Ibuot 23
Mme Utịben̄kpọ Efen Efen ke Capernaum
SABBATH oro ke Jesus ama okokot akpa mbet esie inan̄—Peter, Andrew, James, ye John—kpukpru mmọ ẹka synagogue n̄kann̄kụk kiet ke Capernaum. Do Jesus ọtọn̄ọ ndikpep n̄kpọ, ndien mme owo oro ẹdu ke n̄kpaidem koro enye ekpepde mmọ n̄kpọ nte owo oro enyenede odudu inyụn̄ idịghe nte mme scribe.
Ke usen Sabbath emi, owo emi enyenede demon odu. Ke ekpri ini ebede, enye ofiori ke ọkpọsọn̄ uyo ete: “Isan̄a nso ye Afo, Jesus eyen Nazareth? Nte emedi ndisobo nnyịn? Mmọdiọn̄ọ owo eke Afo edide, Edisana Eyen Abasi.”
Demon oro akarade owo emi enen̄ede edi kiet ke otu mme angel Satan. Ke asuade ọnọ demon oro, Jesus ọdọhọ ete: “Kûbi inua, nyụn̄ wọrọ enye ke idem.”
Nte ededi, demon oro otụhọde enye onyụn̄ ofiori ke ọkpọsọn̄ uyo. Edi enye ọwọrọ owo oro ke idem ye unana edinọ enye unan. Kpukpru owo ẹdu ke n̄kpaidem! “Nso n̄kpọ edi emi?” ntre ke mmọ ẹbụp. “Enye ada odudu owụk ndedehe spirit, ndien mmọ ẹkop uyo Esie.” Etop aban̄ade n̄kpọ emi asuana ke ofụri n̄kann̄kụk obio oro.
Ke ẹkpọn̄de synagogue oro, Jesus ye mme mbet esie ẹka ufọk Simon, m̀mê Peter. Do eka an̄wan Peter ke ọdọn̄ọ ọkpọsọn̄ ufiopidem. Mmọ ẹkpe enye ubọk ẹte, ‘Mbọk n̄wam enye.’ Ntre Jesus asan̄a ekpere enye, omụm enye ubọk, onyụn̄ emenede enye ke enyọn̄. Ndondo oro enye okop nsọn̄idem onyụn̄ ọtọn̄ọ ndinam udia nnọ mmọ!
Nte ini akade, ke ini utịn ama okosụhọde, mme owo ke kpukpru itie ẹtọn̄ọ ndida mbon udọn̄ọ mmọ ndi ufọk Peter. Ibịghike ofụri obio ẹsop idem ke enyịnusụn̄! Ndien Jesus anam kpukpru mbon udọn̄ọ mmọ ẹkop nsọn̄idem, inamke n̄kpọ m̀mê nso ke udọn̄ọ mmọ ẹdi. Enye akam ebịn demon osion̄o ke idem mme owo oro ẹnyenede demon. Nte mmọ ẹwọn̄ọde, mme demon oro enye ebịnde efep ẹfiori ẹte: “Afo edi Eyen Abasi.” Edi Jesus akpan mmọ inyụn̄ iyakke mmọ ẹtịn̄ ikọ koro mmọ ẹfiọkde ke enye edi Christ. Mark 1:21-34; Luke 4:31-41; Matthew 8:14-17.
▪ Nso itịbe ke synagogue ke usen Sabbath oro ke Jesus ama okokot akpa mbet esie inan̄?
▪ M̀mọ̀n̄ ke Jesus aka ke ini ọkpọn̄de synagogue, ndien nso utịben̄kpọ ke enye anam do?
▪ Nso itịbe ke ukperedem ke mbụbịteyo oro?