Mme Esop Ẹtịmde ẹnọ Edikwọrọ Obio Ubọn̄ Abasi
Ke ini okodude ke isọn̄, Jesus Christ ama ọkwọrọ Obio Ubọn̄ Abasi, asan̄ade ke obio-in̄wan̄ ke obio-in̄wan̄ ye ke akwa obio ke akwa obio. Enye n̄ko ama ọnọ mme mbet esie ukpep onyụn̄ osio mmọ ọdọn̄ ete ẹkenam ukem utom oro. Mbemiso ọkọdọkde ke heaven, enye ama ọnọ mme anditiene enye ewụhọ ete ẹnam mme owo ẹdi mbet ke kpukpru idụt. Toto ke ntọn̄ọ esie, ẹma ẹtịm akpa esop Christian ẹnọ edikwọrọ eti mbụk. Ebiet ekededi emi mbet ẹkekade, ẹma ẹkụt mmọ nte ẹkwọrọde Obio Ubọn̄ Abasi.—Matthew 4:17, 23; 10:1-16; 28:19, 20; Luke 4:43, 44; 8:1; 10:1-9; Utom 1:8; 4:31; 5:42; 8:12; 19:8; 28:23, 30, 31; Rome 10:9, 10, 14.
Ke prọfesi Jesus oro aban̄ade utịt editịm n̄kpọ emi, enye ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” Ukwọrọikọ emi edi akpan utom ọnọ esop Christian mfịn.—Matthew 24:14; Mark 13:10.
Ke ofụri ererimbot, ẹtịm kpukpru esop Mme Ntiense Jehovah man ẹkụre ikpehe n̄kann̄kụk mmọ ye edikwọrọ eti mbụk Obio Ubọn̄ Abasi ke nde ke nde. Man ẹkpenam enye ke ido oro asan̄ade ke ndutịm, ke idụt kiet kiet, n̄kọk itieutom Watch Tower Society ọnọ kpukpru esop ebiet unọ ikọ ntiense. Esop oro eyebahade efakutom oro esịn ke n̄kpri ikpehe, ẹmi ẹdidemede ndien ẹnọ mmọemi ẹdibiomde mbiomo edikụt nte ke ẹwaha ẹtiene mme owo.—1 Corinth 14:33, 40.
Mme Ntiense ẹmi nte ido edide ẹsisobo ye mme owo ke ndisan̄a ke ufọk ke ufọk. Ke mme mbonoesop mmọ, ẹsinọ Mme Ntiense Jehovah ukpep ndinọ mbio mbio utịn̄ikọ mban̄a etop Obio Ubọn̄ ke mme enyịnusụn̄, ẹkamade Bible mmọ. Mme Ntiense ẹmi ẹsikama mme n̄wed Bible man ẹkpọn̄ ẹnọ mme enyeneufọk ẹmi ẹmade ndinyene ifiọk Ikọ Abasi emi okponde akan.
Man ẹnọ kpukpru owo ifet ke efakutom oro ndikop akpan etop Obio Ubọn̄, Mme Ntiense ẹmi ẹsinịm ọyọhọ n̄wetnnịm n̄kpọ nte mmọ ẹsan̄ade ke ufọk ke ufọk, ẹwụtde ebiet emi mme owo mîkodụhe ke ufọk m̀mê ebiet ẹmi, otode ke ndusụk ntak, owo mîkekemeke ndinọ ọyọhọ ikọ ntiense. Ẹyefiak ẹwaha ini efen. Ke ebiet ẹwụtde udọn̄, ẹsiwet oro ẹnịm, ndien Mme Ntiense ẹmi ẹyefiak ẹka ndinọ ntọt N̄wed Abasi efen efen. Edieke ẹmade, ẹyenịm ukpepn̄kpọ Bible kpukpru ini. Ẹnam kpukpru ẹmi ke mfọn.
Mme Ntiense Jehovah n̄ko ẹsinyan mme magazine ẹnọ mme andisan̄a ke efak mbe. Ke usụn̄ emi mmọ ẹsikeme ndisobo ediwak owo ẹmi mmọ mîkpekemeke ndikụt ke ufọk. Ẹsisịn ata ukeme ndisobo kpukpru owo ẹmi ẹdikpan̄de utọn̄.—Utom 17:17; Ediyarade 14:6, 7; 22:17.
Ntak emi Mme Ntiense ẹmi ẹsikade iso ndiwaha ke ini ediwak owo mîwụtke udọn̄ ndomokiet-e? Ẹsikụt ẹte ke idaha mme owo ẹsikpụhọde kpukpru ini ndien mmọ ẹsinam n̄kpọ ke eti usụn̄ ke ini ẹfiakde ẹwaha, mîdịghe ẹkeme ndisobo owo en̄wen emi ediwụtde udọn̄ ke ufọk oro.
Jesus ama ọdọhọ mme mbet esie ete: “Ẹkam ẹbemiso ẹyom Obio Ubọn̄ Esie ye edinen ido Esie.” Edikwọrọ Obio Ubọn̄ enyene akpan ebuana ke nnyịn ndibemiso nyom Obio Ubọn̄, ndien Mme Ntiense Jehovah ẹnam emi edi ata akpan utom ke uwem mmọ.—Matthew 6:33; 2 Timothy 4:2.
• Ewe utom Jesus ye eke mme akpa Christian ke ẹkebemiso ẹtịn̄ nte ẹdinamde n̄ko ke eyo nnyịn?
• Didie ke ẹtịm utom ukwọrọikọ eke Mme Ntiense Jehovah?
• Ntak emi Mme Ntiense ẹsikade iso ndiwaha ntiene mme owo ke ini ediwak owo mîwụtke udọn̄-ọ?
[Mme ndise ke page 16, 17]
Mme Ntiense Jehovah ke ẹkwọrọ Obio Ubọn̄ Abasi ke nsio nsio idụt
Thailand
Mexico
Netherlands
Korea
Curaçao
Ghana
Britain
Australia