Ibuot 63

N̄kaiso Item Edinen̄ede

KE ADAN̄AEMI Jesus ye mme mbet esie ẹsụk ẹdude ke ufọk oro ke Capernaum, ẹneme ẹban̄a n̄kpọ efen ke adianade ye eneni oro mme apostle ẹnenide ẹban̄a enyeemi edide andikpon n̄kan. Emi edi n̄kpọntịbe n̄ko emi ẹkemede ndidi akada itie ke ini mmọ ẹfiakde ẹnyọn̄ Capernaum, ke ini Jesus mîkodụhe ke itie oro. Apostle John obụk ete: “Nnyịn ikokụt owo ebịnde mme demon ọduọk ke enyịn̄ Fo, nnyịn inyụn̄ ikpan enye, koro enye mîsan̄ake ye nnyịn.”

Nte an̄wan̄ade, John ada mme apostle nte san̄asan̄a n̄ka ukọk udọn̄ọ emi ẹnọde odudu. Ntre enye ekere ete ke owo emi akanam mme utom odudu eke mîdotke koro enye mîkabuanake ke otu mmọ.

Nte ededi, Jesus ọnọ item ete: “Ẹkûkpan enye: koro baba owo kiet idụhe eke anamde utom odudu ke enyịn̄ Mi, edinyụn̄ ekemede ndisọp inua ntịn̄ idiọk ndian Mi. Koro owo eke mîbiọn̄ọke nnyịn adada ye nnyịn. Koro owo ekededi eke edinọde mbufo cup mmọn̄ ẹn̄wọn̄ ke ntak enyịn̄ Mi, koro mbufo ẹnyenede Christ, ke akpanikọ ke ndọhọ mbufo, enye iditreke-tre ndibọ utịp esie.”

Ikoyomke ite owo emi adaha etiene Jesus man owụt nte ke imọ ida ke n̄kan̄ esie. Owo ikọtọn̄ọke esop Christian kan̄a, ntre enye ndiketre ndidu ke otu mmọ ikọwọrọke ke enye okoto isio isio esop. Eren oro ama enen̄ede enyene mbuọtidem ke enyịn̄ Jesus ndien ke ntem ama okụt unen ke ndibịn mme demon nduọk. Enye akanam n̄kpọ oro ekemde mfọn mfọn ye se Jesus ọkọdọhọde nte odotde se ẹnọde utịp. Jesus owụt ete ke ndinam emi, enye iditabake utịp esie.

Edi nso edieke ikọ ye edinam mme apostle oro ẹkenamde eren emi atuak ukot ọduọ? Emi ọkpọdiọk ata etieti! Jesus etịn̄ ete: “Owo ekededi eke edisịnde kiet ke otu n̄kpri nditọn̄wọn̄ ẹmi ẹnịmde ke akpanikọ ọduọ, ọfọn akan ye enye nte ẹkpedade akwa itiat ukọkn̄kpọ ẹkọn̄ọ enye ke itọn̄, ẹnyụn̄ ẹtop enye ẹduọk ke inyan̄.”

Jesus ọdọhọ ete ke mme anditiene imọ ẹkpenyene ndisio n̄kpọ ekededi oro mmọ ẹmade ke uwem mmọ mfep, utọ nte ubọk, ukot, m̀mê enyịn oro akpanamde mmọ ẹtuak ukot ẹduọ. Ọkpọfọn ndinana n̄kpọ oro ẹmade mi nnyụn̄ mbe ndụk Obio Ubọn̄ Abasi akan ndimụm enye n̄kama nnyụn̄ ndi se ẹtopde ẹduọk ke Gehenna (kpa ifụm mbio oro akasakde ikan̄, emi okodude ekpere Jerusalem), emi adade aban̄a nsinsi nsobo.

Jesus ọtọt n̄ko ete: “Ẹtịn̄ enyịn ẹkûsịn kiet ke otu n̄kpri nditọn̄wọn̄ ẹmi ke ndek: koro ndọhọ mbufo nte, mme angel mmọ ke heaven ẹsụk ẹkụt iso Ete Mi emi odude ke heaven.” Enye ndien ọnọ uwụtn̄kpọ ke nte “n̄kpri nditọn̄wọn̄” ẹmi ẹsọn̄de urua ke ini enye etịn̄de aban̄a owo emi enyenede erọn̄ ikie edi kiet ọbọhọ enye osop. Jesus anam an̄wan̄a ete, owo emi eyekpọn̄ 99 oro aka okoyom kiet emi osopde, ndien ke okụtde enye, adat esịt etieti aban̄a enye akan 99 eken. Jesus ndien eberi ete: “Kpasụk ntre idịghe uduak Ete mbufo ke heaven ete kiet ke otu n̄kpri nditọn̄wọn̄ ẹmi akpatak.”

Ndusụk ke ekerede aban̄a eneni oro mme apostle esie ẹkenenide ke otu idemmọ, Jesus ọdọhọ ete: “Ẹnyene inụn̄ ke esịt mbufo, ẹnyụn̄ ẹtie ke emem ye kiet eken.” Inụn̄ esinam udia oro etiede ibe ibe enyene inem akan. Ntem, ndamban̄a inụn̄ anam se owo etịn̄de edi se ẹnyịmede mmemmem mmemmem. Ndinyene utọ inụn̄ oro eyen̄wam ndinam emem akaiso odu.

Edi ke ntak unana mfọnmma eke owo, n̄kpọsọn̄ utọk ẹkeme ndida itie ke ndusụk ini. Jesus n̄ko ọnọ ndausụn̄ ke nte ẹkpesede ẹban̄a mmọ. Jesus ọdọhọ ete, “Edieke eyenete fo eduede fi, ka kasua ndudue esie nọ enye, sụk fi ye enye ikpọn̄. Edieke enye okopde uyo fo, afo amada eyenete fo enyene.” Edieke enye mîkopke, Jesus ọnọ item ete, “da owo kiet m̀mê iba dian idem, man ke inua ntiense iba m̀mê ita kpukpru ikọ ẹkpesọn̄ọ ẹda.”

Ibọhọke nte akpatre usụn̄ un̄wam ke Jesus ọdọhọ ete, men n̄kpọ emi tịn̄ nọ “ufọk Abasi,” oro edi, mme esenyịn ẹmi ẹnyenede mbiomo emi ke esop, oro ẹkemede ndinọ eti ubiereikpe. Edieke anamidiọk oro mînyịmeke ye ubiere mmọ, Jesus eberi ete, “yak enye etie fi ke enyịn nte owo mme idụt ye publican.”

Ke ndinam utọ ubiere oro, oyom mme esenyịn ẹnen̄ede ẹtiene item ẹmi ẹdude ke Ikọ Jehovah. Ntem, ke ini mmọ ẹkụtde ẹte ke owo emi enyene ubiomikpe onyụn̄ odot ndibọ ufen, ubiereikpe oro ‘eyedi se ẹma ẹkebọbọp ke heaven.’ Ndien ke ini mmọ “ẹtatde ke isọn̄,” oro edi, ẹkụtde ẹte ke owo iduehe, eyedi ẹma ‘ẹtatat ke heaven.’ Ke utọ ikpe ntre, Jesus ọdọhọ ete, “ọtọ nte owo iba m̀mê ita ẹsopde idem ke enyịn̄ Mi, do ke ndodu ke ufọt mmọ.” Matthew 18:​6-20; Mark 9:​38-50; Luke 9:​49, 50.

▪ Ntak emi mîkoyomke ẹdadaha ẹtiene Jesus ke eyo esie?

▪ Ndinam ekpri eyenọwọn̄ atuak ukot ọduọ ọdiọk didie, ndien didie ke Jesus anam an̄wan̄a nte utọ mbon ẹmi ẹsọn̄de urua?

▪ Anaedi nso inam Jesus esịn udọn̄ ọnọ mme apostle ndinyene inụn̄ ke idemmọ?

▪ Nso ke ‘edibọp’ ye ‘editat’ ọwọrọ?