Nso Idi Utom Mme Asan̄autom Unamutom?

Bible etịn̄ aban̄a otu mme Christian iren iba emi ẹsisede ẹban̄a mbiomo esop—“mme esenyịn ye mme asan̄autom unamutom.” (Philippi 1:1) Nditọete oro ẹnyenede utọ ifetutom emi ẹdu ke mme esop kiet kiet. Mme utom ewe ke mme asan̄autom unamutom ẹsinam ke ufọn nnyịn?

Mmọ ẹsin̄wam otu mbiowo. Ndusụk mme asan̄autom unamutom ẹdi n̄kparawa owo, mbon eken ẹdi ikpọ owo. Mmọ ẹdi mbon emi ẹnyenede eti itie ufan ye Jehovah, mbon oro ẹkemede ndiberi edem, ẹnyụn̄ ẹsịnde idem ẹnam utom. Mmọ ẹsise ẹban̄a mme akpan utom esop Abasi oro ẹsinamde kpukpru ini ye mme utom eken oro anade ẹnam ke esop. Emi esinam mbiowo ẹnyene ufan̄ ẹtịn̄ enyịn ke utom edikpep ye edibọk erọn̄.

Mmọ ẹsinam mme utom oro ẹnyenede ufọn. Ẹnọ ndusụk mme asan̄autom unamutom utom nte mme adaidaha ndidara kpukpru mbon oro ẹdide mbono esop. Ẹnọ mbon eken utom ndise mban̄a ukwak ikwọ, ndinọ mme owo n̄wed, ndise mban̄a okụk esop, ye ndideme efakutom ukwọrọikọ nnọ nditọete ke esop. Mmọ ẹn̄wam n̄ko ke ndise mban̄a Ufọkmbono Obio Ubọn̄. Mbiowo ẹkeme ndidọhọ mmọ ẹsịn un̄wam ẹnọ mbon oro ẹsọn̄de. Mme asan̄autom unamutom ndinyịme ndinam utom ekededi oro ẹnọde mmọ esinam kpukpru owo ke esop ẹkpono mmọ.—1 Timothy 3:13.

Iren Christian emi ẹsinịm eti uwụtn̄kpọ. Nti edu Christian emi mme asan̄autom unamutom ẹnyenede ẹsinam ẹmek mmọ. Mmọ ẹsisọn̄ọ mbuọtidem nnyịn ke ini mmọ ẹnọde utịn̄ikọ ke esop. Mmọ ẹsinam nnyịn idọdiọn̄ inyene ifịk ke ini mmọ ẹdade usụn̄ ke utom ukwọrọikọ. Sia mmọ ẹsidianade kiet ẹnam utom ye otu mbiowo, emi esinam nnyịn ikop idatesịt inyụn̄ idiana kiet. (Ephesus 4:16) Nte ini akade, mmọ ẹkeme n̄ko ndidot ndinam utom nte mbiowo.

• Nso orụk owo ke mme asan̄autom unamutom ẹdi?

• Didie ke mme asan̄autom unamutom ẹsin̄wam ke ndinam esop asan̄a nte ọfọnde?