Ibuot 89
Isan̄ Utuambọm ke Judea
URUA ifan̄ ke edem, ke ini Usọrọ Ediyak Temple Nnọ ke Jerusalem, mme Jew ẹma ẹdomo ndiwot Jesus. Ntre enye ama anam isan̄ ọdọk edem edere, emi nte an̄wan̄ade edide ebiet emi mîyomke usụn̄ ikpọn̄ Inyan̄ Galilee.
Ndondo emi, enye afiak anam isan̄ aka edem usụk n̄kan̄ Jerusalem, ọkwọrọde ikọ ke mme obio-in̄wan̄ Perea, ikpehe edem usiahautịn n̄kan̄ Akpa Jordan. Ke ama okokụre mbụk aban̄ade owo inyene ye Lazarus, enye akaiso ndikpep mme mbet esie mme n̄kpọ oro enye ama ekekpekpep ke adan̄aemi odude ke Galilee.
Ke uwụtn̄kpọ, enye ọdọhọ ete, ke okpotịm ọfọn “owo ndikpada itiat ukọk ibokpot n̄kọn̄ọ enye ke itọn̄, ndien ẹduọk enye ke inyan̄,” akan enye ndinam “n̄kpri nditọ” Abasi ẹtuak ukot ẹduọn̄ọ. Enye n̄ko ọsọn̄ọ etịn̄ ufọn edidahado nnọ, anamde an̄wan̄a ete: “Edieke [eyenete] eduede fi utịm ikatiaba ke usen kiet, onyụn̄ afiakde etiene fi utịm ikatiaba ke usen kiet edidọhọ ete, Mmatua n̄kpọfiọk; ana nte afo adahado ọnọ enye.”
Ke ini mme mbet ẹben̄ede ẹte, “Nam mbuọtidem nnyịn okpon akan,” Jesus ọbọrọ ete: “Edieke mbufo ẹnyenede mbuọtidem eke etiede nte n̄kpasịp mustard, mbufo ẹkpedọhọ eto sycamine emi ẹte, Wụhọde mi ke ebiet emi, ka kọwụhọ ke inyan̄; ndien enye akpanam uyo mbufo.” Ntem idem ekpri mbuọtidem ekeme ndinam ikpọ n̄kpọ.
Ekem, Jesus ọnọ mbụk oro edide ata idem n̄kpọ, oro owụtde nnennen edu asan̄autom ata ọkpọsọn̄ Abasi. Jesus ọdọhọ ete, “Edi anie owo ke otu mbufo, emi enyenede ofụn eke ofụn̄de isọn̄ m̀mê ọbọkde erọn̄, edidọhọ enye, ke ini enye otode in̄wan̄ edi, ete, Sọp di, tetie ke itie udia? Nte idikam idọhọke enye ite, Nịm udia nọ mi ndia, nyụn̄ ben̄e idem, fak ọfọn̄ fo, da mbet tutu ndia nnyụn̄ n̄n̄wọn̄ n̄kpọ; ekem afo eyedia onyụn̄ ọn̄wọn̄ okwo. Nte enye edikọm ofụn oro koro anamde uyo esie? Kpa ntre ke mbufo n̄ko, ke adan̄aemi mbufo ẹnamde kpukpru se ẹkedọhọde mbufo, ẹdọhọ ẹte, Nnyịn idi ifụn eke mînamke utom ibe adan̄a; inam kpa se nnyịn ikpanamde.” Ntre, mme asan̄autom Abasi ikpedehe-dei ikere ite ke mmimọ imanam ufọn inọ Abasi ke ndinam n̄kpọ esie. Utu ke oro, mmọ kpukpru ini ẹkpenyene nditi ifet oro mmọ ẹnyenede ndituak ibuot nnọ enye nte mbonufọk esie oro ẹdide se ẹbuọtde idem.
Nte an̄wan̄ade edi ibio ini ke enye ama okokụre ndinọ uwụtn̄kpọ emi ke isụn̄utom kiet edisịm. Edi Mary ye Martha, nditọeka Lazarus, ẹmi ẹdụn̄de ke Bethany eke Judea, ẹkesio enye ẹdọn̄. Isụn̄utom oro ọdọhọ ete, “Ọbọn̄, owo emi Afo amade ke ọdọn̄ọ.”
Jesus ọbọrọ ete: “Udọn̄ọ emi idịghe udọn̄ọ n̄kpa, edi odu kaban̄a ubọn̄ Abasi, man otodo ẹnọ Eyen Abasi ubọn̄.” Ke ama okodu usen iba ke ebiet emi enye odude, Jesus ọdọhọ mme mbet esie ete: “Ẹyak nnyịn itọn̄ọ ntak ika ke Judea.” Nte ededi, mmọ ẹti enye ẹte: “Rabbi, kpa idahaemi mme Jew [“mbon Judea,” NW] ẹyom nditọ Fi ke itiat: nte ọmọn̄ ọtọn̄ọ ntak aka do?”
Jesus obụp ete, “Nte hour duopeba idụhe ke uwemeyo? Edieke owo asan̄ade ke uwemeyo, enye iduọhọ koro enye okụtde un̄wana ererimbot emi: edi edieke owo asan̄ade ke okoneyo, enye ọduọ, koro ananade un̄wana.”
Se ikọ Jesus ọwọrọde nte an̄wan̄ade edi nte ke “hour . . . uwemeyo,” m̀mê ini oro Abasi okonịmde ọnọ utom Jesus ke isọn̄, ibehe kan̄a ndien ibọhọke tutu mmọ ẹbe, owo ndomokiet ikemeke ndinọ imọ unan. Oyom enye ada ibio ini “uwemeyo” oro osụhọde ọnọ enye anam n̄kpọ ọyọhọ ọyọhọ, koro ke oro ebede, “okoneyo” eyedi emi mme asua esie ẹdiwotde enye.
Jesus adian do ete: “Lazarus, ufan nnyịn, ke ede; edi mmọn̄ n̄ka man ndemede enye ke idap.”
Nte an̄wan̄ade, ke ẹkerede ẹte ke Lazarus ọbọ nduọkodudu ke idap ye nte ke emi edi ata idiọn̄ọ nte ke enye eyekop nsọn̄idem, mme mbet esie ẹbọrọ ẹte: “Ọbọn̄, edieke enye edede idap, eyekụt nsọn̄idem.”
Ekem Jesus etịn̄ in̄wan̄în̄wan̄ ọnọ mmọ ete: “Lazarus ama akpa. Ndien esịt adat Mi koro mmen̄kodụhe do ke ntak mbufo, man mbufo ẹnịm ke akpanikọ; ẹdi ẹyak nnyịn itiene enye.”
Ke ọfiọkde ete ke ẹkeme ndiwot Jesus ke Judea, edi aduakde ndinọ enye ibetedem, Thomas esịn udọn̄ ọnọ ekemmọ mbet ete: “Ẹyak nnyịn itiene Enye ika ikakpa ye Enye.” Ntre ke ẹsịnde uwem mmọ ke itiendịk, mme mbet ẹtiene Jesus ke isan̄ utuambọm emi ke Judea. Luke 13:22; 17:1-10; John 10:22, 31, 40-42; 11:1-16.
▪ M̀mọ̀n̄ ke Jesus ọkwọrọ ikọ ndondo emi?
▪ Mme ukpepn̄kpọ ewe ke Jesus afiak ekpep, ndien nso mbụk edide ata idem n̄kpọ ke Jesus ọnọ ndinam ewe akpan n̄kpọ an̄wan̄a?
▪ Nso etop ke Jesus ọbọ, ndien nso ke ikọ esie ọwọrọ ke ndidọhọ “uwemeyo” ye “okoneyo”?
▪ Nso ke ikọ Thomas ọwọrọ ke ini enye ọdọhọde ete, “Ẹyak nnyịn itiene Enye ika ikakpa ye Enye”?