Ibuot 56

Nso Isabade Owo?

UBIỌN̄Ọ oro osịmde Jesus ọdọdiọn̄ ọsọn̄ ubọk. Ikụreke ke ediwak mbet esie ndikpọn̄ enye edi mme Jew ke Judea ke ẹyom enye ndiwot, kpa nte mmọ ẹkenamde ke ini enye okodude ke Jerusalem ke ini Passover eke 31 C.E.

Idahaemi edi Passover eke 32 C.E. Anaedi, ke n̄kemuyo ye ibet Abasi oro ọdọhọde ẹdụk usọrọ emi, Jesus ọdọk aka ndidụk usọrọ Passover ke Jerusalem. Nte ededi, enye anam ntre ye mbufiọk koro uwem esie odude ke itiendịk. Ke oro ebede, enye afiak ọnyọn̄ Galilee.

Eyedi Jesus odu ke Capernaum ke ini mme Pharisee ye mme scribe ẹmi ẹtode Jerusalem ẹdide ẹbịne enye. Mmọ ẹyom se ẹdidade ẹdori enye ikọ nte ke enye abiat ibet ido ukpono. Mmọ ẹbụp ẹte, “Nsinam mbet Fo ẹbiatde item mbiowo? Koro mmọ mîyetke ubọk, ndien ẹdidiade uyo.” Emi idịghe n̄kpọ oro Abasi oyomde, edi mme Pharisee ẹbat enye ke akwa idiọkn̄kpọ edieke ẹtrede ndinam ido edinam emi, emi ekesịnede ediyet ubọk tutu osịm ekụn̄ubọk.

Utu ke ndibọrọ edori ikọ mmọ, Jesus osio Ibet Abasi oro mmọ ẹkoide-koi ẹbiat ke ibak owụt. Enye obụp ete, “Nsinam mbufo nde ẹdade item mbufo ẹbiat ibet Abasi? Koro Abasi ọkọdọhọ ete, Kpono usọ ye uka; n̄ko, Owo eke etịn̄de idiọk adian ete m̀mê eka okûtre ndikpa. Edi mbufo ẹte, Owo ama ọdọhọ ete esie m̀mê eka esie ete, Mmayak se n̄kpadade mfọn fi ufọn nnọ Abasi; enye idikponoke ete esie.”

Ke akpanikọ, mme Pharisee ẹkpep ẹte ke okụk, inyene, m̀mê n̄kpọ ekededi emi ẹyakde ẹnọ Abasi nte enọ edi inyene temple ndien ke owo ikemeke ndida nnam n̄kpọ en̄wen ekededi. Edi, ke akpanikọ, owo emi akayakde n̄kpọ emi ọnọ esikama enọ emi ke idemesie. Ke usụn̄ emi eyeneren, ndidọhọ n̄kukụre nte ke okụk m̀mê inyene imọ edi “corban”​—⁠enọ eke ẹyakde ẹnọ Abasi m̀mê temple​—⁠esibọhọ mbiomo esie eke edin̄wam ete ye eka esie ẹmi ẹsọn̄de ke emana, ẹmi ẹkemede ndidu ke ata nnanenyịn.

Ke okopde nnennen iyatesịt aban̄a ukwan̄ ukwan̄ ediyụt oro mme Pharisee ẹyụtde Ibet Abasi, Jesus ọdọhọ ete: “Mbufo ẹma ẹnam ikọ Abasi akabade edi ikpîkpu kaban̄a item mbufo. Mbufo mbon mbubịk, Isaiah ototịm etịn̄ nte prọfet aban̄a mbufo, ete, Mbio ẹmi ẹkpono Mi ke n̄kpọkinua mmọ; edi esịt mmọ ada nsannsan ye Ami. Edi mmọ ẹkpono Mi ikpîkpu, sia ẹkpede item owo ke ukpepn̄kpọ mmọ.”

Eyedi otuwowo oro ẹma ẹsịk ẹfiak edem man ẹnọ mme Pharisee ufan̄ ndibụp Jesus mbụme. Idahaemi, ke ini mme Pharisee mînyeneke ibọrọ inọ ọkpọsọn̄ nsuannọ oro Jesus ọnọde mmọ, enye okot otuowo ẹsan̄a ẹkpere. Enye ọdọhọ ete, “Mbufo ẹkop uyo Mi, ẹnyụn̄ ẹtịm ẹfiọk: baba n̄kpọ kiet eke otode-to odụk owo ke idem ikemeke ndisabade owo: edi n̄kpọ eke ọwọrọde owo ke idem, oro asabade owo.”

Edikem, ke ini mmọ ẹdụkde ufọk, mbet esie ẹbụp ẹte: “Nte ọmọfiọk ete mme Pharisee ẹyat esịt, ke ini mmọ ẹkopde ikọ emi?”

Jesus ọbọrọ ete: “Kpukpru se ẹtọde, eke mîdịghe Ete Mi ke heaven ọkọtọ, ẹyedịbede. Ẹsana mmọ ẹyak: mmọ ẹdi nnan mme adausụn̄. Ndien nnan ama ada nnan usụn̄, mmọ mbiba ẹyeduọn̄ọ ke ukpe.”

Jesus odu ke n̄kpaidem ke ini Peter, ke ibuot mme mbet eken, ọdọhọde enye anam se isabarede owo an̄wan̄a mmimọ. Jesus ọbọrọ ete, “Nte mbufo n̄ko ẹmenana ifiọk ntem? Nte mbufo ikwe ite, sededi eke odụkde ke inua ebe odụk ke idịbi, ndien ẹsio ẹduọk ke ufọk ekwe? Edi n̄kpọ eke ẹwọn̄ọde owo ke inua ẹto ke esịt; edi mmọ ẹsabade owo. Koro mme idiọk ekikere ẹto ke esịt ẹwọn̄ọ, ye obom, ye efụbe, ye use, ye inọ, ye ikọ ntiense nsu, ye isụn̄i. Mmọemi ẹdi se isabarede owo; edi ndidia n̄kpọ ye ubọk eke mîyetke isabakede owo.”

Jesus mi ibiatke nnennen usanaidem ifep. Enye inenike ite ke iyomke owo eyet ubọk esie mbemiso etemde udia m̀mê adiade n̄kpọ. Utu ke oro, Jesus asua ọnọ mbubịk ido eke mme adaiso ido ukpono ẹmi ke mmọ ndida n̄kari n̄kari usụn̄ ndomo ndiwọn̄ọde nnennen ibet Abasi oto ke ndisọn̄ọ nyịre ke mme ido edinam oro n̄wed Abasi mîsọn̄ọke. Ih, edi ndiọi edinam ẹsabade owo, ndien Jesus owụt ete ke ẹmi ẹto ke esịt owo ẹwọn̄ọ. John 7:⁠1; Deuteronomy 16:16; Matthew 15:​1-20; Mark 7:​1-23; Exodus 20:12; 21:17; Isaiah 29:⁠13.

▪ Nso ubiọn̄ọ ke Jesus osobo idahaemi?

▪ Nso edori ikọ ke mme Pharisee ẹtịn̄, edi nte ekemde ye Jesus, didie ke mme Pharisee ẹkokoi ẹbiat Ibet Abasi?

▪ Nso ke Jesus ayararede nte edide mme n̄kpọ ẹmi ẹsabarede owo?