Ibuot 58

Uyo ye Leaven

AKWA otuowo ẹmebụn̄ọ ẹtiene Jesus ke Decapolis. Ediwak owo ẹketo anyanusụn̄ ẹdi ke akwa ebiet emi mme Gentile ẹyọhọde mi man ẹdikpan̄ utọn̄ ẹnọ enye ẹnyụn̄ ẹbọ usọbọ ke udọn̄ọ mmọ. Mmọ ẹsan̄a ye ikpọ akpasa, m̀mê ikpọ akpan, emi mmọ ẹsimade ndida ndọn̄ n̄kpọ ke ini ẹnamde isan̄ ẹbe ke mme obio Gentile.

Nte ededi, ke akpatre, Jesus okot mme mbet esie onyụn̄ ọdọhọ ete: “Mmatua otuowo emi mbọm, koro kemi mmọ eṭiede ye Ami ke usen ita, mînyụn̄ inyeneke se ẹdiade: ndien edieke nnamde mmọ ẹsan̄a ye biọn̄ ẹnyọn̄ọ ufọk, mmọ ẹyekpa mba ke usụn̄; ndusụk mmọ ẹnyụn̄ ẹto anyan ebiet.”

Mme mbet ẹbụp ẹte: “Owo edikeme ndida uyo ke m̀mọ̀n̄ nyụhọ mme owo ẹmi mi ke ebiet desert?”

Jesus obụp ete: “Ẹnyene uyo ifan̄?”

Mmọ ẹbọrọ ẹte, “Uyo itiaba ye n̄kpri iyak ifan̄.”

Ke ama ọkọdọhọ mme owo oro ete ẹtetie ke isọn̄, Jesus emen uyo ye iyak oro, ọbọn̄ akam ọnọ Abasi, obụn̄ mmọ, onyụn̄ ọtọn̄ọ ndiyak mmọ nnọ mme mbet esie. Mmọ, ndien, ẹdeme ẹnọ kpukpru owo ẹmi ẹke­diade ẹyụhọ. Ke oro ebede, ke ini ẹketan̄de nyọhọ-nsụhọ, ama ọyọhọ akpasa itia­ba, kpa ye oro n̄kpọ nte irenowo 4,000, ọkọrọ ye iban ye nditọn̄wọn̄ ẹkediade!

Jesus ọnọ otuowo oro ẹnyọn̄, enye ediere ke ubom ye mme mbet esie, ẹnyụn̄ ẹbe ẹsịm esụk edem usoptịn Inyan̄ Galilee. Mi mme Pharisee, isan̄ enyeemi ẹsan̄ade ye mme andibuana ke n̄ka ido ukpono mme Sadducee, ẹdi ndidomo Jesus ke ndidọhọ enye owụt mmimọ idiọn̄ọ otode heaven.

Ke ọfiọkde ukeme oro mmọ ẹsịnde ndidomo imọ, Jesus ọbọrọ ete: “Ke ini mbubịteyo mbufo ẹte, Usen eyefọn, koro enyọn̄ oyịbe; ke ini usenubọk n̄ko, mbufo ẹte, Usen eyediọk, koro enyọn̄ oyịbe onyụn̄ okpụk. Mbufo ẹmefiọk ndidiọn̄ọ iso ikpaenyọn̄, edi mbufo ikemeke ndifiọk idiọn̄ọ ini.”

Ye mme ikọ oro, Jesus okot mmọ idiọk ye emana efụbe onyụn̄ ọtọt mmọ ete, kpa nte imọ ima iketetịn̄ ye mme Pharisee, owo idinọhọ mmọ idiọn̄ọ ndomokiet ke mîbọhọke idiọn̄ọ Jonah. Ke adahade ọkpọn̄ mmọ, enye ye mme mbet esie ẹdụk ubom ẹsio ẹka n̄kan̄ Bethsaida ke esụk edem edere usiahautịn eke Inyan̄ Galilee. Ke usụn̄ isan̄ mme mbet esie ẹti ẹte ke mmimọ imefre ndida uyo, do mmọ ẹkenyene eboho uyo kiet kpọt.

Ke enyenede ke ekikere aban̄a edisobo oro enye okosobode mme Pharisee ye mme Sadducee oro ẹdade ye Herod, Jesus ọnọ item ete: “Ẹtịn̄ enyịn ẹkpeme idem mbak leaven mme Pharisee ye leaven Herod.” Nte an̄wan̄ade, editịn̄ mban̄a leaven anam mme mbet ẹkere ke Jesus etịn̄ aban̄a edifre oro mmimọ ifrede ndida uyo, ntem mmọ ẹtọn̄ọ ndineni ke otu idemmọ mban̄a n̄kpọ emi. Ke ọfiọkde nte n̄kpọ emi mîn̄wan̄ake mmọ, Jesus ọdọhọ ete: “Nsinam ẹnenide eneni ke ntak emi mbufo mînyeneke uyo?”

Ndondo emi, Jesus ama ọnọ ediwak tọsịn owo uyo ke utịbe utịbe usụn̄ ẹdia, anamde akpatre utịben̄kpọ emi ndusụk ke n̄kpasịp usen kiet m̀mê iba ẹmi ẹkebede. Mmọ ẹkpenyene ndifiọk nte ke enye itịn̄ke iban̄a edinana ata uyo. Enye eti mmọ ete: “Nte mbufo inyụn̄ itịghi? Ke ini n̄kobụn̄de uyo ition ndeme tọsịn owo ition, akpan mbubek uyo ifan̄ ke mbufo ẹketan̄ ẹyọhọ?”

Mmọ ẹbọrọ ẹte, “Duopeba.”

“Ke ini n̄konyụn̄ mbụn̄de uyo itiaba ndeme tọsịn owo ­inan̄, ọyọhọ akpasa ifan̄ ke mbufo ẹketan̄ mbubek uyo ke esịt?”

Mmọ ẹbọrọ ẹte, “Itiaba.”

“Nte mbufo inyeneke ibuot kan̄a?” ntre ke Jesus obụp. “Nsidi ntak eke mbufo mîtịmke ifiọk ite, idịghe uyo ke ntịn̄ ye mbufo mban̄a? Edi ndọhọ mbufo nte, ẹkpeme idem mbufo mbak leaven mme Pharisee ye mme Sadducee.”

Emi an̄wan̄a mme mbet ndien ke akpatre. Leaven, kpa se inamde n̄kpọ amak onyụn̄ anamde uyo ofụt, ekedi ikọ ẹkedade nditịn̄ mban̄a se idiọkde. Ntre kemi an̄wan̄a mme mbet nte ke Jesus akada ndamban̄a n̄kpọ etịn̄ ikọ, nte ke enye odụri mmọ utọn̄ ndikpeme idem ke “se mme Pharisee ye mme Sadducee ẹkpepde,” emi ukpepn̄kpọ mmọ enyenede odudu ndibiat owo. Mark 8:​1-21; Matthew 15:​32–16:⁠12.

▪ Ntak emi mme owo ẹkamade ikpọ akpasa-⁠a?

▪ Ke ama ọkọkpọn̄ Decapolis, nso isan̄ ke Jesus aka ke ubom?

▪ Nso mîkan̄wan̄ake mme mbet ke ikọ Jesus oro aban̄ade leaven?

▪ Nso ke ikọ Jesus emi “leaven mme Pharisee ye mme Sadducee” ọwọrọ?