Ibuot 130

Ke Inyan̄ Galilee

MME apostle kemi ẹfiak ẹnyọn̄ Galilee, nte Jesus ke mbemiso eketemede mmọ ete ẹnam. Edi mmọ idiọn̄ọke se mmọ ẹkpenamde do. Ke esisịt ini ebede, Peter asian Thomas, Nathanael, James ye John, eyeneka esie, ye apostle iba efen ete: “Mmọn̄ ndika ọkọ.”

Owo itiokiet oro ẹbọrọ ẹte, “Nnyịn iyetiene fi ika.”

Ke ofụri okoneyo oro, mmọ imụmke iyak ndomokiet. Nte ededi, ke eyo akade ndisiere, Jesus ọbiọn̄ọde ke esụk, edi mme apostle idiọn̄ọke ke edi Jesus. Enye ofiori ete: “Nditọ, nte mbufo ẹmenyene se ẹdiade?”

Mmọ ẹda ke mmọn̄ ẹfiori ẹte, “Inyeneke.”

Enye ọdọhọ ete, “Ẹduọk iyịre ke n̄kan̄ nnasia ubom, ndien mbufo ẹyekụt n̄kpọ.” Ndien ke ini mmọ ẹduọkde, mmọ ikemeke ndikot iyịre mmọ ke ntak uwak iyak.

John ofiori ete, “Edi Ọbọn̄.”

Ke okopde emi, Peter esịne edisịnen̄kpọ esie, koro enye okosion̄ode ọfọn̄idem esie, ọduọk idem ke inyan̄. Enye ndien ọwọk ke n̄kpọ nte yard ikie ọkọwọrọ ke obot. Mme apostle eken ẹwat ke ekpri ubom ẹtiene, ẹdụride iyịre oro ọyọhọde ye iyak.

Ke ini mmọ ẹsịmde obot, ikan̄ ukan̄ odu do, ye iyak odorode ke enyọn̄, uyo onyụn̄ odu. Jesus ọdọhọ ete, “Ẹda ndusụk iyak eke mbufo ẹmụmde idahaemi ẹdi.” Peter odụk ke ubom okodụri iyịre ọdọk obot. Enye esịne ikpọ iyak 153!

Jesus ọnọ ikot ete, “Ẹdi ẹdidia n̄kpọ.”

Baba owo mmọ kiet inyeneke uko ndibụp enye ete, “Afo edi anie?” sia kpukpru mmọ ẹdiọn̄ọde ẹte ke edi Jesus. Emi edi ọyọhọ utịm ikatiaba emi enye owụtde idem ke ama ekeset, ye ọyọhọ utịm ikata ndiwụt mme apostle idem nte otu. Enye kemi edeme udia, ọnọde owo mmọ kiet kiet uyo ye iyak.

Ke mmọ ẹdiade n̄kpọ ẹkụre, Jesus, iso-ọfọn esede ediwak iyak oro ẹkemụmde, obụp Peter ete: “Simon, eyen John, nte ama[ma] Mi akan mmọemi?” Nte eyịghe mîdụhe ikọ esie ọwọrọ, Nte afo omotịm ama utom ukọ iyak akan utom oro n̄kotịmde fi idem ndinam?

Peter ọbọrọ ete, “Afo ọmọfiọk ete mmama Fi.”

Jesus ọbọrọ ete, “Bọk nditọerọn̄ Mi.”

Enye afiak obụp ọyọhọ utịm ikaba ete: “Simon eyen John, nte ama[ma] Mi?”

Peter ọbọrọ ke ofụri esịt ete, “Edi ntre Ọbọn̄, Afo ọmọfiọk ete mmama Fi.”

Jesus afiak owụk ete, “Kpeme mme erọn̄ Mi.”

Ekem, enye obụp ọyọhọ utịm ikata, ete: “Simon eyen John nte amama Mi?”

Peter kemi okop mfụhọ. Ekeme ndidi enye ekere m̀mê Jesus enyene eyịghe aban̄a edinam akpanikọ imọ. Kamse, ke ini Jesus ke ndondo emi okodude ke ikpe kaban̄a uwem esie, Peter utịm ikata ama akan̄ ete ke imọ idiọn̄ọke enye. Ntre Peter ọdọhọ ete: “Ọbọn̄, ọmọfiọk kpukpru n̄kpọ; Afo ọmọfiọk ete mmama Fi.”

Jesus owụk ọyọhọ utịm ikata ete, “Bọk mme erọn̄ Mi.”

Jesus ke ntre ada Peter nte n̄kpọ ndisọn̄ọ mmịn̄ n̄kpọ nsịn ke esịt mbon eken mban̄a utom oro enye oyomde mmọ ẹnam. Ibịghike enye eyekpọn̄ isọn̄, ndien enye oyom mmọ ẹda iso ke ndinam n̄kpọ nnọ mbon oro ẹdidade ẹdisịn ke otuerọn̄ Abasi.

Ukem nte ẹkebọpde ẹnyụn̄ ẹwotde Jesus ke ntak akanamde utom oro Abasi ọkọdọn̄de enye ndinam, ntre, enye kemi ayarade, ete ke Peter eyesobo ukem n̄kpọntịbe oro. Jesus asian enye ete, “Ke ini edide akparawa, afo akam esibọbọ mbọbọ, asan̄a aka ọtọ nte amade: edi ke ini edisọn̄de, eyenyanade ubọk fo, ndien owo en̄wen eyebọp fi mbọbọ, onyụn̄ ada fi aka ọtọ nte mûdumaha ndika.” Kpa ye n̄kpa usụn̄ Abasi oro anade ebet Peter, Jesus akpak enye ete: “Tiene Mi.”

Ke ọwọn̄ọrede enyịn, Peter okụt John onyụn̄ obụp ete: “Ọbọn̄, owo emi edinyụn̄ anam nso?”

Jesus ọbọrọ ete, “Edieke nyomde enye osụk odu tutu ndi, nso mbubehe ke enyene do? Afo kam tiene Mi.” Ediwak mbet ẹkere ke ikọ Jesus ẹmi ọwọrọ ke apostle John idikpaha. Nte ededi, nte apostle John akanamde an̄wan̄a ke ukperedem, Jesus ikọdọhọke ite ke enye idikpaha, edi Jesus n̄kukụre ọkọdọhọ ete: “Edieke nyomde enye osụk odu tutu ndi, nso mbubehe ke enyene do?”

John ke ukperedem ama etịn̄ akpan n̄kpọ emi ete: “Ediwak n̄kpọ en̄wen ẹnyụn̄ ẹdu ẹmi Jesus akanamde: ndien edieke ẹkpewetde mmọ kpukpru, etie mi nte kpa idem ererimbot ikpekemeke ndikọhọ se ẹwetde.” John 21:​1-25; Matthew 26:32; 28:​7, 10.

▪ Nso iwụt ite ke mme apostle idiọn̄ọke se mmọ ẹkpenamde ke Galilee?

▪ Didie ke mme apostle ẹdiọn̄ọ Jesus ke Inyan̄ Galilee?

▪ Jesus kemi owụt idem utịm ikafan̄ tọn̄ọ nte enye ekeset?

▪ Didie ke Jesus ọsọn̄ọ etịn̄ se enye oyomde mme apostle ẹnam?

▪ Didie ke Jesus owụt usụn̄ nte Peter edikpade?

▪ Ewe ikọ Jesus oro aban̄ade John mîn̄wan̄ake ediwak mbet?