Ibuot 50
Mben̄eidem Ndisobo Ukọbọ
KE AMA eketeme mme apostle esie usụn̄ nte ẹdinamde utom ukwọrọikọ, Jesus ọtọt mmọ aban̄a mme andibiọn̄ọ. Enye ọdọhọ ete: “Sese, mmosio mbufo ndọn̄ nte mme erọn̄ ke ufọt mme ekpeikọt . . . Edi ẹkpeme idem ye owo; koro mmọ ẹyeyak mbufo ẹsịn ke ubọk mme esop, ndien ẹyemia mbufo ke mme synagogue mmọ; ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi.”
Kpa ye ọkpọsọn̄ ukọbọ oro mme mbet esie ẹdisobode, Jesus ọsọn̄ọ ọn̄wọn̄ọ ete: “Ke ini ẹdiyakde mbufo ẹnọ, ẹkûtịmede esịt ẹkere, m̀mê ẹdidọhọ didie, m̀mê ẹditịn̄ nso; koro kpa idaha oro ke ẹyenọ mbufo se ẹditịn̄de. Koro idịghe mbufo ẹtịn̄ ikọ, edi spirit Ete mbufo esịne mbufo ke esịt etịn̄.”
Jesus akaiso etịn̄ ete, “Eyeneka eyenyụn̄ ada eyeneka ọnọ n̄kpa, ete eyenyụn̄ ọnọ eyen esie: nditọ ẹyenyụn̄ ẹdaha ẹn̄wana ye mme ete ye mme eka mmọ, ẹnyụn̄ ẹsịn ẹwot mmọ.” Enye adian do ete: “Kpukpru owo ẹyesua mbufo kaban̄a enyịn̄ Mi: edi ẹyenyan̄a owo eke edimede ime tutu osịm akpatre.”
Ukwọrọikọ edi ata akpan n̄kpọ. Ke ntak emi Jesus ọsọn̄ọ etịn̄ aban̄a ufọn ediwụt mbufiọk man ẹkaiso ẹnyene ifụre ndinam utom emi. Enye ọdọhọ ete: “Ke ini mmọ ẹkọbọde mbufo ke obio emi, ẹfehe ẹdụk ke obio efen: koro ke akpanikọ ke ndọhọ mbufo, nte, ke mbufo mîka-isan̄ake ke kpukpru mme obio Israel ibe kan̄a, Eyen Owo eyedi.”
Edi akpanikọ nte ke Jesus ọkọnọ mme apostle esie 12 item, ntọt, ye nsịnudọn̄ emi, edi enye n̄ko enyene mbon ẹmi ẹdibuanade ke utom edikwọrọ ikọ emi ke ofụri ererimbot ke n̄kpa ye ediset esie ke n̄kpa ebede. Ẹwụt emi ẹto ikọ esie oro nte ke “kpukpru owo ẹyesua” mme mbet imọ, idịghe sụk nditọ Israel oro ẹkedọn̄de mme apostle ẹkekwọrọ ikọ ẹnọ. Akande oro, owo ikadaha mme apostle ẹmi, nte an̄wan̄ade, iwọrọ ke iso mme andikara ye ndidem ke ini Jesus ọkọdọn̄de mmọ ẹka utom ubịnikọt ukwọrọikọ oro mmọ ẹkenamde ke ibio ibio ini. Adianade do, mme andibuana ke ubon ikisidaha mme andinịm ke akpanikọ inọ n̄kpa adan̄aoro.
Ntre ke ini ọdọhọde ete ke mme mbet imọ idisan̄ake ke kpukpru mme obio ukwọrọikọ mmọ ima, ndien “Eyen Owo eyedi,” Jesus akasian nnyịn ke prọfesi nte ke mme mbet imọ idisan̄ake ke kpukpru ikpehe isọn̄ oro ẹdụn̄de ke edikwọrọ mban̄a Obio Ubọn̄ Abasi oro ẹma ẹkewụk mbemiso Edidem Jesus Christ oro ẹnọde ubọn̄ edide nte etubom nsobo Jehovah ke Armageddon.
Ke akade iso ọnọ item ukwọrọikọ esie, Jesus ọdọhọ ete: “Eyen ukpepn̄kpọ ikponke ikan andikpep enye: asan̄autom inyụn̄ ikponke ikan eteufọk esie.” Ntre ana mme anditiene Jesus ẹdori enyịn ndibọ ukem ufen ye ukọbọ oro enye ọkọbọde ke ntak edikwọrọ Obio Ubọn̄ Abasi. Edi, enye ọnọ item ete: “Ẹkûnyụn̄ ẹfehe mmọemi ẹwotde ikpọkidem, edi mîkemeke ndiwot ukpọn̄: ẹdi ẹkam ẹfehe Enyeemi ekemede ndisobo ukpọn̄ ye ikpọkidem ke [“Gehenna,” NW].”
Jesus ekenyene ndinịm uwụtn̄kpọ ke n̄kpọ emi. Enye eyenyịme ndikpa uko uko utu ke ndiduọk edinam akpanikọ esie nnọ Enyeemi enyenede ofụri odudu, kpa Jehovah Abasi. Ih, edi Jehovah kpọt ekeme ndisobo “ukpọn̄” owo (ke itie emi, ọwọrọde idotenyịn ini iso emi owo enyenede nte odu-uwem ukpọn̄) mîdịghe utu ke oro, enye ekeme idem ndinam owo eset edi edidara nsinsi uwem. Nso ima ima, enyene-mbọm Ete eke heaven ke Jehovah edi ntem!
Ekem, Jesus esịn udọn̄ ọnọ mme mbet esie ye n̄ke emi owụtde ima ima edikere oro Jehovah ekerede aban̄a mmọ. Enye obụp ete: “Nte inyamke n̄kpri inuen iba ke obubịt okụk kiet? Ndien baba mmọ kiet iduọhọ ke isọn̄ ke mîtoho Ete mbufo: edi ẹmebat kpa kpukpru idet ibuot mbufo. Ẹkûfehe ndien; mbufo ẹmesọn̄ urua ẹkan ediwak n̄kpri inuen.”
Etop Obio Ubọn̄ emi Jesus ọnọde mme mbet esie uyo ete ẹkwọrọ eyebahade mme ubon, koro ndusụk owo ke ubon ẹyenyịme enye ndien mmọ eken ẹyesịn enye. Enye anam an̄wan̄a ete: “Ẹkûse ẹte n̄kedi ndisịn emem ke isọn̄: n̄kedịghe ndisịn emem, edi ofụt.” Ntem, oyom uko mbemiso andibuana ke ubon onyịmede akpanikọ Bible. Jesus etịn̄ ete: “Owo eke amade ete m̀mê eka akan Mi idotke ye Ami: owo eke onyụn̄ amade eyeneren esie m̀mê eyen esie an̄wan akan Mi idotke ye Ami.”
Ke ndida item esie nsịm utịt, Jesus anam an̄wan̄a ete ke mbon oro ẹnyịmede mme mbet ẹnyịme imọ n̄ko. “Ndien owo ekededi eke edidade cup mbịt mbịt mmọn̄ ọnọ kiet ke otu n̄kpri owo ẹmi ọn̄wọn̄ ke enyịn̄ mbet Mi, ke akpanikọ ke ndọhọ mbufo, enye iditreke-tre ndibọ utịp esie.” Matthew 10:16-42.
▪ Mme ntọt ewe ke Jesus ọnọ mme mbet esie?
▪ Nso nsịnudọn̄ ye ndọn̄esịt ke enye ọnọ mmọ?
▪ Ntak emi item Jesus ẹnyenede n̄kpọ n̄ko ndinam ye mme Christian eyomfịn-e?
▪ Ke nso usụn̄ ke mbet Jesus mîkponke ikan andikpep enye?