Ibuot 49
Isan̄ Ukwọrọikọ Efen ke Galilee
KE AMA ọkọkwọrọ ikọ ọkpọsọn̄ ọkpọsọn̄ ke n̄kpọ nte isua iba, nte Jesus idahaemi eyetọn̄ọ ndikop mmemidem nnyụn̄ nnam enye sụn̄sụn̄? Ke okpụhọrede ye oro, enye akam atatat utom ukwọrọikọ esie ke ndinam isan̄ ukwọrọikọ efen, ọyọhọ ikata ke Galilee. Enye ama ekese kpukpru obio ye obio-in̄wan̄ ke n̄kann̄kụk oro, ekpepde n̄kpọ ke mme synagogue onyụn̄ ọkwọrọde eti mbụk Obio Ubọn̄. Se enye okụtde ke isan̄ ukwọrọikọ emi anam enye onịm ke akpanikọ akan nte akanam edide kaban̄a ufọn edinam utom ukwọrọikọ ọkpọsọn̄.
Ebiet ekededi oro Jesus akade, enye okụt otuowo ẹyomde ukọk udọn̄ọ eke spirit ye ndọn̄esịt. Mmọ ẹtie nte erọn̄ ẹmi mînyeneke andikpeme, ẹdude ke nnanenyịn ẹnyụn̄ ẹsuanade, enye onyụn̄ atua mmọ mbọm. Enye ọdọhọ mme mbet esie ete: “Ke akpanikọ idọk okpon, edi mme anamutom iwakke. Ẹben̄e ndien Enyene-idọk ẹte, Enye osio mme anamutom ọdọn̄ ẹdi ke idọk Esie.”
Jesus enyene se enye odiomide ndinam. Enye obon apostle 12, ẹmi enye ekemekde ke n̄kpọ nte isua kiet ke edem. Enye abahade mmọ iba iba, oro anamde edi mme ọkwọrọikọ ke otu itiokiet, onyụn̄ ọnọ mmọ item. Enye anam an̄wan̄a ete: “Ẹkûwaha ẹdụk ke usụn̄ mme Gentile, ẹkûnyụn̄ ẹdụk ke obio mbon Samaria baba kiet; edi ẹkam ẹtiene mme erọn̄ ufọk Israel ẹmi ẹsopde. Edi nte mbufo ẹkade, ẹkwọrọ ẹte, Ubọn̄ Heaven ke ekpere.”
Obio Ubọn̄ emi mmọ ẹdikwọrọde ẹban̄a mi edi enyeoro Jesus ekekpepde mmọ ndibọn̄ akam mben̄e ke akam uwụtn̄kpọ oro. Obio Ubọn̄ oro emekpere ke ekikere oro nte ke Edidem emi Abasi emekde, Jesus Christ, odu do. Ke ndisọn̄ọ n̄weditoro eke mme mbet esie nte mme andida ke ibuot ukara oro okponde akan eke owo, Jesus ọnọ mmọ odudu ndikọk mbon udọn̄ọ nnyụn̄ nnam idem mme akpan̄kpa ẹset. Enye ọnọ mmọ item ete ẹnam utom ẹmi ke mfọn.
Ekem enye ọdọhọ mme mbet esie ete yak mmọ ẹkûnam ntịmidem n̄kpọ obụkidem ẹnọ isan̄ ukwọrọikọ mmọ. “Ẹkûkama gold, m̀mê silver, m̀mê okpoho okụk ke ekpatokụk mbufo; ẹkûnyụn̄ ẹkama ekpat isan̄, m̀mê ọfọn̄idem iba, m̀mê ikpa-ukot, m̀mê esan̄: koro eyenutom odot udia esie.” Mmọemi ẹnyịmede etop oro ẹyenam n̄kpọ ẹnyụn̄ ẹnọ mmọ udia ye itieidụn̄. Nte Jesus ọdọhọde ete: “Ndien obio ekededi m̀mê obio-in̄wan̄ ekededi eke mbufo ẹdidụkde, ẹyom owo eke odotde ke esịt; ẹnyụn̄ ẹdan̄ ye enye tutu mbufo ẹwọn̄ọ ẹnyọn̄ọ.”
Ekem Jesus ọnọ item aban̄a usụn̄ nte ẹdisobode mme enyeneufọk ye etop Obio Ubọn̄. Enye ọnọ item ete: “Ke ini mbufo ẹdụkde ke ufọk, ẹnọ ekọm. Ndien edieke ufọk oro odotde, yak emem mbufo odoro ke esịt; edi edieke ufọk oro mîdotke, yak emem mbufo afiak etiene mbufo. Owo ekededi eke mînyịmeke ndidara mbufo, nnyụn̄ n̄kop ikọ mbufo, ke ini mbufo ẹwọn̄ọde ke ufọk m̀mê ke obio oro, ẹken̄ ntanikpat mbufo ẹduọk.”
Kaban̄a obio oro ẹsịnde etop mmọ, Jesus ayarade ete ke ubiomikpe emi editienede enye eyenyene ndịk. Enye anam an̄wan̄a ete: “Ke akpanikọ ke ndọhọ mbufo, N̄kpọ eyefọn ye isọn̄ Sodom ye Gomorrah ke usen ikpe akan ye obio oro.” Matthew 9:35–10:15; Mark 6:6-12; Luke 9:1-5.
▪ Ini ewe ke Jesus ọtọn̄ọ isan̄ ukwọrọikọ esie ọyọhọ ikata ke Galilee, ndien anam enye onịm nso ke akpanikọ?
▪ Ke ini osiode apostle esie 12 ọdọn̄ ekekwọrọ ikọ, nso item ke enye ọnọ mmọ?
▪ Ntak emi enende mme mbet ndikpep nte ke Obio Ubọn̄ amasan̄a ekpere?