Mme Andikot N̄wed Nnyịn Ẹbụp Ẹte  . . .

Ntak Emi Mme Ntiense Jehovah Ẹsikwọrọde Ikọ ke Ufọk ke Ufọk?

▪ Bible ọdọhọ ke Jesus ama owụk mme mbet esie ete “ẹka ẹkenam mme owo ke kpukpru idụt ẹdi mbet [imọ], . . . ẹkpep mmọ” n̄kpọ. (Matthew 28:19, 20) Ndi akpana kpukpru mme Christian ẹnam utom emi? Akpa mme mbet Jesus ẹma ẹfiọk ke akpana kpukpru mme Christian ẹnam. Ke uwụtn̄kpọ, apostle Peter ọkọdọhọ ete: “Enye [Jesus] ama owụk nnyịn ete ikwọrọ ikọ inọ mme owo inyụn̄ inọ ọyọhọ ikọ ntiense.” (Utom 10:42) Ndien apostle Paul ama ewet ete: “Utom oro obiomo mi ndinam. Mbọm mi edieke mmentan̄ake eti mbụk!”—1 Corinth 9:16.

Idịghe Paul ye Peter ikpọn̄ ẹkenam ewụhọ Jesus emi, edi kpukpru mme Christian ke eyo mme apostle ẹkenam. Mmọ ẹkeda utom ukwọrọikọ nte ata akpan ubọkutom. (Utom 5:28-32, 41, 42) Mme Ntiense Jehovah ẹnam kpasụk ntre mfịn n̄ko. Mmọ ẹkwọrọ etop oro Jesus ọkọkwọrọde, oro edi, etop “obio ubọn̄ heaven.”—Matthew 10:7.

Ẹkpekwọrọ etop Obio Ubọn̄ emi ẹnọ mmanie? Jesus ọkọdọhọ ke ẹnyene ndikwọrọ nnọ kpukpru owo ke kpukpru ebiet. Enye ọkọdọhọ mme mbet esie ete: “Mbufo ẹyetie ntiense ẹban̄a mi . . . tutu esịm ata utịt ikpehe isọn̄.” (Utom 1:8) Enye ọkọdọhọ ke “ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt” mbemiso utịt edide. (Matthew 24:14) Ntre, mme Christian eyo mme apostle ẹma ẹsisịn ofụri ukeme mmọ ndikwọrọ ikọ nnọ kpukpru owo, idịghe sụk mme ọdiọn̄ọ m̀mê mbon oro mîkakaha ufọkabasi. (Colossae 1:23; 1 Timothy 2:3, 4) Kpasụk ntre, Mme Ntiense Jehovah ẹdomo ndikwọrọ ikọ nnọ kpukpru owo.a

Nso idi mfọnn̄kan usụn̄ emi ẹkemede ndikwọrọ etop Obio Ubọn̄ emi nnọ ata ediwak owo? Jesus emi ọkọdiọn̄ọde mfọnn̄kan usụn̄ emi ama ọdọn̄ mme mbet esie ẹka ikpọ obio, mme obio-in̄wan̄, ye mme ufọk owo. (Matthew 10:7, 11, 12) Ke Jesus ama akakpa onyụn̄ eset, mme mbet esie ẹma ẹka iso ẹkwọrọ ikọ “ke ufọk ke ufọk.” (Utom 5:42) Mmọ n̄ko ẹma ẹkwọrọ ikọ ke ebiet ekededi emi mmọ ẹkekụtde owo kpa nte Jesus ọkọkwọrọde. (John 4:7-26; 18:20; Utom 17:17) Se Mme Ntiense Jehovah ẹnyụn̄ ẹnamde edi oro mfịn man ẹkwọrọ ikọ ẹnọ kpukpru owo.

Jesus ama ọdọhọ ke idịghe kpukpru owo ẹdikpan̄ utọn̄. (Matthew 10:14; 24:37-39) Ndi emi ekpenyene ndinam idem emem mme Christian? Kere emi ise: Edieke ekpesịnede ke otu mbon emi ẹnyan̄ade mme owo ke unyekisọn̄ ama eketịbe, ndi ekpetre ndiyom mme owo sia mûkwe ediwak owo unyan̄a? Baba, akpaka iso oyom m̀mê oyokụt ọkpọkọm owo kiet kpọt anyan̄a. Jesus ọkọdọhọ mme mbet esie ẹka iso ẹkwọrọ ikọ ọkpọkọm ibat ibat owo kpọt ẹdinyịme ndikop nnyụn̄ nnam n̄kpọ mban̄a eti mbụk Obio Ubọn̄ Abasi emi. (Matthew 10:23; 1 Timothy 4:16) Ndikwọrọ ikọ ke ufọk ke ufọk owụt ke Mme Ntiense Jehovah ẹma Abasi, ẹnyụn̄ ẹma mme mbọhọidụn̄ mmọ emi mîdinyeneke uwem edieke mmọ mîkopke inyụn̄ inam se etop Obio Ubọn̄ emi ọdọhọde.—Matthew 22:37-39; 2 Thessalonica 1:8.

Magazine emi osụk okotde mi esịne etop Obio Ubọn̄ Abasi emi. Edieke oyomde ndifiọk n̄kpọ en̄wen mban̄a se osụk okotde emi, mbọk neme ye Mme Ntiense Jehovah ini ekededi emi mmọ ẹdifiakde ẹdi ufọk mbufo, mîdịghe wet n̄wed nọ ẹsọk mme andisio magazine emi.

[Ikọ Idakisọn̄]