Ibuot 52
Jesus Ọbọk Ediwak Tọsịn Owoke Utịbe Utịbe Usụn̄
MME apostle 12 oro ẹmedara n̄wọrọnda isan̄ ukwọrọikọ ke ofụri Galilee. Idahaemi, ekpri ini ke ẹma ẹkewot John, mmọ ẹfiak ẹdibụk mme utịbe utom ẹmi mmọ ẹkenamde ẹnọ Jesus. Ke okụtde ete ke mmọ ẹkpa mba ye nte ke ediwak owo ke ẹdedi ẹnyụn̄ ẹnyọnyọn̄ tutu mmọ ikam inyeneke ifet ndidia n̄kpọ, Jesus ọdọhọ ete: ‘Ẹyak nnyịn ke idem nnyịn ika ke ebiet desert ikọduọk odudu esisịt.’
Ke ẹdierede ke ubom mmọ, eyedi ke ebiet emi ekperede Capernaum, mmọ ẹsio ẹka ebiet emi ọsọn̄de owo ndisịm, nte an̄wan̄ade ke n̄kan̄ edem usiahautịn Jordan emi ebede Bethsaida. Nte ededi, ediwak owo ẹkụt nte mmọ ẹdahade, ndien mmọ efen ẹkop ẹban̄a emi. Kpukpru owo ẹfehe obot-obot ẹbem mmọ iso ẹkesịm, ndien ke ini ubom ebehede, mmọ ke ẹbet do ndisobo mme mbet ẹmi.
Ke ọwọrọde ke ubom onyụn̄ okụtde akwa otuowo ẹmi, Jesus atua mmọ mbọm koro mme owo ẹmi ẹbietde mme erọn̄ eke mînyeneke andikpeme. Ntem ke enye anam idem ọsọn̄ mbon udọn̄ọ mmọ onyụn̄ ọtọn̄ọ ndikpep mmọ ediwak n̄kpọ.
Ini ebe usọp usọp, ndien mme mbet Jesus ẹtiene enye ẹnyụn̄ ẹdọhọ ẹte: “Ebiet emi edi desert, onyụn̄ ekpere mbubịteyo kemi; dọn̄ mmọ ẹnyọn̄ọ, man mmọ ẹka ke in̄wan̄ ye obio-in̄wan̄ ke n̄kann̄kụk ẹkedep udia ẹnọ idemmọ.”
Nte ededi, ke ibọrọ Jesus ọdọhọ ete: “Mbufo ẹnọ mmọ n̄kpọ ẹdia.” Ekem, sia Jesus ọfiọkde se enye oyomde ndinam, enye odomo Philip ese ke ndibụp enye nte: “Ididep uyo [ke] m̀mọ̀n̄, man mme mmọemi ẹdia n̄kpọ?”
Nte Philip esede, etie nte emi ikemeke-keme nditịbe. Kamse, n̄kpọ nte irenowo 5,000 ẹdu mi, ndien ekeme ndidi ẹma ẹwak ẹbe owo 10,000 ke ẹbatde iban ye nditọn̄wọn̄ n̄ko ẹdian! Philip ọbọrọ ete: “Uyo eke akpade okụk [“denarius,” NW ] ikie-iba [denarius kiet ekedi okụk utom usen kiet inioro] ikemke kpukpru mmọ ndidia nsịt nsịt.”
Ndusụk man owụt nte owo mîkemeke ndinọ utọ uwak owo ẹmi udia, Andrew ọdọhọ ete: “Akparawa kiet mmọmi, emi enyenede uyo a-barley ition ye iyak iba,” adiande do ete: “Edi oro ekem nso ke otu uwak owo eke etiede ntem?”
Sia edide ini nsehe ikọn̄, ekpri ini mbemiso Passover eke 32 C.E., uwak awawa mbiet omodu. Ntre Jesus ọdọhọ mme mbet esie ẹsian mme owo oro ẹte ẹsụhọrede ẹtetie ke mbiet oro ke mme otu 50 ye 100. Enye emen uyo ition ye iyak iba oro, emenede enyịn ese enyọn̄, onyụn̄ ọnọ ekọm. Ekem enye ọtọn̄ọ ndibụn̄ uyo nnyụn̄ mbahade mme iyak oro. Enye ayak ẹmi ọnọ mme mbet esie, ẹmi, n̄ko ẹdemede udia ẹmi ẹnọ mme owo oro. Ke n̄kpaidem, kpukpru owo oro ẹdia n̄kpọ tutu mmọ ẹyụhọ!
Ke oro ebede, Jesus ọdọhọ mme mbet esie ete: “Ẹtan̄ mbubek uyo eke ẹsụhọde, mbak n̄kpọ baba kiet editak.” Ke ini mmọ ẹnamde emi, mmọ ẹtan̄ nyọhọ-nsụhọ udia oro mmọ ẹkediade ẹyọhọ akpasa 12! Matthew 14:13-21; Mark 6:30-44; Luke 9:10-17; John 6:1-13.
▪ Ntak emi Jesus oyomde itie ọnọ mme apostle esie ndidu ikpọn̄-ọ?
▪ Jesus ada mme mbet esie aka m̀mọ̀n̄, ndien ntak emi mmọ mînyeneke nduọkodudu oro mmọ ẹyomde?
▪ Ke ini mbubịteyo ọtọn̄ọde ndidi, nso ke mme mbet ẹdọhọ ẹnam, edi didie ke Jesus ese aban̄a mme owo oro?