph. 1:22, 23; 2 Tim. 3:16, 17.
5. (a) Didie ke editie oro ẹtiede ke heaven ẹnọ esop ndausụn̄ okowụt idem ke akpa isua ikie? (b) Nso iwụt ite ke Jesus osụk edi ibuot esop?
5 Utọ ndausụn̄ ukara Abasi oro ama owụt idem mfọn mfọn ke ini edisana spirit ekedemerede mme akpa andibuana ke esop esịn ke edinam ke Pentecost eke 33 E.N. (Utom 2:1-4, 32, 33) Enye ama owụt idem ke ini angel Jehovah akadade usụn̄ ke mme n̄kpọntịbe oro akadade okosịm edisuan eti mbụk nsịm Africa. (Utom 8:26-39) Kpasụk ntre, ke ini uyo Jesus ọkọnọde ndausụn̄ ke ini Saul eke Tarsus akakabarede esịt ye n̄ko ke ini ẹketọn̄ọde utom isụn̄utom ke otu mme Gentile. (Utom 9:3-7, 10-17; 10:9-16, 19-23; 11:12) Edi owo ikọnọhọ ndausụn̄ oro ẹyomde ke mme utọ n̄wọrọnda usụn̄ ntre kpukpru ini. Nte ini akade owo ikokopke mme uyo ẹtode heaven aba, mme angel ikowụtke mme owo idem aba n̄ko mme utịbe utịbe enọ eke spirit ikodụhe aba. Edi Jesus ama ọn̄wọn̄ọ ọnọ mme anam-akpanikọ anditiene enye ete: “Sese, Ami ndodu ye mbufo kpukpru ini, tutu osịm utịt ererimbot,” ndien mme akpanikọ ẹwụt ẹte ke enye odu. (Matt. 28:20; 1 Cor. 13:8) Ikụreke ke Mme Ntiense Jehovah ndinyịme itieibuot esie, edi ana in̄wan̄în̄wan̄ nte ke mmọ ikpekemeke ndikaiso ntan̄a etop Obio Ubọn̄ ke ẹsobode ọkpọsọn̄ usua ke un̄wam esie mîkpodụhe.
6. (a) Mmanie ẹnam “asan̄autom emi anamde akpanikọ, onyụn̄ enyenede ọniọn̄,” ndien ntak-a? (b) Nso utom ke enye ọkọnọ “asan̄autom” oro?
6 Esisịt ini mbemiso n̄kpa Jesus enye ama etịn̄ ọnọ mme mbet esie aban̄a “asan̄autom emi anamde akpanikọ, onyụn̄ enyenede ọniọn̄” oro enye nte Eteufọk edinọde akpan mbiomo. “Asan̄autom” oro, nte ekemde ye utịn̄ikọ Jesus, ekenyene ndidu ke ini Ọbọn̄ akadahade ọnyọn̄ heaven ndien ekenyene ndisụk ndu ke uwem ke ini edifiak ndi Christ. Utọ editịn̄ mban̄a oro ikpekemeke ndidot ye owo kiet. Edi enye odot ye anam-akpanikọ esop Christ oro ẹyetde aran ke ẹsede enye nte otu. Jesus ama ọfiọk ete ke imọ imọn̄ idep mmọ ke iyịp imọ, ntre enye nte odotde ama etịn̄ aban̄a mmọ ke otu nte “asan̄autom” esie. Enye ama ọnọ mmọ utom ndinam, ọdọn̄de kpukpru mmọ ndinam mme mbet ndien ekem ẹkaiso ke ndibọk mmọemi ke n̄kan̄ eke spirit, ẹnọde mmọ “udia [eke spirit] ke edikem ini.” Edisana spirit ama ọsọn̄ọ edimek oro ẹkemekde mmọ ke Pentecost eke 33 E.N.—Matt. 24:45-47; 28:19, 20; 1 Cor. 6:19, 20; men Isaiah 43:10 domo.
7. (a) Mbiomo ewe eke ẹkponde ẹkan ke “asan̄autom” emi enyene idahaemi? (b) Ntak emi nte nnyịn inamde n̄kpọ iban̄a item oro otode usụn̄ emi edide akpan n̄kpọ-ọ?
7 Ke edifiak ndi Eteufọk, edieke “asan̄autom” oro akanamde utom esie ke edinam akpanikọ, ẹyenọ enye mbiomo eke ẹkponde ẹkan. Mme isua oro ẹketienede ẹkenyene ndidi ini edinọ ikọ ntiense ke ofụri ererimbot mban̄a Obio Ubọn̄, ndien ẹnyene nditan̄ “akwa otuowo” mme andituak ibuot nnọ Jehovah mbok ye ekikere edinịm mmọ uwem mbe “akwa ukụt.” (Matt. 24:14; Edi. 7:9, 10) Mmọemi, n̄ko, ẹyeyom udia eke spirit, ndien otu “asan̄autom” emi, kpa mme asan̄autom Christ oro ẹyetde aran ke spirit ẹdinọ mmọ udia emi. Man inem Jehovah esịt, oyom nnyịn ibọ item oro enye ọnọde ebe ke usụn̄ emi inyụn̄ inam n̄kpọ ke ọyọhọ n̄kemuyo ye enye.
8, 9. (a) Ke akpa isua ikie nso ndutịm ikodu inọ nte ẹbierede mme mbụme ẹban̄ade ukpepn̄kpọ ye edinọ ndausụn̄ oro ẹyomde kaban̄a edikwọrọ eti mbụk? (b) Nso mbiet ndutịm oro idu mfịn?
8 Ke ndusụk ini, nte ededi, mme mbụme ẹban̄ade ukpepn̄kpọ ye ndutịm ẹkeme ndidaha nda. Nso ndien? Ọyọhọ ibuot 15 ke Utom Mme Apostle etịn̄ nte ẹkebierede eneni oro akaban̄ade se ẹkeyomde ẹto mme Gentile oro ẹkekabarede esịt. Ẹma ẹda enye ẹbịne mme apostle ye nyobiowo ke Jerusalem, ẹmi ẹkenamde n̄kpọ nte ibuot otu ukara. Nyobiowo oro ikedịghe mme owo oro mîkemeke ndinam ndudue; mmọ ikedịghe mme owo oro akanam mînamke ndudue. (Men N̄wed Mbon Galatia 2:11-14 domo.) Edi Abasi ama ada mmọ anam n̄kpọ. Mmọ ẹma ẹkere ẹban̄a se N̄wed Abasi eke odudu spirit eketịn̄de aban̄a eneni oro mmọ ẹkekamade ke ubọk ọkọrọ ye uyarade edinam eke odudu spirit Abasi ke ndiberede an̄wautom mme Gentile, ndien ekem mmọ ẹma ẹnọ ubiere. Abasi ama ọdiọn̄ ndutịm oro. (Utom 15:1-29; 16:4, 5) Otode ke ibuot otu oro, ẹma ẹsio mme owo n̄ko ẹdọn̄ man ẹketat edikwọrọ eti mbụk ke n̄kemuyo ye se Ọbọn̄ ke idemesie ọkọnọde odudu.—Utom 8:14; Gal. 2:9.
9 Ke eyo nnyịn nditọete oro ẹyetde aran ke spirit oro ẹtode nsio nsio ikpehe isọn̄ ẹnam Otu Ukara. Enye odu ke ibuot itieutom ofụri ererimbot eke Mme Ntiense Jehovah. Ke edinam akpanikọ enye anam mme ufọn utuakibuot akpanikọ akaiso ke idak itieibuot Jesus Christ. Nditọete ẹmi ẹbuana idaha ekikere apostle Paul, oro, ke ini ọnọde item eke spirit ẹsọk ekemmọ mme Christian, ekewetde ete: “Idịghe nte nnyịn idedi mme andikara mbufo ke n̄kpọ mbuọtidem, edi nte idedi mme andin̄wam mbufo ndinyene idatesịt. Koro ke mbuọtidem ke mbufo ẹdada.”—2 Cor. 1:24.
10. (a) Didie ke ẹbiere mbon oro ẹdidide mbiowo m̀mê mme asan̄autom unamutom? (b) Ntak emi nnyịn ikpenen̄erede idiana kiet ye mbon oro ẹmekde ẹnọ mme utọ itie oro-o?
10 Mme Ntiense Jehovah ke ofụri ererimbot ẹdiọn̄ọ ndutịm ukara Abasi emi. Kpukpru esop n̄kann̄kụk mmọ ẹnam n̄kpọ ke n̄kpet n̄kpet edidianakiet ye enye. Mmọ ẹberi edem ke Otu Ukara ndinọ ndausụn̄ kaban̄a edimek mbiowo ye mme asan̄autom unamutom man ẹkụt ẹte ke mme esop ẹsan̄a mfọn mfọn. Ke nso isọn̄ ke ẹmek mme owo ẹnọ utọ itieutom emi? Ẹwet se ẹyomde in̄wan̄în̄wan̄ ke Bible. Mbiowo oro ẹtorode owo ẹnọ ye mbon oro ẹnọde odudu ndinam edimek ẹnyene akwa mbiomo ke iso Abasi ndisọn̄ọ nyịre ke mmọemi. (1 Tim. 3:1-10, 12, 13; 5:22; Titus 1:5-9) Edinam ukpek owo ndimenede ubọk nnọ owo idụhe ke otu mbon esop m̀mê usịn n̄wed ekededi ke esop. Utu ke oro, ke n̄kemuyo ye se mme apostle ẹkenamde ke ini ẹkenamde mme edimek ke akpa isua ikie, mme esenyịn oro ẹnyenede mbiomo nditoro owo nnọ, ye mbon oro ẹnamde mme edimek ke ukperedem, ẹsibọn̄ akam ẹben̄e un̄wam spirit Abasi ẹnyụn̄ ẹyom ndausụn̄ ẹto Ikọ esie eke odudu spirit. (Utom 6:2-4, 6; 14:23; men Psalm 75:6, 7 domo.) Ebede ke nte nnyịn inamde n̄kpọ iban̄a ndausụn̄ oro mbiowo ẹnọde, nnyịn imekeme ndiwụt esịtekọm oro nnyịn inyenede inọ ima ima enọ oro Christ ọnọde mme “owo [ke] enọ” man ẹn̄wam nnyịn kpukpru ndikabade ndi “kiet ke mbuọtidem.”—Eph. 4:8, 11-16.
11. (a) Mme ọsọn̄urua utom ewe ke iban ẹnam ke ndutịm ukara Abasi? (b) Ini ewe ke oyom mmọ ẹbọbọ ọfọn̄ibuot, ndien ntak-a?
11 N̄wed Abasi ọnọ ndausụn̄ ete ke irenowo ẹkpekama mme itie usenyịn ke esop. Emi isụhọkede iban itie ke baba usụn̄ kiet, koro ediwak mmọ ẹsịne ke otu mme enyene-udeme ke Obio Ubọn̄ heaven. Ke ndinyene iso o-bụt, edisana ido nnyụn̄ ntịn̄ enyịn ke ndise mban̄a mme ubon mmọ, iban Christian nde ẹtip n̄kpọ ẹsịn ke ndinam esop enyene eti enyịn̄. (Titus 2:3-5) Ediwak ini mmo ẹsinam ekese utom ke ndiyom mbufa mbon oro ẹnyenede udọn̄ nnyụn̄ nda mmọ ndiwụt esop. (Ps. 68:11) Edi irenowo oro ẹmekde ẹse ẹban̄a edinọ ukpep ke esịt esop. (1 Tim. 2:12, 13) Ndien edieke irenowo oro ẹdotde ndomokiet mîdụhe ke mbonoesop oro esop odiomide, do n̄wan enyene ndibọbọ ọfọn̄ibuot ke ini etiede ibuot m̀mê ọbọn̄de akam.a Ntem enye owụt ukpono ọnọ ndutịm Jehovah, kpa nte Jesus okonịmde uwụtn̄kpọ ọnọ kpukpru owo ke ndisụk ibuot nnọ Ete esie.—1 Cor. 11:3-16; John 8:28, 29.
12. (a) Nso ekikere ke Bible akpak mbiowo ndinyene kaban̄a idaha mmọ? (b) Ke ata ediye ifet ewe ke kpukpru nnyịn ikeme ndibuana?
12 Ke ererimbot ẹbat owo oro akamade ọwọrọiso itie nte akpan owo, edi ke esịt esop Abasi mbet edi: “Enyeemi ekpride akan ke otu mbufo kpukpru, kpa enye edidi akamba.” (Luke 9:46-48; 22:24-26) Ntre N̄wed Abasi ọnọ mbiowo item ete ẹkpeme mbak ẹdibre odudu ye mbon oro ẹdide inyene Abasi edi, utu ke oro, ẹkabade ẹdi uwụtn̄kpọ ẹnọ otuerọn̄. (1 Pet. 5:2, 3) Idịghe ibat ibat owo oro ẹmekde kpọt, edi kpukpru Mme Ntiense Jehovah, iren ye iban, ẹnyene ata ediye ifet ndida ke ibuot Andikara ofụri ekondo, ke nsụhọdeidem ẹtịn̄de ikọ ke enyịn̄ esie ẹnyụn̄ ẹsiande mme owo ke kpukpru ebiet ẹban̄a Obio Ubọn̄ esie.
13. Ke adade mme itien̄wed Abasi oro ẹsiakde ẹsịn, neme mme mbụme oro ẹnọde ke utịt ikpehe ekikere emi.
13 Nnyịn iyenam ọfọn ke ndibụp idem nnyịn: “Nte nnyịn ke akpanikọ imowụt esịtekọm ke nte Jehovah adade esop esie oro ẹkụtde ke enyịn usụn̄? Nte edu, ikọinua ye edinam nnyịn ẹwụt oro?” Ndikọk ibuot ke mme akpan n̄kpọ oro ẹtienede mi ekeme ndin̄wam nnyịn owo kiet kiet ndinam utọ ndụn̄ọde oro:
Edieke nnyịn ke akpanikọ isụkde idem inọ Christ nte ibuot esop, do, nte ẹwụtde ke mme itien̄wed Abasi oro ẹtienede mi, nso ke nnyịn idinam? (Matt. 24:14; 28:19, 20; Luke 21:34-36; John 13:34, 35)
Ke ukeme mmọ ndidi mme Christian oro ẹn̄wụmde mfri, ke nso udomo ke kpukpru mbon oro ẹdide ubak esop ẹkpeberi edem ke Abasi ye Christ? (John 15:5; 1 Cor. 3:5-7)
Ke ini mbiowo ẹdomode ndinen̄ede ekikere mme owo nnịm man mmọ ẹse mme n̄kpọ nte asan̄ade ekekem ye nte mbon eken ke esop ẹsede, mfọnido mfọnido edikere mban̄a anie ke nnyịn ikpokụt ke n̄kpọ emi? (Eph. 4:7, 8, 11-13; 2 Cor. 13:11)
Ke ini nnyịn ye esịtekọm ibọde enọ eke spirit oro ẹtode otu “asan̄autom” ye Otu Ukara esie, anie ke nnyịn iwut ukpono inọ? Edi nso edieke nnyịn ikpetịn̄de ikọ isa isa iban̄a mmọemi? (Luke 10:16; men 3 John 9, 10 domo.)
Ntak emi nnyịn mîkpokụtke ndudue idiọk idiọk inọ mbiowo oro ẹmekde-e? (Utom 20:28; Rome 12:10)
14. (a) Ebede ke edu oro nnyịn inyenede iban̄a esop ukara Abasi, nso ke nnyịn inam iwụt? (b) Ke afan̄ emi, mme ifet ewe ẹdu ẹnọ nnyịn ndiwụt Devil nte osu nsu nnyụn̄ nnam esịt Jehovah adat?
14 Jehovah anam n̄kpọ ye nnyịn mfịn ebe ke esop esie oro ẹkụtde ke enyịn ke idak Christ nte ibuot oro ẹmekde. Ntre edu oro nnyịn inyenede iban̄a esop emi owụt idaha oro nnyịn idade kaban̄a eneni itie edikara ke usụn̄ emi ẹnamde-nam ẹwụt. (Heb. 13:17) Satan eneni ete ke udọn̄ ọkpọkpọ udori onụk kpukpru nnyịn, nte ke se ibehede nnyịn akpan akpan edi n̄kpọ idem nnyịn. Edi edieke nnyịn ke idatesịt inọde idem nnyịn ndinam n̄kpọ ke usụn̄ ekededi oro ẹyomde, ke adan̄aemi itrede nditịn̄ nnyụn̄ nnam mme n̄kpọ oro ẹdụride ntịn̄enyịn nte mîdotke nnọ idem, nnyịn iwụt ite ke Devil edi osu nsu. Edieke nnyịn imade inyụn̄ ikponode mmọ oro ‘ẹdade usụn̄’ ke otu nnyịn, ikpebede mbuọtidem mmọ edi isịnde ndidi orụk owo oro ‘oyomde mfọn ọnọ idem,’ nnyịn inam esịt Jehovah adat. (Heb. 13:7; Jude 16) Ke ndikọri eti ukpono nnọ esop Jehovah nnyụn̄ nnam utom oro enye ọnọde ndausụn̄ ke ofụri esịt, nnyịn inọ uyarade nte ke Jehovah ke akpanikọ edi Abasi nnyịn ye nte ke nnyịn imadiana kiet ke utuakibuot esie.—1 Cor. 15:58.
[Mme Ikọ idakisọn̄]
a Iyomke n̄wan ọbọbọ ọfọn̄ibuot, nte ededi, ke ini ọkwọrọde ikọ to ke ufọk sịm ufọk, sia mbiomo edikwọrọ eti mbụk enyenede kpukpru Christian. Edi edieke mme idaha ẹyomde ẹte enye onịm ukpepn̄kpọ Bible ke ini ebe esie odude (kpa ibuot esie, idem ọkpọkọm idịghe Christian), enye ekpenyene ndibọbọ ọfọn̄ibuot. N̄ko, edieke, ke san̄asan̄a idaha, erenowo oro ayakde idem ọnọ oro abuanade ye esop odude ke ini enye onịmde ukpepn̄kpọ Bible oro ẹma ẹkebem iso ẹdiomi, enye ekpenyene ndibọbọ n̄kpọ ke ibuot esie, edi eren oro ekpenyene ndibọn̄ akam.
Nneme Ndụn̄ọde
● Nso idi esop Jehovah oro ẹkụtde ke enyịn mfịn? Nso idi uduak esie?
● Anie edi ibuot esop oro ẹmekde? Ebede ke mme ndutịm ewe oro ẹkụtde ke enyịn ke enye ọnọ nnyịn ima ima ndausụn̄?
● Nso eti edu kaban̄a mbiomo ye mme owo ke esop ke nnyịn ikpọkọri?