Ibuot Duopenan̄
Didie ke Jehovah Ada Esop Esie Usụn̄?
1. Nso ntọt aban̄ade esop Jehovah ke Bible ayararede, ndien ntak emi enye edide akpan n̄kpọ ọnọ nnyịn?
NTE Abasi enyene esop? N̄wed Abasi eke odudu spirit asian nnyịn ete ke enye enyene. Ke Ikọ esie, enye ọnọ nnyịn mme mbukpọn̄ mbukpọn̄ ndise aban̄a ubak enyene-uten̄e esop eke heaven oro. (Ezekiel 1:1, 4-14; Daniel 7:9, 10, 13, 14) Okposụkedi nnyịn mîkemeke ndikụt ubak emi, enye enen̄ede otụk ata mme andituak ibuot mfịn. (2 Ndidem 6:15-17) Esop Jehovah n̄ko enyene ubak emi ẹkụtde ke enyịn, ke isọn̄. Bible an̄wam nnyịn ndifiọk se enye edide ye nte Jehovah adade enye usụn̄.
Ndidiọn̄ọ Ubak Oro Ẹkụtde ke Enyịn
2. Nso obufa esop ke Abasi akanam edidu?
2 Ke isua 1,545 idụt Israel ekedi esop Abasi. (Utom 7:38) Edi Israel ama okpu ndinịm mbet Abasi onyụn̄ esịn Eyen esie. Nte utịp, Jehovah ama esịn esop oro onyụn̄ otop enye ọduọk. Jesus ama asian mme Jew ete: “Sese, ẹyak ufọk mbufo ẹkpọn̄ ẹnọ mbufo nte ndon.” (Matthew 23:38) Ekem Abasi ama anam obufa esop edidu, emi enye akadade anam obufa ediomi. Esop emi ekenyene ndisịne owo 144,000 emi Abasi emekde ndidiana ye Eyen esie ke heaven.—Ediyarade 14:1-4.
3. Nso ikada itie ke Pentecost isua 33 E.N. nte in̄wan̄-in̄wan̄ uyarade nte ke Abasi akada obufa esop anam n̄kpọ idahaemi?
3 Ẹma ẹyet akpa mme owo ke otu obufa esop oro aran ke edisana spirit Jehovah ke Pentecost isua 33 E.N. Nnyịn ikot iban̄a n̄wọrọnda n̄kpọntịbe oro ite: “Ekem ke ini esịmde usen Pentecost, kpukpru mmọ ẹdu ọtọ kiet. Ndien idaha kiet uyom oto ke enyọn̄ edi, ebiet uyom ata ọkpọsọn̄ oyobio eke efịmede, enye onyụn̄ ọyọhọ ofụri ufọk oro mmọ ẹtiede ke esịt. Mmọ ẹnyụn̄ ẹkụt mme edeme eke ẹsakde ikan̄, nte ẹdemede idem ẹdoro mmọ ke ibuot, edeme kiet ke owo kiet, edeme kiet ke owo kiet. Ndien Edisana Spirit ọyọhọ kpukpru mmọ ke idem.” (Utom 2:1-4) Ntem spirit Abasi ama ọnọ in̄wan̄-in̄wan̄ uyarade nte ke emi ekedi otu mme owo oro Abasi edidade ọyọhọ uduak esie idahaemi ke idak ndausụn̄ Jesus Christ ke heaven.
4. Mmanie mfịn ẹnam esop Jehovah oro ẹkụtde ke enyịn?
4 Mfịn, nsụhọ 144,000 kpọt ẹdu ke isọn̄. Edi ke edisu ntịn̄nnịm ikọ Bible, ẹmeda ediwak miliọn “akwa otu owo” eke “mme erọn̄ en̄wen” ẹdidian ye nsụhọ oro ẹyetde aran. Jesus, kpa Eti Ekpemerọn̄, ememen mme erọn̄ en̄wen emi adian ye nsụhọ oro man mmọ ẹnam otuerọn̄ kiet kpọt ke idak esie nte Ekpemerọn̄ kiet. (Ediyarade 7:9; John 10:11, 16) Kpukpru mmọ emi ẹnam esop kiet oro adianade kiet, kpa esop Jehovah emi ẹkụtde ke enyịn.
Ndutịm Ukara Abasi
5. Anie ada esop Abasi usụn̄, ndien didie?
5 Ikọ N̄wed Abasi oro “ufọk odu-uwem Abasi” ayarade enye emi adade enye usụn̄. Esop oro edi enye oro Abasi akarade. Jehovah ọnọ ikọt esie ndausụn̄ ebe ke Jesus, kpa owo emi enyịn mîkwe oro Enye ekemekde ndidi Ibuot esop, onyụn̄ ebe ke Ikọ eke odudu spirit Esie, kpa Bible.—1 Timothy 3:14, 15; Ephesus 1:22, 23; 2 Timothy 3:16, 17.
6. (a) Didie ke ẹketie ke heaven ẹnọ esop ndausụn̄ ke akpa isua ikie? (b) Nso iwụt nte ke Jesus osụk edi Ibuot esop?
6 Ẹma ẹnen̄ede ẹkụt utọ ndausụn̄ oro ke Pentecost. (Utom 2:14-18, 32, 33) Ẹma ẹkụt enye ke ini angel Jehovah akadade usụn̄ ke ndisuan eti mbụk nsịm Africa, ke ini uyo Jesus ọkọnọde ndausụn̄ ke ini Saul eke Tarsus akakabarede esịt, ye ke ini Peter ọkọtọn̄ọde utom ukwọrọikọ ke otu mme Gentile. (Utom 8:26, 27; 9:3-7; 10:9-16, 19-22) Edi, nte ini akade, owo ikokopke aba mme uyo ẹtode heaven, owo ikekwe aba mme angel, owo ikọnọhọ aba mme utịbe utịbe enọ eke spirit. Kpa ye oro, Jesus ama ọn̄wọn̄ọ ete: “Sese, Ami ndodu ye mbufo kpukpru ini, tutu esịm utịt ererimbot.” (Matthew 28:20; 1 Corinth 13:8) Mfịn, Mme Ntiense Jehovah ẹfiọk ndausụn̄ Jesus. Ke oro mîkpodụhe, owo ikpekemeke nditan̄a etop Obio Ubọn̄ kpa ye ọkpọsọn̄ usua.
7. (a) Mmanie ẹnam “asan̄autom emi anamde akpanikọ, onyụn̄ enyenede ọniọn̄,” ndien ntak-a? (b) Nso utom ke ẹkenọ “asan̄autom” oro?
7 Esisịt ini mbemiso n̄kpa esie, Jesus ama asian mme mbet esie aban̄a “asan̄autom emi anamde akpanikọ, onyụn̄ enyenede ọniọn̄” emi enye nte Eteufọk edinọde san̄asan̄a mbiomo. “Asan̄autom” oro oyodu ke ini Ọbọn̄ ọkpọn̄de aka heaven ndien oyosụk anam utom ọkpọsọn̄ ke ini Christ afiakde edi ke odudu Obio ubọn̄ oro enyịn owo mîkwe. Owo ikemeke nditịn̄ emi mban̄a owo kiet, edi ẹkeme nditịn̄ mban̄a esop Christ emi ẹyetde aran. Jesus ama etịn̄ aban̄a enye nte “asan̄autom” esie ke ama akada iyịp esie edep enye. Enye ama ọnọ mme andibuana ke enye utom ndinam mme mbet nnyụn̄ n̄ka iso mbọk mmọ, ọnọde mmọ “udia [eke spirit] ke edikem ini.”—Matthew 24:45-47; 28:19; Isaiah 43:10; Luke 12:42; 1 Peter 4:10.
8. (a) Mme mbiomo ewe ke otu asan̄autom enyene idahaemi? (b) Ntak emi nte nnyịn inamde n̄kpọ iban̄a item oro otode usụn̄ Abasi edide akpan n̄kpọ?
8 Sia otu asan̄autom oro ọkọsọn̄ọde ada anam utom Eteufọk tutu edifiak ndi esie emi enyịn owo mîkwe ke 1914, uyarade odu nte ke ẹma ẹnọ enye ikpọ mbiomo ke 1919. Mme isua emi ẹbede toto ke ini oro ẹdi ini unọ ikọ ntiense ofụri ekondo mban̄a Obio Ubọn̄ oro, ndien ke ẹtan̄ akwa otuowo eke mme andituak ibuot nnọ Jehovah ẹbok ye idotenyịn edinịm mmọ uwem mbe akwa ukụt. (Matthew 24:14, 21, 22; Ediyarade 7:9, 10) Mmọ emi n̄ko ẹyom udia eke spirit, ndien otu asan̄autom oro ọnọ mmọ udia emi. Man inem Jehovah esịt, oyom nnyịn ke ntre inyịme item emi enye ọnọde ebe ke usụn̄ emi inyụn̄ inam n̄kpọ ke n̄kemuyo ye enye.
9, 10. (a) Ke akpa isua ikie, nso ndutịm ikodu inọ edibọrọ mme mbụme ẹban̄ade ukpepn̄kpọ ye edinọ edikwọrọ eti mbụk ndausụn̄? (b) Nso ndutịm aban̄ade edise mban̄a mme utom ikọt Jehovah odu mfịn?
9 Ke ndusụk idaha, mme mbụme ẹban̄ade ukpepn̄kpọ ye ido unam n̄kpọ ẹsidemede. Nso ndien? Utom ibuot 15 asian nnyịn nte ẹkebierede eneni aban̄ade mme Gentile oro ẹkekabarede esịt. Ẹma ẹmen ikọ oro ẹbịne mme apostle ye mbiowo ke Jerusalem, emi ẹkenamde utom nte otu ukara. Irenowo oro ẹkedi mbon oro ẹkemede ndinam ndudue, edi Abasi ama ada mmọ anam n̄kpọ. Mmọ ẹma ẹkere ẹban̄a mme itie N̄wed Abasi ẹban̄ade eneni oro ẹnyụn̄ ẹkere n̄ko ẹban̄a uyarade oro odude nte ke spirit Abasi ke anam utom ke ndiberede efakutom mme Gentile. Ekem mmọ ẹma ẹnọ ubiere. Abasi ama ọdiọn̄ ndutịm oro. (Utom 15:1-29; 16:4, 5) Ẹma ẹsio mme owo ẹto otu ukara oro ẹdọn̄ ndinam ukwọrọikọ Obio Ubọn̄ oro aka iso.
10 Ke eyo nnyịn nditọete oro ẹyetde aran ke spirit, emi ẹtode nsio nsio idụt ẹnam Otu Ukara esop Jehovah oro ẹkụtde ke enyịn ndien odu ke ibuot itieutom ofụri ererimbot eke Mme Ntiense Jehovah. Ke idak itieibuot Jesus Christ, Otu Ukara oro anam edisana utuakibuot aka iso ke kpukpru idụt, esede aban̄a utom ukwọrọikọ eke Mme Ntiense Jehovah ke mme esop mmọ ke ediwak tọsịn ke mme itie duop. Mbon emi ẹdude ke Otu Ukara oro ẹnyene ukem ekikere apostle Paul, emi ekewetde ọnọ ekemmọ mme Christian ete: “Idịghe nte nnyịn idedi mme andikara mbufo ke n̄kpọ mbuọtidem, edi nte idedi mme andin̄wam mbufo ndinyene idatesịt. Koro ke mbuọtidem ke mbufo ẹdada.”—2 Corinth 1:24.
11. (a) Didie ke ẹsimek mbiowo ye mme asan̄autom unamutom? (b) Ntak emi nnyịn ikpadianade kiet ye mbon oro ẹmekde?
11 Mme Ntiense Jehovah ke ofụri ererimbot ẹberi edem ke Otu Ukara ndimek nditọete iren emi ẹdotde, emi n̄ko ẹnọde odudu ndimek mbiowo ye mme asan̄autom unamutom ndise mban̄a mme esop. Ẹwet mme n̄kpọ oro ẹyomde ẹto mbon oro ẹmekde ke Bible ẹnyụn̄ ẹti nte ke irenowo oro idịghe mfọnmma ẹsinyụn̄ ẹnam mme ndudue. Mbiowo oro ẹsitorode owo ẹnọ ye mbon oro ẹsimekde owo ẹnyene akwa mbiomo ke iso Abasi. (1 Timothy 3:1-10, 12, 13; Titus 1:5-9) Ntem, mmọ ẹsibọn̄ akam ẹben̄e un̄wam spirit Abasi ẹnyụn̄ ẹyom ndausụn̄ ẹto Ikọ eke odudu spirit esie. (Utom 6:2-4, 6; 14:23) Ẹyak nnyịn iwụt esịtekọm iban̄a “mme enọ ke owo,” (NW) emi ẹn̄wamde kpukpru nnyịn ndikabade ndi “kiet ke mbuọtidem.”—Ephesus 4:8, 11-16.
12. Didie ke Jehovah ada iban anam n̄kpọ ke ndutịm ukara Abasi?
12 N̄wed Abasi ọnọ ndausụn̄ ete ke irenowo ẹkpenyene ndise mban̄a esop. Emi isụhọkede iban itie, koro ndusụk mmọ ẹdide mme adiakpa Obio Ubọn̄ heaven, ndien mmọ ẹnam ekese utom ukwọrọikọ. (Psalm 68:11) N̄ko, ke ndise mban̄a mme mbiomo ubon mmọ kpukpru ini, iban ẹtịp ẹsịn ke ndinam esop enyene eti enyịn̄. (Titus 2:3-5) Edi irenowo oro ẹmekde ẹse ẹban̄a unọ ukpep ke esop.—1 Timothy 2:12, 13.
13. (a) Nso ekikere ke Bible akpak mbiowo ndinyene kaban̄a itie mmọ? (b) Nso ifet ke kpukpru nnyịn ikeme ndibuana?
13 Ke ererimbot, ẹbat owo oro enyenede akamba itie nte akpan owo, edi ke esop Abasi ido edi nte ke: “Enye emi ekpride akan ke otu mbufo kpukpru, kpa enye edidi akamba.” (Luke 9:46-48; 22:24-26) N̄wed Abasi ọnọ mbiowo item ndidu ke ukpeme mbak ẹdibre odudu ye mmọ emi ẹkeyakde ẹsịn mmọ ke ubọk edi, utu ke oro, ẹnịm idem nte uwụtn̄kpọ ẹnọ mme erọn̄. (1 Peter 5:2, 3) Idịghe ibat ibat owo oro ẹmekde kpọt, edi kpukpru Mme Ntiense Jehovah, iren ye iban, ẹnyene ifet ndida ke ibuot Andikara ofụri ekondo, ẹtịn̄de ikọ ke enyịn̄ esie ke nsụhọdeidem ẹnyụn̄ ẹsiande mme owo ke kpukpru ebiet ẹban̄a Obio Ubọn̄ esie.
14. Ke adade mme itie N̄wed Abasi oro ẹsiakde, neme ban̄a mme mbụme oro ẹwetde ke utịt ikpehe ekikere.
14 Nnyịn iyanam ọfọn ndibụp idem nnyịn: ‘Nte ami mmenen̄ede n̄wụt esịtekọm mban̄a nte Jehovah adade esop esie emi ẹkụtde ke enyịn usụn̄? Nte mme edu mi, ikọ inua, ye mme edinam ẹwụt oro?’ Ndikere mban̄a mme akpan n̄kpọ oro ẹtienede mi ẹkeme ndin̄wam nnyịn owo kiet kiet ndinam utọ ndụn̄ọde oro.
Edieke ami nnen̄erede nsụk ibuot nnọ Christ nte Ibuot esop, do, nte ẹwụtde ke mme itie N̄wed Abasi oro ẹtienede mi, nso ke ami ndinam? (Matthew 24:14; 28:19, 20; John 13:34, 35)
Ke ini ami mbọde mme enọ eke spirit oro ẹtode otu asan̄autom ye Otu Ukara esie ye esịtekọm, mmanie ke ami n̄wụt ukpono nnọ? (Luke 10:16)
Didie ke kpukpru owo ke esop, akpan akpan mbiowo, ẹkpenam n̄kpọ ye kiet eken? (Rome 12:10)
15. (a) Nso ke nnyịn iwụt ebe ke edu nnyịn kaban̄a esop Jehovah oro ẹkụtde ke enyịn? (b) Mme ifet ewe ẹdu ẹnọ nnyịn ndiwụt Devil nte osu nsu nnyụn̄ nnam esịt Jehovah adat?
15 Jehovah ada nnyịn usụn̄ mfịn ebe ke esop esie emi ẹkụtde ke enyịn emi odude ke idak Christ. Edu nnyịn kaban̄a ndutịm emi owụt nte nnyịn ikerede iban̄a eneni itie edikara. (Mme Hebrew 13:17) Satan ọdọhọ ke nnyịn inen̄ede inyene udọn̄ iban̄a idem nnyịn. Edi edieke nnyịn inamde n̄kpọ ke usụn̄ oro ẹyomde inyụn̄ ifepde mme n̄kpọ oro ẹdụride ntịn̄enyịn nte mîdotke inọ idem, nnyịn iwụt Devil nte osu nsu. Edieke nnyịn imade inyụn̄ ikponode mbon oro ẹdade nnyịn usụn̄ edi isịn ‘ndikpek mme owo, nyom ufọn idem nnyịn,’ nnyịn inam esịt Jehovah adat. (Jude 16; Mme Hebrew 13:7) Ke ndinam akpanikọ nnọ esop Jehovah, nnyịn iwụt nte ke Jehovah edi Abasi nnyịn ye nte ke nnyịn imadiana kiet ke ndituak ibuot nnọ enye.—1 Corinth 15:58.
Nneme Ndụn̄ọde
• Nso idi esop Jehovah oro ẹkụtde ke enyịn mfịn? Nso idi uduak esie?
• Anie edi Ibuot esop oro ẹmekde, ndien ebede ke mme ndutịm ewe oro ẹkụtde ke enyịn ke enye ọnọ nnyịn ima ima ndausụn̄?
• Nso nti edu ke nnyịn ikpọkọri iban̄a mbon oro ẹdude ke esop Jehovah?
[Mme ndise ke page 133]
Jehovah ada nnyịn usụn̄ ebe ke esop esie oro ẹkụtde ke enyịn oro odude ke idak Christ