Esop ye Utom Ofụri Ererimbot Mmọ

EDIWAK ikpehe ẹdu oro ẹdade ndinọ ndausụn̄ ke utom edinọ ikọ ntiense ke se iwakde ibe idụt 230 oro ẹnamde utom. Ọyọhọ ndausụn̄ emi oto Otu Ukara ke ibuot itieutom ofụri ererimbot ke Brooklyn, New York. Otu Ukara esidọn̄ mme andida ke ibuot mmọ ke isua ke isua ndika nsio nsio ikpehe n̄kenyene nneme ye mme andida ke ibuot n̄kọk itieutom ke mme ikpehe oro. Mme andibuana ke mme Kọmiti N̄kọk Itieutom ẹdide n̄kpọ nte owo ita esịm itiaba ẹdu ke mme ọfis n̄kọk itieutom ndise mban̄a utom ke mme idut oro ẹdude ke idak mmọ. Ndusụk n̄kọk itieutom ẹnyene mme ufọkutom umịn̄n̄wed, ndusuk ẹdade mme ukwak umịn̄n̄wed rotary emi ẹnen̄erede ẹsọp ẹnam utom. Ẹbahade idụt m̀mê ikpehe oro n̄kọk itieutom kiet kiet anamde utom ẹsịn ke mme district ẹnyụn̄ ẹfiak ẹbahade ẹsịn ke mme circuit. N̄kpọ nte esop 20 ẹdu ke circuit kiet kiet. Esenyịn district esika ekese mme circuit oro ẹdude ke district esie ke adiana ke adiana. Ẹsinịm mbono iba ke isua ke isua ke circuit kiet kiet. Esenyịn circuit n̄ko odu, nte ido edide enye esisan̄a ese mme esop kiet kiet oro ẹdude ke circuit esie ikaba ke isua, an̄wamde Mme Ntiense nditịm nnyụn̄ nnam utom ukwọrọikọ ke efakutom emi ẹdemede ẹnọ esop oro.

Esop n̄kann̄kụk ye Ufọkmbono Obio Ubọn̄ esie ẹdi iwụk ebiet ke ndineme eti mbụk ke n̄kann̄kụk mbufo. Ẹbahade mme ikpehe emi ẹdude ke idak esop kiet kiet ẹsịn ke n̄kpri efakutom. Ẹdeme mmọ emi ẹnọ Ntiense kiet kiet oro esidomode ndika n̄kese nnyụn̄ nnyene nneme ye mme owo ke ufọk kiet kiet ẹdude do. Esop kiet kiet, esịnede ọtọn̄ọde ke ibat ibat Ntiense esịm n̄kpọ nte Mme Ntiense 200, enyene mbiowo oro ẹnọde utom edise mban̄a nsio nsio utom. Anditan̄a eti mbụk kiet kiet edi akpan owo ke esop Mme Ntiense Jehovah. Kpukpru Ntiense, edide ẹnam utom ke ibuot itieutom ofụri ererimbot, n̄kọk itieutom, m̀mê ke esop, ẹnam utom an̄wautom emi, oro edide nditịn̄ ikọ ọkpọkpọ nnọ mbon efen mban̄a Obio Ubọn̄ Abasi.

Ibatutom emi ke akpatre ẹsisịm ibuot itieutom ofụri ererimbot, ndien ẹsitịm ẹnyụn̄ ẹsio Yearbook eke isua ke isua. N̄ko, ẹsimịn̄ chart kpukpru isua ke nsiondi Enyọn̄-Ukpeme eke January 1. N̄wed iba emi ẹnọ ọyọhọ ntọt aban̄ade se ẹnamde ke isua kiet kiet nditie ntiense nnọ Jehovah ye Obio Ubọn̄ esie ke idak Christ Jesus. Ke mme isua ndondo emi n̄kpọ nte Mme Ntiense ye mbon oro ẹnyenede udọn̄ 14,000,000 ẹmedụk usọrọ Editi n̄kpa Jesus eke isua ke isua. Mme Ntiense Jehovah ẹbiat se ibede hour 1,000,000,000 nditan̄a eti mbụk, ndien se iwakde ibe mbufa owo 300,000 ẹna baptism. Ofụri ibat n̄wed emi ẹnịmde edi ediwak miliọn ke mme itie ikie.