Mme Usụn̄ Oro Mmọ Ẹdade Ẹbuana Eti Mbụk
ẸWỤK mme Christian ẹte “ẹka ẹkenam kpukpru mme idụt ẹdi mbet,” edi emi iwọrọke ite ke ana mmọ ẹfefịk m̀mê ẹnyenyịk mbon en̄wen ẹkabade esịt. Utom oro Jesus ọkọdọn̄de ekedi ‘ndibụk eti mbụk nnọ mbon nsụk-esịt,’ ‘ndibọp mmọ oro esịt mmọ obụn̄ọde,’ ‘ndidọn̄ kpukpru mme atua-eyet esịt.’ (Matthew 28:19; Isaiah 61:1, 2; Luke 4:18, 19) Mme Ntiense Jehovah ẹyom ndinam emi ebe ke nditan̄a eti mbụk Bible. Nte prọfet Ezekiel eke eset, Mme Ntiense Jehovah mfịn ẹdomo ndiyom “mmọ eke ẹsemede ẹnyụn̄ ẹtuade ẹban̄a kpukpru mbubiam ido emi mmọ ẹnamde.”—Ezekiel 9:4.
Mfọnn̄kan usụn̄ oro ẹdiọn̄ọde emi mmọ ẹdade ẹyom mbon oro ẹfụhọde ẹban̄a mme idaha oro ẹdude ke emi edi ndisan̄a ke ufọk ke ufọk. Ntem mmọ ẹsịn in̄wan̄în̄wan̄ ukeme ndisịm mme owo, kpa nte Jesus akanamde ke ini enye akasan̄ade “ke ikpọ obio ye obio-in̄wan̄, ọkwọrọ onyụn̄ obụk eti mbụk Ubọn̄ Abasi.” Mme akpa mbet esie ẹkenam kpasụk ntre. (Luke 8:1; 9:1-6; 10:1-9) Mfịn, ke ebiet ẹkemede, Mme Ntiense Jehovah ẹdomo ndika ufọk kiet kiet ediwak ini ke isua, ẹdomode ndinyene nneme ye enyeneufọk ke esisịt ini mban̄a mme ibuotikọ oro ẹbehede n̄kann̄kụk m̀mê ererimbot. Ẹkeme ndida itien̄wed Abasi kiet m̀mê iba nneme mban̄a, ndien edieke enyeneufọk owụtde udọn̄, Ntiense oro ekeme ndidiomi ndifiak n̄ka ke ini oro ọfọnde man ẹka iso ke nneme oro. Mme Bible ye mme n̄wed ẹnamde Bible an̄wan̄a ẹsidu, ndien edieke enyeneufọk owụtde udọn̄, ẹsinịm ukpepn̄kpọ Bible ke mfọn. Ẹnịm ediwak miliọn enyene-ufọn ukpepn̄kpọ Bible emi ye mme owo ye mme ubon ke ofụri ererimbot.
Mme mbono esop oro ẹnịmde ke mme Ufọkmbono Obio Ubọn̄ ẹdi usụn̄ efen emi ẹkwọrọde “eti mbụk Obio Ubọn̄” ẹnọ mbon efen. Mme Ntiense ẹsinịm mme mbono esop do ke urua ke urua. Mbono esop kiet edi utịn̄ikọ an̄wa ke ibuotikọ aban̄ade udọn̄ n̄kann̄kụk, ukpepn̄kpọ ke ndusụk ibuotikọ Bible m̀mê ntịn̄nnịm ikọ ẹdade ẹto magazine Enyọn̄-Ukpeme etienede. Mbono esop efen edi ufọkn̄wed oro ọnọde Mme Ntiense ukpep ndidi nti mme anditan̄a eti mbụk, emi ikpehe efen oro etịn̄de aban̄a utom unọ ikọ ntiense ke efakutom n̄kann̄kụk oro etienede. N̄ko, inikiet ke urua Mme Ntiense ẹsisop idem ke mme ufọk owo, ke n̄kpri otu, ndinịm mme ukpepn̄kpọ Bible.
Kpukpru mbono esop emi ẹberede ẹnọ kpukpru owo. Akananam owo ibọhọ etịbe. Mme utọ mbono esop emi ẹnyene ufọn ẹnọ kpukpru owo. Bible ọdọhọ ete: “Ana nnyịn ikere nte nnyịn owo kiet kiet ikemede nditịm ndemede mbon efen nnọ ima ye ifịk ifịk eti ido, ikûnyụn̄ itre ndidụk mme mbono esop nnyịn, nte ndusụk owo ẹtrede, edi utu ke oro isịn udọn̄ inọ kiet eken, ẹdọdiọn̄ ẹnam ntem sia ẹkụtde ẹte Usen oro ke asan̄a ekpere.” Oyom ọkpọkpọ ukpepn̄kpọ ye ndụn̄ọde, edi edisop idem ye mbon efen edemede owo udọn̄: “Nte ukwak abande ukwak ọsọp, ntre ke owo anam ekikere owo en̄wen ọkọri.”—Mme Hebrew 10:24, 25; Mme N̄ke 27:17, The New English Bible.
Mme Ntiense n̄ko ẹsida mme ifet oro ẹbererede ẹnam n̄kpọ ke eti usụn̄ ke nditịn̄ mban̄a eti mbụk nte mmọ ẹsobode ye mbon efen ke uwem mmọ eke usen ke usen. Ekeme ndidi ndineme esisịt nneme ye mbọhọidụn̄ m̀mê ye ekemmọ akaisan̄ ke bọs m̀mê ke ubomofụm, anyan nneme ye ufan m̀mê iman, m̀mê nneme ye ekemmọ anamutom ke ini udia uwemeyo. Ekese ke otu ikọ ntiense oro Jesus ọkọnọde ke ini okodude ke isọn̄ ekedi ke usụn̄ emi—nte enye akasan̄ade ke mben inyan̄, etiede ke enyọn̄ obot, adiade udia ke ufọk owo, odụkde usọrọ ndọ, m̀mê anamde isan̄ ke ubom ukọiyak ke Inyan̄ Galilee. Enye ama ekpep n̄kpọ ke mme synagogue ye ke temple ke Jerusalem. Ebiet ekededi emi enye okodude, enye ama ada ifet odude nditịn̄ mban̄a Obio Ubọn̄ Abasi. Mme Ntiense Jehovah ẹdomo nditiene nde ikpat esie ke afan̄ emi n̄ko.—1 Peter 2:21.
NDIKWỌRỌ IKỌ EBE KE UWỤTN̄KPỌ
Ndomokiet ke otu usụn̄ edibụk eti mbụk emi ikpenyeneke ufọn inọ fi edieke owo emi enemede ọnọ fi mîkadaha mme ukpepn̄kpọ emi isịn ke edinam ke idemesie. Nditịn̄ n̄kpọ kiet nnyụn̄ nnam efen edi mbubịk, ndien mbubịk ido ukpono ọmọwọn̄ọde ediwak miliọn owo ọkpọn̄ Bible. Owo inenke ndiduọhọ Bible. Mme scribe ye mme Pharisee ẹma ẹnyene N̄wed Abasi Usem Hebrew, edi Jesus ama asua ọnọ mmọ nte mbon mbubịk. Enye ama etịn̄ aban̄a nte mmọ ẹkotde ẹto Ibet Moses, ndien adian do ọnọ mme mbet esie ete: “Ẹnam ẹnyụn̄ ẹnịm kpukpru n̄kpọ eke mmọ ẹtemede mbufo: edi ẹkûnam nte mmọ ẹnamde: koro mmọ ẹdọhọ, edi inamke nam.” (Matthew 23:3) Christian ndidi uwụtn̄kpọ eti ido uwem etịn̄ ikọ akan ediwak ini oro ẹbiatde ke ukwọrọikọ. Ẹma ẹsio emi ẹwụt ibanndọ Christian oro ẹkenyenede mme ebe oro mînịmke ke akpanikọ, ẹte: “Man . . . ẹkpedụri mmọ ẹda, itoho ke ukwọrọ-ikọ, edi oto ke edu iban mmọ; ke adan̄aemi mmọ ẹkụtde nte mbufo iban ẹnyenede edisana ido.”—1 Peter 3:1, 2.
Ke ntre, Mme Ntiense Jehovah ẹdomo nditoro eti mbụk emi nnọ mbio efen ebe ke usụn̄ emi n̄ko: ke ndinịm eti uwụtn̄kpọ ke edu uwem Christian oro mmọ ẹtorode ẹnọ mbon efen. Mmọ ẹdomo ‘ndinam n̄kpọ ye mbon efen kpa nte mmọ ẹkpeyomde ẹnam ye mmimọ.’ (Matthew 7:12) Mmọ ẹdomo nditie ntem ye kpukpru owo, idịghe n̄kukụre ye ekemmọ Mme Ntiense, mme ufan, mme mbọhọidụn̄, m̀mê iman. Sia mmọ ẹdide mme anana mfọnmma, mmọ isikwe unen ọyọhọ ọyọhọ kpukpru ini. Edi udọn̄ esịt mmọ ndinam se ifọnde ye kpukpru owo idịghe n̄kukụre ndibụk eti mbụk Obio Ubọn̄ edi n̄ko ke ndinọ mme owo un̄wam ke ini ekededi oro ẹkemede.—James 2:14-17.
[Ndise ke page 19]
Hawaii
[Ndise ke page 19]
Venezuela
[Ndise ke page 19]
Yugoslavia
[Mme ndise ke page 20]
Mme Ufọkmbono Obio Ubọn̄, ẹdiọn̄de ẹye, ẹdi mme ebiet ẹnịmde ẹnọ nneme Bible
[Mme ndise ke page 21]
Ke uwem ubon mmọ ye ke ẹsobode ye mbon efen, Mme Ntiense ẹdomo ndinam se mmọ ẹtịn̄de