Mme Mbụme Ẹtode Mme Andikot
◼ Ke Matthew 10:21, ndi Jesus okodụri nnyịn utọn̄ nte ke nditọete ke esịt esop ẹyebiọn̄ọ nditọete mmọ eke spirit?
Baba, idịghe akpan n̄kpọ ke ntọt Jesus edi oro, emi okotde ete: “Eyeneka eyenyụn̄ ada eyeneka ọnọ n̄kpa, ete eyenyụn̄ ọnọ eyen esie: nditọ ẹyenyụn̄ ẹdaha ẹn̄wana ye mme ete ye mme eka mmọ, ẹnyụn̄ ẹsịn ẹwot mmọ.”—Matthew 10:21.
Udọn̄ikọ owụt ke Jesus eketịn̄ emi ọnọ mme apostle 12 nte enye okosiode mmọ ọdọn̄ ke isan̄ ukwọrọikọ ke Israel. Ekese n̄kpọ ke se enye eketịn̄de ekenyene se ọwọrọde akpan akpan ọnọ mme apostle. Ke uwụtn̄kpọ, enye ama ọdọhọ nte ke ẹma ẹnọ mmọ odudu ndikọk udọn̄ọ ke utịbe utịbe usụn̄, ndibịn mme demon, ye idem ndinam mme akpan̄kpa eset. (Matthew 10:1, 8; 11:1) Mbụk owụt nte ke idịghe kpukpru Christian ẹkebọ mme utọ utịbe odudu oro, ọsọn̄ọde nte ke Jesus mi eketịn̄ ikọ ọnọ akpan otuowo kiet—mme apostle esie.
Edi, ndusụk n̄kpọ ẹmi Jesus eketịn̄de ẹma ẹka anyan ẹkan isan̄ ukwọrọikọ mme apostle oro. Enye ọkọdọhọ mmọ ete: “Edi ẹkpeme idem ye owo; . . . ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile.” (Matthew 10:17, 18) Ke isan̄ oro, eyedi owo 12 oro ẹma ẹsobo ubiọn̄ọ, edi uyarade ndomokiet idụhe nte ke ẹma ẹda mmọ “ẹwọrọ ke iso mme andikara ye ndidem” man ẹnọ “mme Gentile” ikọ ntiense.a Ke mme isua oro ẹketienede, mme apostle ẹma ẹwọrọ ke iso mme andikara, utọ nte Ndidem Herod Agrippa I ye II, Sergius Paulus, Gallio, ye idem Nero Andikara. (Utom 12:1, 2; 13:6, 7; 18:12; 25:8-12, 21; 26:1-3) Ntem mme ikọ Jesus ẹma ẹnyene ndusụk ebuana ke ukperedem.
Item Jesus akakaiso ye ntọt emi: “Eyeneka eyenyụn̄ ada eyeneka ọnọ n̄kpa.” Enye iketịn̄ke iban̄a nditọete eke spirit, kpa nte enye mîketịn̄ke iban̄a mme ete m̀mê nditọ eke spirit ke mme udiana ikọ esie ke Mt 10 ufan̄ikọ 21: “Ete eyenyụn̄ ọnọ eyen esie: nditọ ẹyenyụn̄ ẹdaha ẹn̄wana ye mme ete ye mme eka mmọ, ẹnyụn̄ ẹsịn ẹwot mmọ.” Ikọ Jesus ọkọwọrọ ke mme apostle ẹkpedori enyịn ndikụt usua m̀mê ubiọn̄ọ nto idem mme iman.—Matthew 10:35, 36.
Ẹyeyom mme apostle ẹme ime ke isan̄ ukwọrọikọ oro. Jesus ama akaiso ete: “Kpukpru owo ẹyesua mbufo kaban̄a enyịn̄ Mi: edi ẹyenyan̄a owo eke edimede ime tutu osịm akpatre.”—Matthew 10:22.
Ndusụk ke se Jesus eketịn̄de ke idaha oro enyene se ọwọrọde ọnọ nnyịn mfịn nte Mme Ntiense Jehovah. Nsọn̄uyo ẹdoride ke ukwọrọikọ nnyịn edi ke Obio Ubọn̄. Nnyịn inam utom ukwọrọikọ nnyịn ke mfọn inyụn̄ iyom mme owo ẹmi ẹnyenede udọn̄ ke etop emi m̀mê oro ẹdotde. Odot ẹdu ke ukpeme. Mme andibiọn̄ọ ẹyọyọhọ. Ndusụk ini mme iman, mme mbọhọidụn̄, m̀mê mme nsan̄autom ẹsida n̄kpọsọn̄ mfịna ẹdi, akpan akpan ye mbon esịt akpanikọ oro ẹtọn̄ọde-tọn̄ọ ndibịne usụn̄ uwem ata Ido Ukpono Christ. Jesus ama afiak odụri owo utọn̄ aban̄a utọ ubiọn̄ọ oro ke ini enye eketịn̄de aban̄a “idiọn̄ọ” edidu esie. (Matthew 24:3, 9, 10; Luke 21:16, 17) Enye n̄ko ama afiak etịn̄ ke oyom nnyịn ‘ime ime tutu osịm akpatre man ẹnyan̄a nnyịn.’ Ih, nnyịn inyene ndime ime tutu osịm akpatre uwem nnyịn kemi m̀mê tutu utịt editịm n̄kpọ emi ndien nnyịn ikeme ndidụk obufa ererimbot.—Matthew 24:13.
[Mme Ikọ idakisọn̄]
a Mme edikabade efen ẹsịn emi “mme okpono ndem” (The Jerusalem Bible), “mme Gentile” (New International Version ye mme edikabade eke Moffatt ye Lamsa), ye “mme okpono ibọk” (The New English Bible).