Ibuot 73
Owo Samaria Nte Mbọhọidụn̄
ISO-ỌFỌN Jesus odu ekpere Bethany, obio-in̄wan̄ oro oyomde usụn̄ ke n̄kpọ nte itiat iba ọkpọn̄ Jerusalem. Eren kiet oro otịmde ọfiọk Ibet Moses asan̄a ekpere enye ye mbụme, obụpde ete: “Andikpep, ndinam nso man nnyene nsinsi uwem?”
Jesus ọfiọk ete ke eren emi, kpa ọfiọkibet, emi ibụpke man enyene ifiọk, utu ke oro, edi koro enye aduakde ndidomo imọ. Ekeme ndidi uduak ọfiọkibet emi edi man Jesus ọbọrọ ke usụn̄ nte edibiatde eti ibuot mme Jew. Ntem Jesus anam ọfiọkibet emi esịn idem ke mfịna, obụpde ete: “Ẹwewet didie ke ibet? Okot didie?”
Ke ibọrọ, ọfiọkibet oro, ke ndida esen esen ekikere ndisịn, okot oto mme ibet Abasi ke Deuteronomy 6:5 ye Leviticus 19:18, ọdọhọde ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo, ye ke ofụri ekikere fo; nyụn̄ ma mbọhọidụn̄ fo nte idemfo.”
Jesus ọdọhọ ete, “Omotịm ọbọrọ: nam ntre, ndien eyedu uwem.”
Nte ededi, ọfiọkibet oro iyụhọke-yụhọ. Ibọrọ Jesus itịmke isiak n̄kpọ emi inọ enye. Enye oyom nsọn̄ọ oto Jesus nte ke mme ekikere imọ ẹnen ndien nte ke imọ imenen ke usụn̄ nte inamde n̄kpọ ye mbon efen. Ntre, enye obụp ete: “Anie edi mbọhọidụn̄ mi nan̄a?”
Mme Jew ẹnịm ke akpanikọ ẹte ke ikọ oro “mbọhọidụn̄” aban̄a ekemmọ mme Jew ikpọn̄îkpọn̄, nte udọn̄ikọ eke Leviticus 19:18 etiede nte owụt. Ke akpanikọ, idem ke ukperedem, apostle Peter ọkọdọhọ ete: “Mbufo ke idem mbufo ẹmefiọk ẹte ibet akpan owo emi edide Jew ndidian idem ndinyụn̄ nsan̄a n̄kpere owo emi otode idụt.” Ntem ọfiọkibet emi, ndien iso-ọfọn mme mbet Jesus n̄ko, ẹnịm ke akpanikọ ẹte ke mmimọ idi ndinen owo edieke mmimọ inamde n̄kpọ mfọnido mfọnido ye ekemmọ mme Jew kpọt, sia, nte mmọ ẹkerede, mbon oro mîdịghe mme Jew mînen̄ekede idi mbọhọidụn̄ mmimọ.
Didie ke Jesus ekeme ndinen̄ede ekikere emi ye unana edinam esịt ayat mme andikpan̄ utọn̄ nnọ enye? Enye ọnọ mbụk, ekeme ndidi ọkọn̄ọ ke ata n̄kpọ oro okotịbede. Jesus anam an̄wan̄a ete: “Owo [Jew] kiet okoto Jerusalem osụhọde aka Jericho; ndien ọduọ ke otu mbon n̄wo, ẹmi ẹkpọkde enye edisịne n̄kpọ ke idem ẹfep, ẹmia enye, ẹnyụn̄ ẹdaha ẹkpọn̄ enye ekpere n̄kpa.”
Jesus akaiso ete, “Edi nte n̄kpọ anade, oku kiet osụhọde edi ke usụn̄ oro, okụt owo oro, onyụn̄ asan̄a ebe ke n̄kan̄ eken. Kpasụk ntre ke Levite kiet osịm ọtọ oro, ada ese enye, onyụn̄ asan̄a ebe ke n̄kan̄ eken. Edi eyen Samaria kiet, emi asan̄ade isan̄, edisịm ọtọ emi owo oro odude, onyụn̄ okụt enye, atua enye mbọm.”
Ediwak oku ye mme Levite oro ẹsin̄wamde mmọ ke utom temple ẹdụn̄ ke Jericho, edide itiat 14 ke idiọkusụn̄ oro anade osụhọde ke n̄kpọ nte ikpat 3,000 oto ebiet oro mmọ ẹnamde utom ke temple ke Jerusalem. Ẹma ẹdori enyịn ndikụt oku ye owo Levite ẹn̄wamde ekemmọ owo Jew emi odude ke nnanenyịn. Edi mmọ in̄wamke. Utu ke oro, owo Samaria akam an̄wam. Mme Jew ẹsua mbon Samaria etieti tutu mmọ ke ndondo emi ẹma ẹsụn̄i Jesus ata idiọk idiọk ke ndikot enye “owo Samaria.”
Nso ke owo Samaria emi anam man an̄wam owo Jew emi? Jesus ọdọhọ ete, “[Enye] asan̄a adiana enye, ọtọhọ wine ye aran ke unan esie, onyụn̄ ọbọp mmọ: onyụn̄ emen enye odori ke enyọn̄ enan̄ esiemmọ, ada enye edi ke ufọkisen, onyụn̄ ekpeme enye. Ndien ke ndan̄nsiere enye osio okụk iba [edide n̄kpọ nte okụk utom usen iba] ọnọ eteufọk, ete enye, Kpeme owo emi; ndien mma mfiak ndi, nyesio se edibiatde akan oro nnọ fi.”
Ke ama ọkọnọ mbụk emi ama, Jesus obụp ọfiọkibet oro ete: “Ke otu owo ita oro, ese ete anie edi mbọhọidụn̄ owo emi ọkọduọde ke otu mbon n̄wo?”
Sia mîfọnke enye ke idem ndiyak itoro ekedide nnọ owo Samaria, ọfiọkibet oro ọnọ sụk ibọrọ emi: “Edi owo emi akatuade enye mbọm.”
Jesus ebiere ete, “Ka kanam kpasụk ntre.”
Ke ekpedide Jesus ọkọdọhọ ọfiọkibet oro nnennen ete ke mbon oro mîdịghe mme Jew ẹkedi mme mbọhọidụn̄ esie n̄ko, idịghe eren oro ikpọn̄ ekpekesịn ndinyịme ye emi, edi ediwak otuowo ẹkeme ndidi ẹkpekeda ke n̄kan̄ esie ke nneme esie ye Jesus. Nte ededi, mbụk emi asan̄ade ekekem ye akpanikọ mi, anam ana in̄wan̄în̄wan̄ ke usụn̄ oro owo mîkemeke ndifan̄a nte ke mme mbọhọidụn̄ nnyịn ẹbuana mmọ eken ke ẹsiode mbon oro ẹtode orụk m̀mê idụt nnyịn ẹfep. Nso utịbe utịbe usụn̄ ke Jesus enyene ntem ke ndinọ ukpep! Luke 10:25-37; Utom 10:28; John 4:9; 8:48.
▪ Nso mme mbụme ke ọfiọkibet obụp Jesus, ndien nte an̄wan̄ade nso idi uduak esie ke ndibụp mbụme ẹmi?
▪ Mme Jew ẹnịm ke akpanikọ ẹte mmanie ẹdi mme mbọhọidụn̄ mmimọ, ndien nso ntak idu ndinịm nte ke idem mme mbet ẹnyene ukem ekikere emi?
▪ Didie ke Jesus emen nnennen ekikere owụt man ọfiọkibet okûfan̄a ye enye?