Ibuot 24

Ntak Emi Jesus Ekedide Isọn̄

USEN oro Jesus okodude ke Capernaum ye mbet esie inan̄ ọkọyọhọ ye utom, etrede ye mbon Capernaum ndida kpukpru mbon udọn̄ọ mmọ ndi man ẹnam udọn̄ọ okụre mmọ ke mbubịteyo. Ini oro enye odude ikpọn̄ idụhe.

Idahaemi edi tụhi tụhi usenubọk ndan̄nsiere. Ke adan̄aemi osụk edide n̄kịm-n̄wan̄a usenubọk, Jesus adaha ada onyụn̄ ọwọrọ an̄wa ikpọn̄. Enye asan̄a aka ndobo ndobo ebiet emi enye ekemede ndibọn̄ akam nnọ Ete esie ke ndịbe. Edi Jesus idụhe ikpọn̄ ibịghi koro ke ini Peter ye mmọ eken ẹfiọkde ẹte ke enye idụhe ye mmimọ, mmọ ẹwọrọ ẹka ndiyom enye.

Ke ini mmọ ẹkụtde Jesus, Peter ọdọhọ ete: “Kpukpru owo ke ẹyom Fi.” Mbon Capernaum ẹyom Jesus odu ye mmọ. Mmọ ẹnen̄ede ẹdara se Jesus akanamde ọnọ mmọ! Edi nte Jesus ekedi isọn̄ akpan akpan ndinam mme utịbe utịbe ukọk udọn̄ọ? Nso ke enye etịn̄ aban̄a emi?

Nte ekemde ye mbụk Bible kiet, Jesus ọbọrọ mme mbet esie ete: “Ẹyak nnyịn ika ebiet en̄wen idụk ke mme obio eke ẹkperede, man n̄kwọrọ ikọ do n̄ko; koro n̄kọwọrọ ndi ke ntak emi.” Idem okposụkedi mme owo oro ẹkpakde Jesus ndisụhọ do, enye ọdọhọ mmọ ete: Mmenyene ndikwọrọ eti mbụk Ubọn̄ Abasi nnọ mme obio en̄wen n̄ko: koro ẹkedọn̄ Mi ẹte ndinam oro.”

Ih, Jesus ekedi isọn̄ akpan akpan ndikwọrọ mban̄a Obio Ubọn̄ Abasi, emi edinọde enyịn̄ Ete esie ubọn̄ onyụn̄ ọkọk kpukpru udọn̄ọ ubonowo ke nsinsi. Nte ededi, man ọnọ uyarade nte ke edi Abasi ọdọn̄ imọ, Jesus anam mme utịbe utịbe ukọk udọn̄ọ. Ke ukem usụn̄ oro Moses, ediwak isua ikie ke mbemiso, ama anam mme utịben̄kpọ ndinam ẹdiọn̄ọ nte ke imọ idi asan̄autom Abasi.

Idahaemi, ke ini Jesus ọkpọn̄de Capernaum ndikọkwọrọ ikọ ke mme obio en̄wen, mbet esie inan̄ ẹtiene enye ẹka. Owo inan̄ emi ẹdi Peter ye eyeneka esie Andrew, John ye eyeneka esie James. Afo eyeti ete ke urua keit mbemiso oro, ke ẹma ẹnọ mmọ ikot ndidi akpa ekemmọ mme asan̄autom Jesus.

Isan̄ ukwọrọikọ Jesus ke Galilee ye mbet esie inan̄ omokụt utịbe utịbe uforo! Ke akpanikọ, ntọt aban̄ade mme utom esie asuana tutu osịm ofụri Syria. Akwa otuowo ẹtode Galilee, Judea, ye edem Akpa Jordan ẹtiene Jesus ye mme mbet. Mark 1:​35-39; Luke 4:​42, 43; Matthew 4:​23-25; Exodus 4:​1-9, 30, 31.

▪ Nso itịbe ke usenubọk ke usen oro Jesus ọyọhọde ye utom ke Capernaum ebede?

▪ Ntak ẹkedọn̄de Jesus edi isọn̄, ndien mme utịben̄kpọ esie ẹyọhọ nso uduak?

▪ Mmanie ẹtiene Jesus ẹka isan̄ ukwọrọikọ esie ke Galilee, ndien didie ke ẹnam n̄kpọ ẹban̄a mme utom Jesus?