Nte Afo Akpama Ndifiọk N̄kpọ Efen Efen Mban̄a Bible?
Ntak Okotde Bible?
BIBLE ibietke n̄wed efen ekededi—enye esịne ima ima item otode Abasi. (1 Thessalonica 2:13) Edieke afo adade se Bible ekpepde esịn ke edinam, afo eyenen̄ede ọbọ ufọn. Afo ọyọkọri ima oro afo enyenede ọnọ Abasi onyụn̄ asan̄a ekpere enye, Andinọ “kpukpru eti edinọ ye kpukpru enọ eke ẹfọnde ẹma.” (James 1:17) Afo eyedifiọk nte ekemede ndisan̄a n̄kpere enye ke akam. Ke mme ini afanikọn̄, afo emekeme ndinyene un̄wam Abasi. Edieke afo anamde uwem fo odu ke n̄kemuyo ye mme idaha oro ẹtịn̄de ẹban̄a ke Bible, Abasi ọyọnọ fi nsinsi uwem.—Rome 6:23.
Bible esịne akpanikọ oro ọnọde un̄wana. Mbon oro ẹnyenede ifiọk Bible ẹbọhọ mme ukwan̄ ekikere oro ẹkarade uwem ediwak miliọn owo. Ke uwụtn̄kpọ, ndifiọk akpanikọ aban̄ade se itịbede ke ini nnyịn ikpade iyakke nnyịn ikop ndịk nte ke mme akpan̄kpa ẹkeme ndinọ nnyịn unan mîdịghe nte ke mme iman ye mme ufan nnyịn oro ẹkekpan̄ade ke ẹbọ ndutụhọ. (Ezekiel 18:4) Ukpepn̄kpọ Bible aban̄ade ediset ke n̄kpa ọnọ mbon oro ẹtabade mbonima mmọ ke n̄kpa, ndọn̄esịt. (John 11:25) Ndifiọk akpanikọ aban̄ade ndiọi angel anam nnyịn idu ke edidemede iban̄a mme n̄kpọndịk oro ẹdude ke ubụpekpo onyụn̄ an̄wam nnyịn ndifiọk ntak emi ekese mfịna ẹdude ke isọn̄.
Mme edumbet Abasi ke Bible ẹwụt nnyịn nte ikpodude uwem ke usụn̄ oro adade mme ufọn eke ikpọkidem ọsọk nnyịn. Ke uwụtn̄kpọ, “ndidi owo emi afarade ke idem” etịp esịn ke ndinyene eti nsọn̄idem. (1 Timothy 3:2) Ebede ke ‘ndiyet kpukpru se isabarede obụkidem ye spirit mfep ke idem nnyịn,’ nnyịn ifep ndibiat nsọn̄idem nnyịn. (2 Corinth 7:1) Ndida item Abasi oro odude ke Bible nsịn ke edinam anam ẹnyene inemesịt ye ukpono idemowo ke ndọ.—1 Corinth 6:18.
Edieke afo adade ikọ Abasi esịn ke edinam, afo eyenen̄ede okop inemesịt. Ifiọk Bible an̄wam nnyịn ndinyene emem esịtidem ye uyụhọ onyụn̄ ọnọ idotenyịn. Enye an̄wam nnyịn ndikọri mme utọ nti edu nte mbọm, ima, idatesịt, emem, mfọnido, ye mbuọtidem. (Galatia 5:22, 23; Ephesus 4:24, 32) Mme utọ edu emi ẹn̄wam ndinam nnyịn idi nti ebe m̀mê ibanndọ, mme ete m̀mê eka, m̀mê nditọ.
Nte akanam afo emekere aban̄a ini iso? Mme ntịn̄nnịm ikọ Bible ẹwụt ebiet oro nnyịn idude ke ubatini. Mme ntịn̄nnịm ikọ emi itịn̄ke n̄kukụre iban̄a mme idaha ererimbot mfịn kpọt, edi mmọ n̄ko ẹwụt nte ke Abasi ọyọsọp anam isọn̄ akabade edi paradise.—Ediyarade 21:3, 4.
Un̄wam Ndida Mfiọk Bible
Eyedi afo ama odomo ndikot Bible edi okụt nte ọsọn̄de ndifiọk se enye ọwọrọde. Ekeme ndidi ufiọkke ebiet emi afo ekemede ndise ke Bible man okụt mme ibọrọ ọnọ mme mbụme fo. Edieke edide ntre, afo udịghe n̄kukụre owo. Kpukpru nnyịn imoyom un̄wam man ifiọk Ikọ Abasi. Ke n̄kpọ nte idụt 235, Mme Ntiense Jehovah ẹnọ ediwak miliọn owo ukpepn̄kpọ Bible mfọn. Mmọ ẹyekop inemesịt ndin̄wam fi n̄ko.
Nte ido edide, edi mfọnn̄kan n̄kpọ ndikpep Bible ke nde ke nde, ọtọn̄ọde ye mme akpan ukpepn̄kpọ. (Mme Hebrew 6:1) Nte afo akade iso, afo eyetịm ekeme ndidia “ọkpọsọn̄ udia”—oro edi, mme ntotụn̄ọ akpanikọ. (Mme Hebrew 5:14) Bible edi ebiet emi odudu otode. Mme n̄wed ẹkọn̄ọde ke Bible, utọ nte Nso ke Bible Enen̄ede Ekpep?, ẹyen̄wam fi ndifiọk se mme itien̄wed Abasi oro ẹsiakde ẹsịn ke mme nsio nsio ibuot nneme ẹwọrọde.
Nte Afo Emeben̄e Idem Ndibiat Ini ke Urua Kiet Kiet Man Ọfiọk Bible?
Nte ido edide, emekeme ndidiomi ukpepn̄kpọ Bible ke ini ye ke ebiet oro eferede fi ke idem. Ediwak owo ẹkpep n̄kpọ ke ufọk mmọ. Ndusụk owo ẹkam ẹkpep n̄kpọ ke urụk ukopikọ. Ndutịm ukpepn̄kpọ idịghe n̄kpọ otuowo, edi edi ọkpọkpọ ndutịm ẹnamde ada ekekem ye mme ọkpọkpọ idaha fo, esịnede udomo ifiọk ye ifiọkn̄wed fo. Udomo ndomokiet idụhe, ndien owo idinamke bụt anam fi. Ẹyebọrọ mme mbụme Bible fo, ndien afo eyekpep nte ekemede ndisan̄a n̄kpere Abasi.
Afo udukpehe okụk ke utọ ukpepn̄kpọ Bible oro. (Matthew 10:8) Ẹnọ mme owo ẹtode kpukpru ido ukpono ke mfọn ye mbon oro mînyeneke ido ukpono edi emi ẹnyenede udọn̄ ofụri esịt ndifori ifiọk mmọ ke Ikọ Abasi.
Mmanie ẹkeme ndibuana ke nneme emi? Ofụri ubon fo. Mme ufan ekededi oro afo emekde ndikot ẹkeme n̄ko nditiene mbuana. Mîdịghe edieke afo amade, ẹkeme ndinyene nneme emi ye afo ikpọn̄.
Ediwak owo ẹsisio hour kiet ẹnịm ke urua kiet kiet ndida n̄kpep Bible. Edieke afo ekemede ndibiat ini efen efen m̀mê edieke esinyenede esisịt ini ke urua kiet kiet, Mme Ntiense ẹyenọ idemmọ unyịme unyịme ndin̄wam fi.
Ikot Ndibọ Ukpep
Nnyịn imọnọ fi ikot ndisobo ye Mme Ntiense Jehovah. Usụn̄ kiet emi afo ekemede ndinam emi edi ndiwet n̄wed nnọ ẹsọk kiet ke otu adres oro ẹdude ke idakisọn̄ emi. Do ẹyenam ndutịm man owo edinịm ukpepn̄kpọ Bible mfọn ye afo.
□ N̄kpama ndibọ n̄wed Nso ke Bible Enen̄ede Ekpep?
□ Mbọk ẹsobo ye ami kaban̄a ukpepn̄kpọ Bible mfọn.
Ibọhọke ẹwụt ke usụn̄ efen, kpukpru itie Bible ẹkotde ẹsịn ẹto Edisana Ŋwed Abasi Ibom.