Jesus Ọkwọrọ Ikọ ke Mme Ebiet En̄wen ke Galilee

Jesus anam utom etieti ke usen emi enye odude ke Capernaum ye mbet esie inan̄. Edi ke mbubreyo, mme owo ẹfiak ẹda mbon udọn̄ọ ẹsọk enye ẹte anam idem ọsọn̄ mmọ. Jesus inyeneke ini ndomokiet inọ idemesie.

Ke ndan̄nsiere, Jesus ababak adaha ada asan̄a ikpọn̄ ọwọrọ ke ini eyo mîn̄wan̄ake kan̄a. Enye okụt ebiet emi odobode onyụn̄ etie do ọbọn̄ akam ọnọ Ete esie. Edi mme owo idiyakke enye etie do ebịghi. Peter ye mbet eken ẹdemede, edi ikwe enye. Ntre, “Simon ye mbon emi ẹdude ye enye” ẹnen̄ede ẹyom Jesus. Etie nte enye Simon Peter ada iso ndiyom Jesus, sia Jesus akana ke ufọk esie.—Mark 1:36; Luke 4:38.

Ke ini mmọ ẹkụtde Jesus, Peter ọdọhọ ete: “Kpukpru owo ke ẹyom fi.” (Mark 1:37) Mbon Capernaum iyomke Jesus ọnyọn̄. Mmọ ẹnen̄ede ẹma utom Jesus, ntre, mmọ ẹdomo “ndibiọn̄ọ enye ẹte okûkpọn̄ mmimọ.” (Luke 4:42) Edi, ndi ukọk udọn̄ọ ye ndinam mme utịben̄kpọ eken akada Jesus edi isọn̄? Ndien ndi enye ekedi ndikwọrọ ikọ ke Capernaum kpọt? Jesus ke idemesie ọbọrọ mbụme emi.

Jesus ọdọhọ mbet esie ete: “Ẹyak nnyịn ika ebiet en̄wen, ikodụk mme obio oro ẹdude ẹkpere, man n̄kọkwọrọ ikọ do n̄ko, koro n̄kọwọrọ ndi kaban̄a uduak emi.” Enye onyụn̄ ọdọhọ mbon oro ẹkeyomde enye etie ke obio mmọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.”—Mark 1:38; Luke 4:43.

Jesus ekedi isọn̄ ndikwọrọ etop Obio Ubọn̄. Obio Ubọn̄ oro edinam enyịn̄ Ete esie asana onyụn̄ osio mfịna owo efep ofụri ofụri. Jesus anam mme utịben̄kpọ man owụt ke Abasi ọkọdọn̄ imọ idi isọn̄. Moses n̄ko ama anam ikpọ utịben̄kpọ ke eyo esie man owụt mme owo ke imọ idi asan̄autom Abasi.—Exodus 4:1-9, 30, 31.

Ntem, Jesus asan̄a ye mbet esie inan̄ ọkpọn̄ Capernaum ọkọkwọrọ ikọ ke mme ebiet en̄wen. Mmọ ẹdi Peter ye Andrew eyeneka esie, ye John ye James eyeneka esie. Urua kiet kpọt edi emi tọn̄ọ Jesus okokot mmọ ete ẹdisan̄a ye imọ ẹnam utom.

Jesus ye mbet esie inan̄ emi ẹnam utom etieti ke Galilee. Ke nditịm ntịn̄, mme owo ke kpukpru ebiet ẹkop n̄kpọ ẹban̄a Jesus. Bible ọdọhọ ete: “Etop esie asuana ke ofụri Syria” tutu esịm ikpehe emi enyenede obio duop emi ẹkotde Decapolis onyụn̄ ebe esịm edem Akpa Jordan oko. (Matthew 4:24, 25) Mme owo oro ẹdude ke nsio nsio ebiet emi, esịnede Judea ẹwọrọ ẹtiene Jesus ye mbet esie. Ediwak mmọ ẹda mbon udọn̄ọ ẹsọk enye. Jesus onyụn̄ ọkọk kpukpru mmọ udọn̄ọ, ebịn demon osion̄o ke idem mbon emi ẹnyenede demon.