Ukpepn̄kpọ 14
Nte Ẹtịmde Mme Ntiense Jehovah
Ini ewe ke Mme Ntiense Jehovah ẹkenyene ntọn̄ọ mmọ eke eyomfịn? (1)
Didie ke ẹsinịm mme mbonoesop eke Mme Ntiense Jehovah? (2)
Didie ke ẹse ẹban̄a ubiatokụk? (3)
Mmanie ẹda usụn̄ ke esop kiet kiet? (4)
Ikpọ mboho ewe ke ẹsinịm ke isua kiet kiet? (5)
Nso utom ke ẹnam ke ibuot itieutom ye ke mme ọfis n̄kọk itieutom mmọ? (6)
1. Mme Ntiense Jehovah ẹkenyene ntọn̄ọ mmọ eke eyomfịn ke iduọkisua 1870. Ke ntọn̄ọ ntọn̄ọ, ẹkekot mmọ Nditọ Ukpepn̄kpọ Bible. Edi ke 1931 mmọ ẹma ẹda enyịn̄ N̄wed Abasi oro Mme Ntiense Jehovah ẹnyene. (Isaiah 43:10) Toto ke ekpri ntọn̄ọ oro esop oro ọmọkọri osịm ediwak miliọn Mme Ntiense, ẹmi ẹsịnde idem ẹkwọrọ ikọ ke se iwakde ibe idụt 230.
2. Ata ediwak esop Mme Ntiense Jehovah ẹsinyene mme mbonoesop ikata ke urua kiet kiet. Ẹnọ fi ikot ndidụk ekededi ke otu ẹmi. (Mme Hebrew 10:24, 25) Se ẹkpepde ọkọn̄ọ ke Bible. Mme mbonoesop ẹsitọn̄ọ ẹnyụn̄ ẹtre ye akam. Ẹsikwọ mme “ikwọ spirit” ofụri esịt ke ata ediwak mbonoesop ẹmi. (Ephesus 5:18, 19) Ẹdụk ke mfọn, ndien owo ikamake usan ndomokiet isan̄a ibọ okụk.—Matthew 10:8.
3. Ata ediwak esop ẹsinịm mme mbonoesop ke Ufọkmbono Obio Ubọn̄. Mmọemi ẹsiwak ndidi mme ukeuke ufọk oro mme anamutom unyịmesịt ẹmi ẹdide Ntiense ẹsibọpde. Afo udukwe edisọi mbiet, cross, m̀mê mme n̄kpọ ntre ekededi ke Ufọkmbono Obio Ubọn̄. Mme etịbe unyịmesịt ke ẹsida ẹse ẹban̄a mme ubiatokụk. Ekebe etịbe esidu ọnọ mbon oro ẹmade ndinọ etịbe.—2 Corinth 9:7.
4. Ke esop kiet kiet, mbiowo, m̀mê mme esenyịn, ẹdu. Mmọ ẹda usụn̄ ke ndinọ ukpep ke esop. (1 Timothy 3:1-7; 5:17) Mme asan̄autom unamutom ẹsin̄wam mmọ. (1 Timothy 3:8-10, 12, 13) Owo imenekede iren ẹmi idaha okon̄ akan mbon eken oro ẹdude ke esop. (2 Corinth 1:24) Owo inọhọ mmọ mme akpan udorienyịn̄. (Matthew 23:8-10) Mmọ isịneke n̄kpọ oro edide isio ye eke mbon eken. Owo inyụn̄ ikpehe mmọ okụk ke utom oro mmọ ẹnamde. Mbiowo ke unyịmesịt ẹse ẹban̄a mme udọn̄ n̄kpọ eke spirit esop. Mmọ ẹkeme ndinọ ndọn̄esịt ye ndausụn̄ ke mme ini afanikọn̄.—James 5:14-16; 1 Peter 5:2, 3.
5. Mme Ntiense Jehovah n̄ko ẹsinịm ikpọ mbono ke isua kiet kiet. Ke mme ini ẹmi ediwak esop ẹsidi ẹdiboho ọtọkiet kaban̄a akpan ndutịm ukpep Bible. Edinịm mbufa mbet baptism esidi edinam ofụri ini ke ndutịm mbono m̀mê akamba mbono kiet kiet.—Matthew 3:13-17; 28:19, 20.
6. Ibuot itieutom ofụri ererimbot eke Mme Ntiense Jehovah odu ke New York. Otu Ukara, kpa akpan otu mbiowo oro ẹnyenede ifiọk ẹmi ẹsede ẹban̄a esop ofụri ererimbot, odu do. Se ibede mme ọfis n̄kọk itieutom 100 ke ofụri ererimbot ẹdu n̄ko. Ke mme ebiet ẹmi, mme anamutom unyịmesịt ẹsin̄wam ke ndimịn̄ nnyụn̄ nnọ mme n̄wed Bible ẹwọrọ. Ẹsinọ ndausụn̄ n̄ko ke nte ẹkpetịmde utom ukwọrọikọ. Ntak mûdiomike ndika n̄kese ọfis n̄kọk itieutom oro ekperede fi akan?