Ibuot 101

Ke Bethany, ke Ufọk Simon

KE INI Jesus ọkpọn̄de Jericho, enye enen iso aka Bethany. Isan̄ oro ada ekese ini ke usen oro, sia edide edidọdọk n̄kpọ nte itiat 12 ke idiọk usụn̄. Jericho osụhọde ke n̄kpọ nte ikpat 820 ọtọn̄ọde ke unaisọn̄ mbeninyan̄, ndien Bethany okon̄ ke ikpat 2,500 ọtọn̄ọde ke unaisọn̄ mbeninyan̄. Nte afo ekemede nditi, Bethany edi obio Lazarus ye nditọeka esie iban. Ekpri obio emi oyom usụn̄ ọkpọn̄ Jerusalem ke n̄kpọ nte itiat iba, onyụn̄ odu ke itịghede ikpehe edem usiahautịn Obot Olive.

Ediwak owo ẹma ẹbebehe ke Jerusalem ndinịm usọrọ Passover. Mmọ ẹma ẹbak ẹdi ndinam idemmọ asana nte ekemde ye ibet. Ekeme ndidi mmọ ẹma ẹtụk okpo-owo m̀mê ẹnamde n̄kpọ ekededi oro anamde mmọ ẹdehe. Ntre mmọ ẹtiene mme ndutịm ndinam idemmọ asana man ẹkpenịm usọrọ Passover ke usụn̄ oro ẹnyịmede. Nte mmọemi ẹkebemde iso ẹsịm mi ẹbohode ke temple, ediwak owo ẹkere m̀mê Jesus eyedi Passover.

Jerusalem edi iwụk ebiet eneni aban̄ade Jesus. Ẹtịm ẹdiọn̄ọ ẹte ke mme adaiso ido ukpono ke ẹyom ndimụm Jesus nnyụn̄ n̄wot enye. Ke akpanikọ, mmọ ẹma ẹnọ uyo ẹte, edieke owo ekededi ọfiọkde ebiet emi enye odude, anam mmimọ ifiọk. Utịm ikata ke mme ọfiọn̄ ndondo emi​—⁠ke Usọrọ Mme Ataya, ke Usọrọ Ediyak Temple Nnọ, ye ke enye ama akanam Lazarus eset​—⁠mme adaiso ido ukpono ẹmi ẹma ẹdomo ndiwot enye. Ntre mme owo ẹyịk ẹte, nte Jesus eyetọn̄ọ ntak owụt idem an̄wan̄wa inikiet efen? Mmọ ẹbụp kiet eken ẹte, “Ẹse didie?”

Mi kan̄a, Jesus osịm Bethany usen itiokiet mbemiso Passover, emi ọduọde ke Nisan 14 nte ekemde ye n̄wed usenọfiọn̄ mme Jew. Jesus osịm Bethany ke n̄kpọ nte mbubịteyo Friday, emi edide ntọn̄ọ Nisan 8. Enye ikpekemeke ndinam isan̄ n̄ka Bethany ke Saturday koro ndisan̄a ke usen Sabbath​—⁠ọtọn̄ọde ke mbubịteyo Friday osịm mbubịteyo Saturday⁠—​edi se ibet mme Jew akpande. Anaedi Jesus aka ufọk Lazarus, nte enye akanamde mbemiso, onyụn̄ adan̄ do ke okoneyo Friday.

Nte ededi, owo en̄wen odụn̄de ke Bethany okot Jesus ye mme nsan̄a esie udia ke mbubịteyo Saturday. Eren oro edi Simon, emi ọkọdọn̄ọde akpamfia mbemiso, emi iso-ọfọn Jesus akanamde okop nsọn̄idem ke ntọn̄ọ ntọn̄ọ. Ke akade iso ke ifịk ifịk utom esie, Martha anam n̄kpọ ọnọ isenowo. Edi isan̄ enyeemi, Mary anam n̄kpọ ọnọ Jesus ke ata isio isio usụn̄ oro edemerede eneni.

Mary ọkûbọde otu, m̀mê ekpeme, emi esịnede enem utebe aran, “ata ọsọn̄urua edifuọn̄ aran,” emi odobide ke n̄kpọ nte pound kiet. Emi edi ata ọsọn̄urua n̄kpọ. Ke akpanikọ, ekọmurua esie edi n̄kpọ nte okụk utom isua kiet! Ke ini Mary ọtọhọde aran emi ọduọk Jesus ke ibuot ye ukot onyụn̄ adade idet esie ọkwọhọde enye ukot, inem utebe aran emi ọyọhọ ofụri ufọk oro.

Mme mbet esie ẹyat esịt ẹnyụn̄ ẹbụp ẹte: “Ẹbiat n̄kpọ emi ẹban̄a nso?” Ekem Judas Iscariot ọdọhọ ete: “Nsinam mîkanyamke edifuọn̄ aran emi ibọ okụk ikie ita, ida inọ mme ubuene?” Edi Judas inen̄ekede ikere iban̄a mme ubuene, koro enye esiyịpde okụk ke ekpatokụk oro mme mbet ẹnịmde.

Jesus edi ndinyan̄a Mary. Enye ọnọ uyo ete: “Ẹkpọn̄ enye; nsinam ẹfịnade enye? Enye akanam eti utom ke idem Mi. Koro mbufo ẹmenyene mme ubuene ye mbufo kpukpru ini, ndien ini eke ẹmama, mbufo ẹ [me]keme ndifọn ido ye mmọ, edi mbufo inyeneke Mi kpukpru ini. Enye akanam se ekemede; enye ebemiso eyet Mi ufuọn̄kpọ ke idem eben̄e ini edibụk Mi. Ke akpanikọ ke ndọhọ mbufo, Ebiet ekededi eke ẹdikwọrọde gospel ke ofụri ererimbot, ẹyenyụn̄ ẹtịn̄ se n̄wan emi akanamde, ndida nti enye.”

Jesus omodu ke Bethany idahaemi ebe hour 24, ndien etop aban̄ade enye ndidu mi asuana. Ke ntre, ediwak owo ẹdi ufọk Simon ndikụt Jesus, edi mmọ n̄kọ ẹdi ndise Lazarus, emi odude do n̄ko. Ntre ikpọ oku ẹdụk ediomi ndiwot Jesus ye Lazarus nde. Emi edi koro ediwak owo ẹbuọtde idem ye Jesus sia mmọ ẹkụtde enyeemi enye akanamde eset ke n̄kpa nte odude uwem! Ke akpanikọ, mme adaiso ido ukpono ẹmi ẹdiọk didie ntem! John 11:⁠55–12:11; Matthew 26:​6-13; Mark 14:​3-⁠9; Utom 1:⁠12.

▪ Nso nneme ikaiso ke temple ke Jerusalem, ndien ntak-⁠a?

▪ Ntak akanade Jesus ebehe ke Bethany ke Friday utu ke Saturday?

▪ Ke ini Jesus osịmde Bethany, anaedi ke m̀mọ̀n̄ ke enye adan̄ ke usen Sabbath oro?

▪ Nso edinam Mary idemede eneni, ndien didie ke Jesus edi edinyan̄a enye?

▪ Nso iwụt akwa idiọkido eke ikpọ oku?