IBUOTIKỌ MAGAZINE EMI | NDI AKPAMA NDIKPEP BIBLE?

Ke Ẹkpep Mme Owo Bible Ke Ofụri Ererimbot

Ediwak owo ẹdiọn̄ọ ke Mme Ntiense Jehovah ẹsisan̄a ẹkwọrọ ikọ ẹnọ mme owo. Edi ndi ọmọdiọn̄ọ ke nnyịn imesinyụn̄ ikpep mme owo Bible ke ofụri ererimbot?

Ke 2014, se ibede Mme Ntiense 8,000,000 emi ẹdude ke idụt 240 ẹma ẹkpep n̄kpọ nte owo 9,500,000 Bible kpukpru ọfiọn̄.a Enyene ndusụk idụt emi mme owo mîwakke ntem, n̄kpọ nte idụt 140.

Mme Ntiense Jehovah ẹsimịn̄ Bible, mme n̄wed, magazine, ye mme n̄kpọ eken oro ẹsidade ẹkpep mme owo Bible n̄kpọ nte idem biliọn kiet ye ubak kpukpru isua ke n̄kpọ nte usem 700. Utọ ediwak n̄wed oro ẹmịn̄de mi anam mme owo ẹkeme ndikpep Bible ke usem emi mmọ ẹmade.

“N̄kesimaha ndikpep n̄kpọ ke ufọkn̄wed, edi ukpepn̄kpọ enye emi ekenenem mi. Mma nnen̄ede mma se n̄kekpepde.”—Katlego, South Africa.

“Ẹma ẹbọrọ kpukpru mbụme mi ẹnyụn̄ ẹkpep mi ediwak n̄kpọ en̄wen.”—Bertha, Mexico.

“Ẹkesidi ufọk mi ẹdikpep mi Bible ke ini oro ọfọnde ye ami. Nso ke owo okpoyom akan oro!”—Eziquiel, Brazil.

“Ikesida minit 15 esịm 30 ikpep Bible. Ndusụk ini ima isikpep ebịghi akan oro; ekesitiene nte nnyenede ini.”—Viniana, Australia.

“Ama enem mi etieti ndikụt ẹkpepde mi Bible ke mfọn!”—Aimé, Benin.

“Owo emi ekekpepde mi Bible ama enen̄ede enyene ime onyụn̄ ọfọn ido. Ima inen̄ede ikpere kiet eken.”—Karen, Northern Ireland.

“Ediwak owo ẹsikpep Bible edi ikabakede idi Ntiense.”—Denton, England.

IBỌRỌ MBỤME EMI ẸSIWAKDE NDIBỤP MBAN̄A NTE NNYỊN ISIKPEPDE MME OWO BIBLE

Didie ke ẹsikpep owo Bible?

Isineme nsio nsio ibuotikọ inyụn̄ ikot mme itie N̄wed Abasi oro ẹtịn̄de n̄kpọ ẹban̄a se inemede oro. Ke uwụtn̄kpọ, Bible ọbọrọ utọ mbụme nte: Anie edi Abasi? Enye etie didie? Ndi enye enyene enyịn̄? Enye odụn̄ ke m̀mọ̀n̄? Ndi imekeme ndikpere enye? Se isisọn̄de mme owo edi ndifiọk itie Bible emi ẹkpekụtde ibọrọ mbụme emi.

Nnyịn isida n̄wed Nso ke Bible Enen̄ede Ekpep?b emi enyenede page 224 ikpep mme owo Bible man mmọ ẹfiọk ibọrọ mbụme emi. Ẹkenam n̄wed emi man ẹda ẹn̄wam mme owo ẹfiọk mme akpan n̄kpọ oro Bible ekpepde. N̄wed emi etịn̄ n̄kpọ aban̄a Abasi, Jesus Christ, akam, ediset ke n̄kpa, ntak emi mme owo ẹbọde ufen, ye ediwak n̄kpọ eken.

M̀mọ̀n̄ ke ẹsitie ẹkpep owo Bible, ndien ini ewe ke ẹsikpep?

Ẹkeme ndikpep ke ebiet ye ini ekededi oro afo amade.

Ẹsida minit ifan̄ ẹkpep owo Bible?

Ediwak owo ẹsida n̄kpọ nte hour kiet ẹkpep Bible kpukpru urua. Edi ẹkeme ndikpep ebịghi akan oro mîdịghe ibịghike-bịghi ntre, etiene nte afo enyenede ini. Ndusụk owo ẹsikpep ke n̄kpọ nte minit 10 m̀mê 15 kpọt kpukpru urua.

Okụk ifan̄ ke ẹsibọ ẹkpep owo Bible?

N̄wed emi isikamade ikpep mme owo n̄kpọ ye ukpepn̄kpọ emi edi ke mfọn. Inam emi sia Jesus ọkọdọhọ mbet esie ete: “Mbufo ẹkebọ ke mfọn, ẹnọ ke mfọn.”—Matthew 10:8.

Ẹsikpep owo Bible ebịghi didie?

Etiene nte afo oyomde. N̄wed emi Nso ke Bible Enen̄ede Ekpep? enyene ibuotikọ 19. Emekeme ndikpep ibuotikọ ekededi ke n̄wed emi m̀mê ofụri n̄wed emi ke udomo ini emi ọfọnde ye afo.

Ndi ana n̄kabade ndi Ntiense Jehovah?

Ihih. Imọdiọn̄ọ ke owo kiet kiet enyene unen ndimek se enye enịmde ke akpanikọ. Edi mbon emi ẹfiọkde se Bible ekpepde ẹkeme nditịm mbiere se mmọ ẹdinamde.

M̀mọ̀n̄ ke n̄kpokụt n̄kpọ en̄wen aban̄ade Mme Ntiense Jehovah?

Ikpehe Intanet emi jw.org/efi etịn̄ se Mme Ntiense Jehovah ẹnịmde ke akpanikọ ye se mmọ ẹsinamde.

Nso ke n̄kpanam edieke nyomde ẹdikpep mi Bible?

Da www.jw.org/efi wet Mme Ntiense Jehovah dọhọ ẹdikpep fi Bible.
Da adres oro odude ke page 2 ke magazine emi wet ọfis nnyịn oro ekperede fi akan.
Dọhọ Mme Ntiense Jehovah ke edem mbufo ẹdikpep fi Bible.

a Ẹsiwak ndikpep owo kiet kiet Bible, mîdịghe owo iba, ita, m̀mê akande oro, ẹtie kiet ẹkpep.

b Mme Ntiense Jehovah ẹsio n̄wed emi. Ẹmịn̄ se ikande idem miliọn 230 ke se ibede usem 260.

NDIKPEP BIBLE AN̄WAM UBON

“Ke ini n̄wan mi ọkọtọn̄ọde ndikpep Bible, mma n̄kụt ke enye enen̄ede okpụhọde. Ima itọn̄ọ ndinen̄ede n̄kop inemesịt. Mma nyom ndifiọk se enye ekesikpepde, ntre mma ntọn̄ọ ndikpep Bible n̄ko. Se n̄kekpepde ama anam nnen̄ede n̄kpụhọde. Ndikpep Bible anam ubon nnyịn ẹnen̄ede ẹdiana kiet.”—Eziquiel.

“Ke mma n̄kọtọn̄ọ ndikpep Bible, mma ntre ndisida n̄kpọsọn̄ ibọk, ndin̄wọn̄ mmịn mbe ubọk, nnyụn̄ n̄kpep ndimụm idem n̄kama ke ini owo anamde se iyatde mi. Ufọk mi asana onyụn̄ eye idahaemi. Mmenen̄ede mma ubon mi nnyụn̄ nsinam se inemde mmọ esịt. Mmenen̄ede n̄kop inemesịt idahaemi.”—Karen.

“Ndusụk owo ikoyomke n̄kpep Bible. Edi ebe mi ama ọdọhọ n̄ka iso n̄kpep, n̄kûtiene se mme owo ẹtịn̄de. Enye ama ọdọhọ ke imama nte ami n̄kpụhọrede, yak n̄kama ke ubọk oro. Uwem enem ke ubon nnyịn idahaemi akan nte ekedide!”—Viniana.