Ibuot 41

Akpan Iwụk Eneni

ESISỊT ini ke ẹma ẹkekot enye udia ke ufọk Simon, Jesus ọtọn̄ọ isan̄ utom ukwọrọikọ esie ọyọhọ iba ke Galilee. Ke isan̄ oro enye akakade n̄kann̄kụk oro ke mbemiso, mme akpa mbet esie, Peter, Andrew, James, ye John ẹma ẹsan̄a ye enye. Edi idahaemi apostle 12, ọkọrọ ye ndusụk iban, ẹsan̄a ye enye. Mmọemi ẹsịne Mary Magdalene, Susanna, ye Joanna, emi ebe esie edide akwa owo utom Edidem Herod.

Nte isan̄ utom ukwọrọikọ Jesus otịmde ọsọn̄ ubọk, ntre ke eneni oro aban̄ade utom esie okpon. Ẹda eren oro enyenede demon, emi n̄ko edide nnan ye imụm ẹsọk Jesus. Ke ini Jesus anamde udọn̄ọ okụre enye, anamde demon ọwọrọ ọkpọn̄ enye onyụn̄ ekeme nditịn̄ ikọ nnyụn̄ n̄kụt usụn̄, idem akpa otuowo oro. Mmọ ẹtọn̄ọ ndidọhọ ẹte: “Ndi Enyeemi edi Eyen David?”

Mme otuowo ẹboho ke akamba ibat ẹkanade ufọk oro Jesus odude tutu eyedi se enye ye mme mbet esie mîkam ikemeke ndidia udia. Ke adianade ye mbon oro ẹkerede ẹte ke enye ekeme ndidi “Eyen David” oro ẹken̄wọn̄ọde, mme scribe ye mme Pharisee ẹdu ẹmi ẹtode anyan usụn̄ ko ke Jerusalem ẹdi ndikụt ndudue nnọ enye. Ke ini iman Jesus ẹkopde ẹban̄a ndutịme oro odude ke ntak Jesus, mmọ ẹdi ndimụm enye. Ke nso ntak?

Ọfọn, idem nditọeka Jesus inịmke ke akpanikọ kan̄a ite ke enye edi Eyen Abasi. N̄ko, ndutịme ye utọk otuowo oro enye anamde adaha ada ke ofụri ofụri idịghe edu Jesus oro mmọ ẹkediọn̄ọde ke adan̄aemi enye ọkọkọride ọwọrọ owo ke Nazareth. Ke ntre, mmọ ẹnịm ẹte ke enyene ata akpan n̄kpọ oro afịnade Jesus ke ibuot. Mmọ ẹbiere ẹte, “Ibuot ọbọhọ Enye,” mmọ ẹnyụn̄ ẹyom ndimụm enye nda ndaha.

Edi uyarade ana in̄wan̄în̄wan̄ nte ke Jesus anam udọn̄ọ okụre owo oro enyenede demon. Mme scribe ye mme Pharisee ẹdiọn̄ọ ẹte ke mmimọ ikemeke ndifan̄a akpanikọ emi. Ntre man mmọ ẹkụt ndudue ẹnọ Jesus mmọ ẹdọhọ otuowo ẹte: “Owo emi ibịnke demon iduọk, ke mîtoho Beelzebub, ọbọn̄ mme demon.”

Ke ọfiọkde ekikere mmọ, Jesus okot mme scribe ye mme Pharisee onyụn̄ ọdọhọ ete: “Kpukpru obio edidem eke abaharede ada an̄wana ye idemesie odụk nditaha; kpukpru obio m̀mê ufọk eke onyụn̄ abaharede an̄wana ye idemesie idisọn̄ọke ida. Ndien edieke Satan ebịnde Satan ọduọk, enye abahade ada an̄wana ye idemesie; didie ndien ke obio ubọn̄ esie edisọn̄ọ ida?”

Nso ifiọk oro abiatde-biat ekikere ke emi edi ntem! Sia mme Pharisee ẹdọhọde ẹte ke owo ke otu mmimọ ama ebịn mme demon ọduọk, Jesus n̄ko obụp ete: “Edieke Ami ndade Beelzebub mbịn mme demon nduọk, nditọ mbufo ẹda anie ẹbịn mmọ ẹduọk?” Ke ikọ efen, ẹkpekam ẹnyene ndida ikọ oro mmọ ẹdoride Jesus ntịn̄ mban̄a mmọ. Jesus ndien odụri owo utọn̄ ete: “Edi edieke Ami ndade spirit Abasi mbịn mme demon nduọk, Ubọn̄ Abasi ama osịm mbufo.”

Man anam an̄wan̄a ke enye ndibịn mme demon nduọk edi uyarade odudu esie oro akande eke Satan, Jesus ọdọhọ ete: “Owo ekeme didie ndidụk ke ufọk ọkpọsọn̄ owo mbụme n̄kpọ esie, ke enye mîbemke iso ibọp ọkpọsọn̄ owo oro? Adan̄aoro ndien ke enye edimụme n̄kpọ ufọk esie. Owo eke mîdaha ye Ami an̄wan̄wana ye Ami; owo eke mînyụn̄ ibokke ye Ami asasuan.” Mme Pharisee oro nte an̄wan̄ade ẹn̄wan̄wana ye Jesus, ẹyararede idemmọ ẹwụt nte idide mme isụn̄utom Satan. Mmọ ẹsasuan nditọ Israel ẹkpọn̄ enye.

Mmọdo, Jesus odụri mme andibiọn̄ọ oro ẹtode Satan utọn̄ ete ke ‘owo idifenke ikọ isụn̄i eke owo etịn̄de adian edisana spirit.’ Enye anam an̄wan̄a ete: “Owo ekededi eke editịn̄de ikọ adian Eyen Owo, ẹyefen enye; edi owo ekededi eke editịn̄de ikọ adian edisana spirit, idifenke enye, ye edide ke eyo emi ye onyụn̄ edide ke eyo emi edidide.” Mme scribe ye mme Pharisee oro ẹma ẹnam idiọkn̄kpọ emi owo mîdifenke mi ebe ke ubi ubi edimen in̄wan̄în̄wan̄ utịben̄kpọ oro ẹnamde ke odudu edisana spirit Abasi nnọ Satan. Matthew 12:​22-32; Mark 3:​19-30; John 7:⁠5.

▪ Didie ke udiana isan̄ Jesus ke Galilee okpụhọrede ye eke akpa?

▪ Ntak emi iman Jesus ẹdomode ndimụm enye?

▪ Didie ke mme Pharisee ẹdomo ndikụt ndudue nnọ mme utịben̄kpọ Jesus, ndien didie ke Jesus owụt ke mmọ inenke?

▪ Nso ubiomikpe ke mme Pharisee oro ẹnyene, ndien ntak-⁠a?